Home General Prome cu hisa mas e tarifa di transporte publico, aumenta salarionan por...

Prome cu hisa mas e tarifa di transporte publico, aumenta salarionan por fabor!

0
0
SHARE
- Advertisement -

Opinion Publico:

ORANJESTAD (AAN) – No por tapa solo cu dede! Cu bida ta caro na Aruba ta un realidad, y no ta por nada hopi ciudadano ta keha di esaki.

Lesando tur e noticianan tocante e diferente manera cu Gobierno kier ehecuta pa haya entrada, entre otro e aumento di tarifa di Arubus, e pago di number via accijns unda esun cu mas ta core lo paga mas, e siguiente tax riba transaccionnan bancario cu no a bolbe tende nada pero cu sigur lo wordo introduci diripiente asina, etc., etc., diferente persona ta di opinion cu prome cu sigui cremencha e cartera di pueblo, mester aumenta salarionan!

Salarionan no a bolbe subi. Tin hende trahando den sector priva, cu tin un salario di dos mil florin pa casi binti aña consecutivo sin un debchi mas acera.

Tin doñonan di trabao cu asina sin mas ta aumenta oranan di trabao, sin paga overtime na su trahadornan, y asina tin varios manera di explota e trahador pero ningun hende ta habri boca pa reclama, pasobra nan no ta afilia na un sindicato pa bela sikiera un tiki, pa nan derechonan.

Tin empresanan cu ta progresa na custia di e trahador, pero e trahador mes no ta bay dilanti. Mientras tanto, nan ta duna tur cos di nan mes, pero costo di bida keto bay ta sigui subi, e trabao tambe ta aumenta, pero nada di mehora salario.

E no ta husto! Ningun parlamentario mucho menos e ministernan ta papia di un aumento di salario general, pero medidanan riba lomba di nos pueblo si ta general.

Un salario cu binti aña pasa tabata yega, awendia no por sobrevivi dignamente cu e mesun entrada aki, pasobra den e transcurso di e binti añanan aki Aruba a bira supremamente caro! Hopi ta esnan cu no ta usando auto mas, pasobra no por paga parkeer pa oranan largo, y nan a opta pa viaha den autobus of cumpra smartcard di Arubus. Pero ta parce cu for di entrante 1 di Januari cu e tarifa di tur dos ta bay subi, si aworaki nan ta spaar un tiki na gasoline lagando auto na cas y usando transporte publico, dentro di poco e lo no ta un bon opcion mas pasobra gasto den transporte tog ta bay aumenta. Un biaha mas, hopi ciudadano ta clama pa un aumento general di salario, manera otro paisnan ta bin cune ora pa compensa un tiki alomenos, e aumento di e costo di bida.

- Advertisement -

DUNA COMENTARIO

Please enter your comment!
Please enter your name here