Home Editorial EDITORIAL SISTEMA DI PARKEO: UN IDEA MALISIMO

EDITORIAL SISTEMA DI PARKEO: UN IDEA MALISIMO

2
0
SHARE
- Advertisement -

jossy_mansur_pic     Mi no sa ken a bin cu e idea absurdo di un sistema di parkeo asina complica. Poco hende ta compronde cabalmente con e ta traha y kendenan e ta faborece. Te awor a nota varios caso di ‘friends and family’, sistema cu DIARIO y AVP a critica severamente den pasado. Pero parce cu e sistema di faborecimento ey a haya bida atrobe y e ta hopi visible den e sistema di stacionamento cu a word implementa cu hopi fanfaria.

     Pa mi, mientras mas simple un sistema ta, mas acogida e tin den Pueblo, pasobra e ta compronde y e por bay di acuerdo cune. Pero e sistema di parkeo si a bruha hopi hende, pasobra tin un mashin cu mester usa, tin yen di bicicleta cu ta core rond pa controla, y faboritismo den e hoki nan pa para auto ta obvio na varios lugar. Diferente caso di faboritismo a ser reporta caba y nos ta na apenas e principio.

     Gobierno no ta teniendo na cuenta cu Pueblo Arubiano ta un Pueblo inteligente, y bon versa den politica, asina ta cu e no por pase un strike con cu ta. Pueblo ta nota di biaha kico ta pasando y unda henter e asunto ta bayendo, y esaki no ta bayendo den bon direccion .

     Con cu bo mire, e ta un mal regalo di Pasco pa Pueblo pasobra e ta pone mas stress den su caminda. Con bo por compare cu e proyecto fabuloso di linear park? E ta un proyecto cu Pueblo ta usa y sigui usa pasobra e ta mira utilidad den dje, pero e sistema di parkeo si tine completamente rabia pasobra e no ta mira su utilidad, y no sa pakico Gobierno a pone otro gasto mas riba su lomba. E tin demasiado caba!

     Con bo por haci e hendenan cu a bin cune compronde cu e ta un eror garafal? Cu e no ta pas cu e progreso cu Gobierno ta buscando y no ta atrae elogio sino puro critica? Tin varios otro Proyecto aceptable andando, pero esaki definitivamente no ta un di nan!

     Ki dia Gobierno ta bay bira mas consciente cu e placa cu e ta gastando, y dedik’e na proyectonan cu ta trece beneficio, no critica y rabia? Kizas un evaluacion serio y real di e prioridadnan cu tin pendiente por yuda dilucida e asunto.

     Di mi parti Gobierno tin por wel di manda Bermudez back Corsow y laga nos hendenan na Aruba mes maneha nos asuntonan directamente. Pa otronan e por ta un genio den economia, pa mi e ta un text-book economist cu hopi experiencia, pero te ey tambe. Nos mester mira padilanti no patras, y bay den e direccion ey, lubidando riba e politica di ‘friends and family’ pa semper!

- Advertisement -

DUNA COMENTARIO

Please enter your comment!
Please enter your name here