Home General Minister Mike de Meza cu intercambio interesante durante di Green Aruba Pre-event...

Minister Mike de Meza cu intercambio interesante durante di Green Aruba Pre-event na Hulanda

0
0
SHARE
- Advertisement -

ORANJESTAD(AAN): E organizadornan di Green Aruba 2015 a organiza un Pre-event na Den Haag, Hulanda diaranson pa presenta e Aruba Road Map, esta e plan pa e trayecto di e isla pa un futuro sostenibel.

Minister di Asuntonan Economico y Energia, ing Mike de Meza a presenta na e invitadonan diferente oportunidad unico pa haci negoshi cu ta worde presenta na Green Aruba VI y Aruba Sustainable Energy Week.

Aruba Sustainable Week, cu ta tuma luga for di October 26 pa October 31, ta encera diferente evento cu atendencia interesante pa esunnan cu ta haci negoshi den e ramo di energia sostenibel y tur tipo di producto relaciona na e industria y desaroyonan aki.

Minister de Meza a subraya e importancia di e presencia di organizacionnan manera e partnernan di Aruba, esta Carbon War Room – Rocky Mountain Institute, Clinton Climate Initiative (CCI) y IRENA (International Renewable Energy Agency), representantenan di gobiernonan regional di rango halto y functionarionan di companianan di utilidad regional cu ta encarga cu decisionnan crucial den nan mercadonan.

E mandatario a pone enfasis riba e importancia pa “share sustainability”, esta comparti den e desaroyonan di energia sostenibel, cu ta e punto di enfoke di Green Aruba VI, y di e Aruba Learning Event, cu participacion di e paisnan cu ta participa na e “10 Island Challenge”.

Green Aruba sin mas ta un oportunidad excelente pa “networking”. Como parti di Aruba Sustainable Energy Week, Green Aruba VI a worde programa pa tuma luga entre Aruba Learning Event (October 26 y 27), y e reunionnan di ECLAC (October 29 y 30) y di Parlatino (October 30 y 31).

E tres conferencianan ta importante pa Green Aruba y su participantenan, como cu varios delegado y representantenan di diferente pais a extende nan viahe – sea prome of despues di nan conferencia – pa ta na Aruba durante di Green Aruba. Esaki pues ta un oportunidad excelente pa companianan Europeo ofrece nan productonan y servicionan di e segmento energia sostenibel y temanan relaciona na companianan di utilidad y gobiernonan di Latino America y Caribe.

Cu esaki Aruba ta sigui tambe expande riba e isla su oportunidadnan pa ta un “hub” pa haci negoshi entre Latino America y Europa.

Green Aruba 2015 ta enfoca riba solucionnan pa medio di colaboracion, oportunidadnan, tecnologia y inovacion pa Aruba mes primeramente y pa paisnan den nos region. Aruba ta e destinacion ideal y Green Aruba ta e plataforma perfecto pa comunicacion, networking y haci negoshi.

Minister Mike de Meza a probecha di combersa cu representantenan di diferente compania cu a expresa un interes den explora nan opcionnan pa haci negoshi cu y/of for di Aruba. El a splica di e incentivanan fiscal pa e zona di p’ariba di brug, como tambe detayenan di Freezone y e proyecto di e waf di Barcadera y cambionan significativo den infrastructura manera e construccion di Green Corridor.

Green Aruba Pre-event tabata un encuentro interesante y exitoso.

 

- Advertisement -

DUNA COMENTARIO

Please enter your comment!
Please enter your name here