Home Hudicial Homber deteni pa a falta respet pa un Hues

Homber deteni pa a falta respet pa un Hues

0
0
SHARE
- Advertisement -

ORANJESTAD  (AAN)  – Actualmente tin un persona masculino M. deteni relaciona cu un posibel faltamento di respet pa Hues. Esaki ta wordo considera como un hecho castigabel.

DIARIO ayera a drenta den contacto cu vocero di Ministerio Publico, kende a confirma cu e persona M. ta deteni y cu esaki ta relaciona cu un hecho castigabel cu el a haci.

DIARIO por a compronde cu aparentemente ta un Hues a haci un denuncia contra M. pa e forma con M. lo a manda un carta pa Corte. M. lo a expresa su mes pa cu un situacion di huurmento di cas y lo a cuestiona con Hues di Corte di Husticia a actua.

Esaki a cay den mal tera serca Corte di Husticia y a haci un denuncia contra M. Corte di Husticia no ta bay tolera e forma di actua aki.

Ta asina cu abogadonan mes, a base di e etica di husticia, no por expresa nan mes con nan kier contra un Hues. Diferente biaha a yega di sosode caba cu algun abogado cu a haci cosnan for di sla mester a presenta dilanti un comision special cu ta exigi pa e abogado responsabilisa su mes y e momento ey ta dicidi tambe e medida diciplinario cu ta tuma. E comision special cu ta evalua abogadonan, ta consisti di Hues y abogadonan.

Den e caso ariba menciona, M. lo a kere cu e si por haci criticanan skerpi pero aki el a dal su dede duro.

E trabou di un Hues ta masha exigente y un Hues ta representa Corte di Husticia. E mester cumpli cu un cantidad di exigencianan y tambe mester hiba un sistema di biba basta reserva. E motibo pa esaki ta pasobra un Hues mester ta imparcial den su evaluacion y decision riba un caso. Si un Hues ta socialisa su mes di mas, e ora ey e no por atende casonan. Cada vez e lo mester distancia di caso y laga otro colega haci esaki.

A yega di sosode diferente biaha cu Hues a dicidi di distancia su mes di un caso pasobra e conoce un di e partidonan envolvi. Esaki ta e forma corecto di haci pa demostra na comunidad cu Hues ta imparcial.

Esey ta haci tambe cu un Hues ta goza di masha respet ora e ta trata un caso. Tin henter protocol den Corte ora di trata caso. Entre otro, tur hende mester lanta para ora Hues drenta sala di Corte. Hues ta esun cu ta dicidi kende por papia y kende no. Ki ora e persona por papia. Si e persona mester wordo saca for di sala di Corte. Esey ta haci tambe cu tin un manera con mester papia cu un Hues. Mas ainda ora ta skirbi un carta riba un caso y dirigi esaki na Hues.

Pa Ministerio Publico, M. ta deteni relaciona cu un hecho castigabel. Lo mester warda mira kico e investigacion ta mustra pa mira kico Ministerio Publico ta dicidi. Si ta cuminsa un caso penal of no.

 

- Advertisement -

DUNA COMENTARIO

Please enter your comment!
Please enter your name here