Home General Aruba tambe ta sufri consecuencia di aumento nivel di lama

Aruba tambe ta sufri consecuencia di aumento nivel di lama

4
0
SHARE
- Advertisement -

Prome Minister Eman na Paris:

mike eman parisORANJESTAD (AAN) – Den un declaracion duna na Paris, Francia, Prome Minister Mike Eman a señala cu no solamente paisnan cu nombernan exotico den lamanan grandi leu aya ta wordo menasa pa e nivel di lama.

Aruba tambe, un parti di Reino Hulandes, ta wordo seriamente menasa. Esaki Prom Minister Minister Mike Eman a duna di conoce den e encuentro riba e tema climatico na Paris.

Manera ta conoci, Eman a bin ta bogando y pone atencion riba un grupo di islanan cu ta wordo yama SIDS cualnan ta esnan cu mas lihe ta haya problema door di e aumento di e nivel di lama.

Di e grupo di e islanan cu ta forma parti di SIDS (Small Islands Development States), segun Eman a bisa na e congreso, 52 ta wordo menasa directamente pa e aumento di nivel di lama.

“Pa algun e ta hopi agudo, y hasta di menasa pa bida. Pa Aruba e problema ta mas pa e area di costa unda cu nos tin 8 mil camber di hotel. E hotelnan aki ta situa riba un bunita linea costal, cu ta ubica solamente un meter riba nivel di lama.”

“Pues boso por imagina boso mes cu si e lama subi cu 30, 40, 50 of hasta 100 centimeter, hopi lihe e ta un reto hopi serio pa nos hotelnan. Hunto nan ta forma 80 porciento di nos economia.”

Si e nivel di lama creciente na Aruba ta un menasa pa e economia, pa e otro islanan, segun Prome Minister Eman a bisa, e ta un cuestion di bida of morto. “Na algun isla den Pacifico e pronosticonan ta cu den e proximo dies añanan e nivel di lama ta riba e nivel di e isla. Pesey nos e hendenan ta papia di muda pa otro pais. Asina serio e situacion ta.”

E islanan chikito ta traha hunto, pasobra nan tin hopi en comun. No solamente door di e cambio climatico, Eman a bisa. “Riba hopi di e islanan tin un monocultura, nos ta dependiente di importacion for di paisnan grandi y nos ta hopi vulnerabel pa horcanan y otro situacionnan di tempo cu tin biaha por manda e economia den un rato algun dies aña atras.”

Segun e publicacion, Prome Minister Eman ta reconoce cu su influencia riba e cumbre climatico no ta asina grandi. Pero e ta spera cu e paisnan cu si tin influencia, tuma e problema na serio y cambia lihe pa otro forma di energia.

Aruba den sigui ta trata di duna e bon ehempel. Asina el a menciona cu e isla kier ta completamente independiente di e energia tradicional pa 2020. “Na e momentonan aki Aruba ta produci 30 porciento di su energia for di fuentenan alternativa. Nos kier pa esaki crece yega na 2020 pa ta 100 porciento di fuentenan alternativa.”

 

 

- Advertisement -

DUNA COMENTARIO

Please enter your comment!
Please enter your name here