Home Hudicial Homber cu a menaza otro cu morto mester duna cuenta na Huez

Homber cu a menaza otro cu morto mester duna cuenta na Huez

0
0
SHARE
- Advertisement -

Tambe e ta worde sospecha di keda sin supla den aparato pa check alcohol

ORANJESTAD (AAN): Awe mainta tin un caso penal cu ta mustra interesante. Ta trata aki di un caso penal cu Ministerio Publico a cuminsa contra e persona A.L., kende ta worde sospecha di diferente delito.

Informacion cu DIARIO ta dispone di dje ta mustra cu e acusacionnan cu awe mainta Fiscal ta presenta contra A.L. ta:

DESTRUI BENTANA DI CAS:  E promer acusacion contra A.L. ta cu riba 29 di Augustus 2014, intencionalmente el a kibra bentana di un cas.

MENAZA DI MORTO:  E otro acusacion cu Fiscal ta presenta ta cu riba 23 di Mei 2015, A.L. a menaza un persona cu morto. E lo mester a grita: “Buscame la pistola”. Aparentemente lo tabatin un problema cu a bay for di man.

KEDA SIN SUPLA DEN APARATO: Fiscal tambe ta acusa A.L. cu riba e mesun 23 di Mei 2015, e no a cumpli cu instruccion cu Polis a dun’e durante un control. Ta asina cu e a worde para pasobra ta sospecha cu e tabata core auto burachi.

Polis a bis’e pa supla den e aparato pa asina por check e grado di alcohol den su rosea. Ta asina cu A.L. a nenga di supla, cual a haci e asunto mas serio ainda. Fiscal ta acus’e di a core auto bou influencia di alcohol riba e 23 di Mei 2015.

Hopi hende no sa cu como chofer di auto, ora Polis para bo pasobra nan ta sospecha cu bo lo ta coriendo bou influencia di alcohol, ta bo obligacion ta supla di e aparato. E aparato aki, ta un medio cu Polis ta usa pa asina haya sa e grado di alcohol cu un persona tin den su rosea.

Unavez cu un chofer keda sin supla, automaticamente e ta bira sospechoso di ta core auto bou influencia di alcohol y e consecuencianan ta pa su mes.

E por tin como consecuencia cu e chofer por worde deteni y encarcela pa e sosega su curpa. E por tin como consecuencia, cu e auto ta worde kita for di dje pasobra e momento ey e ta forma un peliger pa trafico y bida di hende.

Ademas di e medidanan aki cu Polis por tuma, tin bin acerca e castigo cu Fiscal por exigi den Corte. Den Corte ta un otro gay ta canta. E ora ey ta Fiscal, den margen di ley, ta bay exigi castigonan cu e ta haya ta na su lugar.

Un castigo por ta un boet. Un otro castigo por ta, depende di e grado di influencia di alcohol, cu e por kita e rijbewijs pa un periode.

DIARIO ta cubri e caso aki y lo informa lectornan kico tur a sosode.

 

- Advertisement -

DUNA COMENTARIO

Please enter your comment!
Please enter your name here