Home Hudicial Hues a ordena Dijkhoff pa rectifica tur acusacionnan infunda contra minister Otmar...

Hues a ordena Dijkhoff pa rectifica tur acusacionnan infunda contra minister Otmar Oduber

1
0
SHARE
- Advertisement -

A pone un daño per huicio maximo di mil Florin pa dia

ORANJESTAD (AAN): Diaranzon mainta Corte den Promer Instancia a dicta sentencia den e caso sumario cu minister Oduber a cuminsa contra Francis Dijkhoff. DIARIO a publica tanto e banda di abogado mr. Lejuez cu a representa e mandatario, como e banda di Dijkhoff.

Hues ayera mainta no solamente a ordena Dijkhoff pa rectifica su insinuacionnan sin ningun prueba sino tambe a fiya un daño per huicio di 1 mil Florin pa cada dia cu Dijkhoff keda sin rectifica.

EVALUACION DI HUES

DIARIO a haya copia di e sentencia caminda Hues den su evaluacion di e caso ta mustra cu entre otro Dijkhoff a expresa na radio cu minister Oduber a busca e sicario Span Ospina pa mata Poentje Castro. Tambe Dijkhoff a bisa cu Oduber ta usa droga y ta meti den traficacion di droga. Tambe cu ta Oduber a manda mata Carlos Cana na Venezuela. Den otro programa di radio Dijkhoff a bisa cu e tin pruebanan.

Hues ta mustra cu e demanda di rectificacion di Oduber ta un limitacion di derecho di expresion liber cu ta para den nos Constitucion y tambe den Derechonan Humano EVRM. Esey ta derecho cu Dijkhoff tambe tin. Hues ta mustra cu limitacion di e derecho aki ta bin, ora keda mustra cu Dijkhoff inhustamente a haci expresionnan contra Oduber.

Hues ta sigui bisa cu riba e pregunta si e limitacion ta al caso, tin dos interesnan personal cu mester evalua. E promer ta e interes di Oduber , tambe como politico pa no tacha su integridad den medio di comunicacion. Di otro banda tin e interes di Dijkhoff cu mester por haci opinionnan critico, avisa y señala riba cosnan cu un persona cu tin un posicion public ta haci. Tambe di por señala cosnan cu no ta bon den comunidad.

Hues ta mustra cu e expresion liber no ta solamente e contenido di e opinion sino tambe e forma con esaki ta worde treci den publicidad cu por causa intrankilidad den comunidad.

Hues ta haya cu Oduber, como politico, mester por contra criticanan fuerte. Sinembargo e expresionnan cu Dijkhoff a haci no ta den sentido politico sino ta tacha e bida personal di Oduber y ta afecta seriamente su posicion como minister di Aruba.

Hues a mustra cu Dijkhoff ningun momento por e prueba tur loke el a expresa contra Oduber. Tur su acusacionnan riba e asesinato di Poentje Castro y e asesinato di Carlos Cana, ta basa riba redashi y conclusionnan mas debil mes. Mesun cos ta conta pa e acusacion cu Oduber lo ta meti den droga.

Esaki ta trece cun’e cu den un caso mas profundo, Dijkhoff lo worde ordena pa rectifica manera Oduber a demanda. Hues a sigui bisa den su evaluacion cu e ta haya cu tin suficiente motibo pa pone un presion di daño per huicio contra Dijkhoff. Esaki pasobra diferente biaha den Corte, Dijkhoff a expresa di lo no rectifica. Hues a mustra cu door di e expresionnan di Dijkhoff di no lo rectifica, e lo aumenta e daño per huicio te na e maximo.

DECISION DI HUES

Hues a ordena Dijkhoff pa rectifica na e programa di radio Hit 94 “pueblo ta papia”, “Riba orden di Hues segun su veredicto di dia 21 di October 2015, ami Francis Edfard Dijkhoff ta declara lo siguiente. Entre otro riba dianan 24 y 28 di Augustus 2015 y dia 1 di September 2015 mi a acusa minister Otmar Oduber den e programa di radio aki cu e a laga mata Carlos Cana na Venezuela y cu e a contrata un sicario pa mata e locutor Poentje Castro y cu e sicario aki lo ta señor Ospina Span. Mi a bisa cu mi lo tin prueba di esaki.

Tambe mi a expresa cu mi lo tin prueba cu minister Otmar Oduber lo ta envolvi den traficacion di droga y lo ta usa droga.

Pa medio di e comunicado obligatorio aki mi ta declara cu mi no tin ningun prueba cu minister Oduber lo ta envolvi den morto di Poentje Castro ni di esun di Carlos Cano. Tampoco mi no tin ningun prueba cu minister Otmar Oduber lo ta envolvi den narcotrafico y lo ta usa droga. Pesey pa medio di e comunicado aki mi ta rectifica y revoca e acusacionnan infunda aki cu mi a haci den direccion di minister Otmar Oduber”.

Ademas di e rectificacion, Hues a impone un daño per huicio di 1 mil Florin pa dia te na un maximo di 1 miyon Florin, pa cada dia cu Dijkhoff keda sin rectifica. Tambe Hues a ordena Dijkhoff pa paga e gastonan di e caso na banda di e minister.

 

- Advertisement -

DUNA COMENTARIO

Please enter your comment!
Please enter your name here