Home Hudicial Castigo combina pa homber haya cu cantidad di marihuana, cocaina y matanan...

Castigo combina pa homber haya cu cantidad di marihuana, cocaina y matanan di marihuana

0
0
SHARE
- Advertisement -

Castigo combina pa homber haya cu cantidad di marihuana, cocaina y matanan di marihuanaORANJESTAD (AAN): E homber di inicial E. a wordo haya culpable di un cantidad di marihuana, cocaina cu na diferente ocasiona Polis a hay’e cun’e. Tambe el a wordo haya cu 10 mata di marihuana. Fiscal a exigi un castigo combina y Hues, despues di a scucha defense di abogado, el a bisa cu e ta confirma e exigencia di Fiscal.

ACUSACIONNAN: Ta asina cu E. no a presenta den Corte pero si dos abogado. E acusacionnan cu Fiscal a presenta ta cu riba 11 Februari 2014, E. tabata den posecion di cocaine y marihuana. Riba 23 October 2014 atrobe e tabata den posecion di cocaine y marihuana.

Riba 6 September 2014 un biaha mas Polis ta haya E. cu coca y marihuana.

Dia 21 September 2014, Polis a bay haya 10 mata di marihuana na e cas. Notabel ta cu cada vez cu e wordo deteni, e ta wordo laga liber despues di algun dia. Esey a causa cu ta asina hopi biaha cada vez e ta wordo gara cu droga.

CACHO ANTI DROGA DEN ACCION: Hues a repasa cada un di e casonan caminda el a mustra cu dia 11 Februari 2014. Polis a detene E. riba caya y a hay’e cu dos sakito un cu cocaine y un cu marihuana. En total ta papia aki di 90,7 gram di marihuana y 12 gram di piedra di cocaine. Polis ta sospecha cu e ta bende droga.

Dia 6 September 2014, durante un accion di investigacion preventivo, Polis a para un auto y a haya holor di marihuana. Un persona den e auto a duna autorizacion di listra. Aki Polis a haci uso di e cacho anti droga y a bin haya un cantidad di marihuana y cocaina den e auto. A resulta cu e droga ta di E. Relaciona cu esaki a bay haci investigacion na su cas caminda a haya matanan di marihuana.

Hues a bisa cu en total ta papia aki di 57 gram di marihuana, 10 mata di marihuana y 30,8 gram cocaine. Hues a mustra cu E. ta un adicto y residivista.

EXIGENCIA DI FISCAL: Fiscal a bisa cu e ta haya legalmente proba cu E. tabata den posecion di cocaine y marihuana. Pa loke ta e asunto di droga den auto na September, Fiscal a bisa Hues cu e ta haya cu mester declara E. liber pa e cocaine pasobra no tin siguranza cu e cocaina realmente ta di E. Na opinion di Fiscal, E. mes a bisa cu e marihuana ta di dje y na su cas a haya matanan di marihuana. Segun Fiscal, tabatin mas hende den e auto y no por bisa exactamente di kende e droga ta. Fiscal ta kere cu no mester manda E. bek KIA. El a exigi 30 dia di prison di cual 14 dia ta condicional cu un tempo di prueba di 2 aña. Ta asina cu Hues Comisario a laga E. liber ultimo biaha door cu e ta preocupa cu su mama cu ta su so na cas.

BENDE DROGA PA YUDA MAMA: Abogado mr. Croes a bisa Hues cu E. tabata dedica na bendemento di masha tiki droga pa asina e mantene su mes y su mama. El a puntra kico ta e intension di castigo. E castigo ta pa laga e persona bay riba e bon caminda. El a bisa cu E. tabata bende droga pa yuda su mama cu cumpra cuminda. Hues na dado momento a hala atencion di e abogado, mustrando cu Fiscal a pidi pa no sera E. y pakico ta bin cu tur esaki. E abogado a bisa Hues cu e ta bay di acuerdo cu exigencia di Fiscal.

SENTENCIA: Hues a sera tratamento di e caso y a dicta sentencia di biaha. Hues a bisa cu e ta haya tur e acusacionnan proba. Contrario cu Fiscal, e si ta haya cu e cocaina haya den e auto ta pertenece na E. Pa loke ta e castigo, Hues ta haya cu no tin sentido pa E. bay sera atrobe. El a confirma e castigo exigi pa Fiscal. Hues a condena E. na 30 dia di prison di cual 14 dia ta condicional cu un tempo di prueba di 2 aña.

 

- Advertisement -

DUNA COMENTARIO

Please enter your comment!
Please enter your name here