Aeropuerto cla pa “Super Weekend 2016” e siman aki cu 25.000 pasahero

Publication: Thursday, 31 December 2015. Categoria: General

ORANJESTAD (AAN): Aruba ta cla pa ricibi monton di pasahero!

Aña 2015 ta yegando su fin, pero Aruba Airport Authority N.V. (AAA) ya ta prepara pa e fin di siman di mas druk pa 2016 yama “Super Weekend” (2 y 3 di Januari 2016) unda ta spera mas di 25.000 pasahero pa worde procesa entre Diasabra y Diadomingo.

AAA tin basta tempo trahando duro y a finalisa cu diferente proyecto haciendo uso di tecnologia pa sigui automatisa su facilidadnan di Border Control cu un inversion di $2.25 miyon den gatenan di Automated Border Control y kioskonan di Automated Passport Control. Esakinan ta net na tempo pa por atende Super Weekend.

Gatenan di Automated Border Control:

Aeropuerto a instala gatenan di Automated Border Control (ABC) adicional pa e proceso di imigracion pa 14 e-gates; 6 pa yegada  y 8 pa salida US y Non-US. E ABC-nan lo permiti pasaheronan cu tin un e-passport pa worde procesa door di un sistema automatisa cu ta lesa paspoort cu ta conecta cu e sistema di border management di Imigracion local; y ta inclui e ultimo avance den reconocimento facial biometrico; mehorando dramaticamente e tempo pa procesa un pasahero. E ABC-nan adicional lo posiciona aeropuerto pa expande su proyecto cu a ricibi premio internacional Happy Flow, cu su partnernan Vision Box, Schiphol Group, KLM y Gobierno di Aruba.

Kiosconan di Automated Passport Control:

AAA a inverti tambe den e instalacion di 12 kiosco di Automated Passport Control (APC) mas den e area di US CBP pre-clearance; hibando e total na 22 kiosco despues di a instala exitosamente 10 kiosco di APC na December 2014 y e inversion a duna resultado impresionante, motivando aeropuerto pa sigui expande e programa.

Adicionalmente, e kiosconan nobo cu ta bin di e compania YVR Innovative Travel Solutions, awo ta inclui algun upgrade cu ta inclui reconocimento facial y e abilidad pa procesa esnan cu tin Visa, mehorando e seguridad general di e trabaonan di US border, y mehorando e experiencia di e pasahero.

“Den e añanan anterior, nos “high seasonnan” a worde asocia cu filanan largo na aeropuerto. Nos ta sigur cu e implementacion di gatenan adicional ABC y e kiosconan APC y e mehoracionnan den seguridad y eficiencia hunto cu e cooperacion di nos partnernan, lo percura pa un experiencia mehora na aeropuerto, specialmente durante Super Weekend” segun CEO di  AAA Sr. James Fazio.

Leave a Reply