Home General Un dollar di cada turista crusero ta bay pa Arutram cubri su...

Un dollar di cada turista crusero ta bay pa Arutram cubri su gastonan!

1
0
SHARE
- Advertisement -

For di e facility charge tax entrante 1 Januari 2016:

Un dollar di cada turista crusero ta bay pa Arutram cubri su gastonan!ORANJESTAD (AAN) – Den conferencia semanal di prensa, cu Minister di Turismo, Transporte, Sector Primario y Cultura, di nos redaccion a puntra e mandatario si tin intencion di cuminza cobra pa uso di e tram.

E dignatario a menciona cu e inversion cu a wordo haci di e tram, hopi hende ta mire isola den Caya Grandi.

No obstante, e tram den promocion a trece mas cu cien mil turista adicional di barconan crusero.

“Esey ta loke nos a promove, nos a bay cerca nan, nos a convence nan e tempo ey y nos por mira cuanto esaki ta trece pa nos pais cu e inversion den e tram masha tempo caba a wordo paga”, e dignatario a expresa.

Sinembargo, nan tabata negociando y a tuma e decision cu for di entrante 1 di Januari 2016 den e aumento cu a wordo palabra, pa loke ta trata e barconan crusero bin Aruba, un dollar di loke ta wordo paga pa e personanan aki, ta bay pa e gastonan di Arutram, cu ta haci cu practicamente den 2017 e presupuesto di Arutram lo ta completamente balansa cu su gastonan compara cu e entradanan cu Aruba ta haya, si calcula mas of menos 700.000 pasahero pa e aña cu ta bin.

Un dollar pa cabes ta nifica casi 1.3 miyon florin y esey ta nifica cu practicamente e gastonan di Arutram ta wordo cubri ora door di e entrada aki, atravez di e “facility charge” cu lo wordo cobra na cada turista cu ta bin Aruba.

E mandatario a aclarea cu esaki no ta conta pa hende local ni turistanan cu no ta di crusero y cu ta permanece dentro di ciudad. Gobierno su intencion no ta pa carga nos hendenan pa subi tram.

E dignatario a agrega cu den e aumento cu ta bay tin pa e turistanan di crusero tambe tin un fondo cu ta bay pa e museonan pa asina mantene nan. Den e tax di entrada e turistanan di crusero lo haya ticket gratis pa drenta e museonan, mientras otronan si ta paga. Pues, tur cos ta un balansa pa genera entrada pa cubri e gastonan cu tin.

Locual tambe ta bay percura ta pa haci uso di e tram na un manera mas efectivo pa centro di ciudad, esta pa informacion valioso wordo duna abordo di e tram, y pa e no bira djis un vehiculo pa keiro sino tambe pa transporta e turistanan y zorg pa nan baha y no keda den dje pa bolbe bek. E dignatario lo envolve su mes cu e gerencia di Arutram pa wak con por haci esaki mas eficiente. Esaki ta encera cu e turistanan lo no por baha y bolbe subi e mesun tram, nan tin cu tuma otro despues cu nan cana den Caya.

Hunto cu esaki mester tin mas iniciativa di e propio comerciantenan pa haci cosnan atractivo den Caya. Por ehemplo cu Aruparking tambe, e dignatario ta kere cu su den un tienda nan ta bisa e cliente cu nan ta paga e prome mey ora di parkeer pe, e por imagina cu hopi hende lo tin e gana di haci compras awor cu ta facil yega na e centro di ciudad y cu e por haya un tipo di balor asina aki.

E dignatario a enfatiza cu aworaki mester haci uso di e facilidadnan cu tin, pa crea un mercadeo nobo. No por keda haci e mercadeo di binti aña pasa den un situacion completamente nobo cu tin un tram, cu Caya ta cera, y tin espacio pa staciona rond di dje.

El a subraya cu e organizacion BID cu tin aworaki mester traha duro hunto cu comercio, y Aruparking y cu sosten di gobierno, pa trece bek den Caya tur e hendenan cu hopi aña pasa a stop di bin den ciudad a prefera di bay den e comercionan cu tin den distritonan of mallnan mas accesible. Mester bolbe crea e bon ambiente den centro di ciudad, e dignatario a conclui.

 

- Advertisement -

DUNA COMENTARIO

Please enter your comment!
Please enter your name here