Home General Edad cu mas tanto muchanan ta wordo geter y ta ter ta...

Edad cu mas tanto muchanan ta wordo geter y ta ter ta entre seis cu nuebe aña!

2
0
SHARE
- Advertisement -

Trahador Social Rhomiko Winklaar:

ORANJESTAD (AAN) – Termento por ta verbal, pero tambe cu mimica, fisico, cu cierto señalnan cu e persona ta ripara cu e ta wordo geter.

Asina e Trahador Social di Schoolnan Christian Protestant sr. Rhomiko Winklaar a splica durante su charla den e Convencion anti-termento.

Muchanan entre seis cu nuebe aña ta den e edad cu ta wordo geter mas hopi. “Mi mes por reconoce esaki. Mi tin un yiu di nuebe aña, y mi enberdad mi ta ripara cu despues di e edad aki nan no ta worry mucho mas cu e ter, pasobra esaki ta pasa. Pero nan ta bira mucho mas conciente di kico nan ta haciendo, y ki efectonan tin riba nan mes y riba otro”, sr. Winklaar a subraya.

Tin diferente forma di ter. Sr. Winklaar a tuma e cinco top: Yama otro pa nomber, of dunando otro nomber. E mes a wordo geter pesey, y pa su bril, entre otro. E tabata tin curpa yen y su nomber parti na pida pida por ta: Rho-mai-cow.

E publico a hari, y sr. Winklaar a haya ta bon pa hari, pero hopi no sa e dolor cu termento ta haci na otro.

“Ami a custumbra, mi a ignore, no worry cu esey. Mi a pordona tur esnan cu a hacie, mi ta topa nan y si un dia nos por sinta dal un coffie hunto nos ta hacie, pakico no?” el a expresa, agregando cu e ta pasado y e ta lague pa loke e ta.

Sr. Winklaar a menciona tambe cu tin hopi gañamento. “Nos ta bay sinta gaña riba otro, hinca otro den problema, siendo cu no ta berdad djis pa pone otro persona negativo, por ta pa jealous of diferente otro motibo. Tambe e parti fisico manera scop un mucha, kinipie, ranca na su cabey, tur esey ta cosnan cu ta sosode ora ta trata di termento. Bisa cosnan mahos den forma di discriminacion tambe. Esey ta pasando masha hopi mes bao di muchanan, entre otro pa color di cuero”, sr. Winklaar a expresa.

Tambe a resalta den e investigacion cu 71 porciento di esnan cu ta ter otro mucha, den pasado a pasa den termento tambe. “Esnan nos ta wak loke nos ta yama circulo vicioso. Na momento cu un persona ta wordo geter e ta bisa ‘mi ta e victima, mi no kier ta e victima mas’. Mi ta bay ta esun cu ta bay ter. Pues e ta alarmante y e no ta di awor, pero e ta pasando for di decadanan caba. Pero nos tey pa haci e diferencia”, el a subraya.

Sr. Winklaar mes a haci un investigacion den scolnan secundario entre 2014 y 2015.

“Mi a bin saca afo cu 24 porciento, pues casi un den cuater mucha cu a participa den e investigacion ta wordo geter. Nos ta wak cu den scolnan primario ta un di cada dos, pero na  momento cu nan ta bay scol secundario e ta baha”, sr. Winklaar a remarca. Esaki tabata entre muchanan di 11 pa 18 aña di edad.

Esaki ta su conclusion cu por ta un reflexion pa Aruba henter. El a subraya cu lo ta bon si por haci un investigacion mas grandi. “Mi a haci e pregunta si nan tambe ta ter y nan francamente a contesta mi cu si, cu nan ta ter. Mi a bin saca afo cu un di cada cinco mucha ta bisa di ta un terdo. E ta hopi. Pero cu nan ta durf di bisa esey ta great caba di trece dilanti. Con nos tin cu cambia esey? Mi tin gana di haci un investigacion otro aña, pa wak unda nos ta para”, sr. Winklaar a señala. E ta spera di haya cero porciento of un porciento.

- Advertisement -

DUNA COMENTARIO

Please enter your comment!
Please enter your name here