Home Editorial Editorial: 35 AÑA DIARIO

Editorial: 35 AÑA DIARIO

5
0
SHARE
- Advertisement -

Un pueblo, un lucha, un DIARIO

jossy_mansur_picDia 3 di November 1980 un corant netamente Arubiano a nace. El a haya e nomber DIARIO y te awe e ta den bo mannan pa bo huzga su calidad, su contenido y su mensahe. DIARIO ta un culminacion di un proyecto cu a surgi pa cumpli cu e anhelo di e pueblo Arubiano pa mira un corant na Papiamento imprimi ariba su propio isla.

E tempo ey e staff di redaccion di Agencia Arubano di Noticia tabata consisti di Sr. Jossy Mansur, Sr. Angel Kirchner, Sr. Juby Naar, Sr. Django Simoons, Sr. Richard Tromp, Sr. Harry Croes, Sr. Pedro Maduro , Sr. Toko Winklaar y Sr. Robby Burleson. Cu tempo e staf di personal a crece y awe ta consisti di un team completo caminda cada uno tin nan responsabilidad pa na final trece e producto DIARIO pa pueblo.

Pa produci un corant tur dia no ta nada facil pero e respaldo cu DIARIO a haya for di inicio a pone cu nan a sigui cu e meta y cu awe DIARIO a keda e corant mas grandi di Aruba, manera cu e tabata for di prome dia cu el a sali..

Hopi planificacion a acompaña e preparacionan pa Aruba tin su DIARIO. Tambe a percura pa un suma di 600 mil florin pa asina garantiza e funcionamento di e corant durante su promer aña.

Pueblo a acepta DIARIO notando su calidad y contenido pero principalmente su seriedad y afan pa lucha banda di Pueblo y sali na interes di Pueblo.

Durante 35 aña nos tarea tabata di observa cada desaroyo pa asina adverti na tempo. Aruba a wordo confronta cu tur clase di situacionnan peligroso. Awe ainda Aruba ta para na un cruzada. Y nos opinion ta conoci: Atrabez di tur plan cu por tin pa futuro, Aruba no por bay perdi, Aruba mester keda Aruba. Su identidad, su fundeshi, su mentalidad no por wordo bendi ni entrega. E no ta logro di un solo persona, sino di un ekipo cu ta eherce un gran esfuerzo pa pone den otro e matutino mas grandi cu henter e area di Caribe a yega di conoce. Pero ta e respaldo di Pueblo ta haci cu DIARIO ta sigui cumpli cu e exigencianan constante di mantene bon informa. DIARIO a custumbra Pueblo cu tur noticia di importanica tu ta sosode riba su isla, y ta for di su paginanan e ta obtene e exclusiva y primicianan pa cual e matutino aki di Pueblo ta conoci.

E file di nos lectornan ta asina grandi, cu pa gradici cada un di nan lo tuma por lo menos 20 aña mas pa cubri tur. Pesey, di curazon DIARIO ta gradici su sponsernan, nos personal tecnico, administrativo, arte grafico, redaccion, y sin lubida su lectornan pa nos keda mantene e titulo: DIARIO, e Matutino di Pueblo Arubiano. Awe cu orguyo nos ta cuminza celebra nos di 35 aña y sigur lo bay tin hopi plan pa celebra esaki tambe cu e Pueblo di Aruba cu durante e añanan aki a duna su sosten masalmente. Danki, danki y mas danki.

 

 

 

 

 

- Advertisement -

DUNA COMENTARIO

Please enter your comment!
Please enter your name here