Home General Minister di Husticia no conoce su materia y lamentablemente e no ta...

Minister di Husticia no conoce su materia y lamentablemente e no ta reconoce esey!

0
0
SHARE
- Advertisement -

Lider di PDR mr. Andin Bikker:

Minister di Husticia no conoce su materia y lamentablemente e no ta reconoce esey!ORANJESTAD (AAN)—Parlamentario mr. Andin Bikker, lider di Fraccion di Partido Democracia Real, a trata e tema di criminalidad como e di dos punto di agenda, den conferencia semanal di prensa, diamars ultimo.

El a subraya cu e ultimo simannan aki, nos ta djis habri un corant of wak otro medio di comunicacion, pa mira con atraconan ta sosode cada pasa un dia, practicamente.

Siman cu a pasa a culmina cu un atraco riba un joyeria, netamente patras di Corte di Husticia. Na unda nos ta bay? Asina mr. Bikker ta puntra, mirando cu diariamente nos ta confronta cu e situacionnan aki.

“ E minister di husticia ta haci comosifuera nada a pasa, anto nos pueblo ta sigui sin proteccion, y no tin ningun conclusion cu e minister aki ta saca, y e ta keda comosifuera cu nada ta pasando”, Bikker a enfatiza.

Di parti di PDR nan a propone pa contacta dr. Peter Tarlow pa bin duna un “brainstorming Session” na Aruba, pero e minister a bisa cu no, pasobra e tin cooperacion cu otro universidad y e no kier perturba esaki.

“Nos ta aprecia tur universidad y nan cooperacion, pero no ta kita nada di bo haya un otro experto, cu ta reconoci mundialmente, y a skirbi bukinan riba e tema di proteccion di e ciudadano y turistanan. Gratuitamente di su banda, e por bin duna un ‘brainstorming session’ pa nos por yega na cierto solucionnan concreto” mr. Bikker a subraya.

El a agrega cu, obviamente, e maneho cu e minister ta hibando no ta funciona y esey ta bisto, pasobra e pueblo no ta protehi y criminalidad ta sutando nos diariamente. Ta inaceptable, el a subraya, cu aworaki e criminalnan a perde tur sentido di responsabilidad, respet y gewoon ta atacando den dia cla. Nan ta molestiando e turistanan y nos pueblo, pero e minister no ta hibando un bon maneho ni ta acepta critica constructivo.

“Esaki ta hopi preocupante, pasobra na final di dia, nos pueblo cu ta luchando pa gana su pan y sobrevivi den e economia aki, cu tur e medidanan cu gobierno ta imponiendo riba dje, ta mira cu su pertenencianan ta wordo kita for di dje, y nos tin un Minister di Husticia cu no ta conoce su trabao y no ta eficiente. No ta di awor, e tin añanan caba cu e no ta conoce su materia y e no ta reconoce esey, lamentablemente”, mr. Bikker a remarca.

 

 

- Advertisement -

DUNA COMENTARIO

Please enter your comment!
Please enter your name here