Home Hudicial E siman aki sentencia ta cay pa muher envolvi den labamento di...

E siman aki sentencia ta cay pa muher envolvi den labamento di placa

4
0
SHARE
- Advertisement -

Fiscal a exigi castigo di prison y multa di 100 mil

ORANJESTAD  (AAN) – E siman aki Corte den Promer Instancia lo dicta sentencia den un interesante caso di labamento di placa cu Ministerio Publico a cuminsa contra dos dama di cual un tabata casa cu un traficante S., kende ta deteni na Merca.

Tratamento di e caso aki a tuma lugar algun siman pasa den Corte caminda ta sospecha cu e muher V.R., ex casa di e traficante S., lo a inverti mas o menos 2 Miyon dollar den cumpra casnan y propiedadnan tanto na Aruba y Curacao y despues a haci negoshi cu esakinan door di huur y bende. E placa aki ta procedente di negoshi di droga cu ta data di 1996.

Asina Fiscal a expresa den sala di Corte. E acusacion contra e muhernan V.R. y L.Q. ta cu entre 1 Januari 2004 y Januari 2015, nan a laba placa door di huur casnan y bende casnan cu a wordo cumpra via offshore. E placa ta procedente di narcotrafico.

TRAFICANTE A BASHA ABOU NA DEA

Fiscal a bisa cu ora a cuminsa cu investigacion a constata V.R. tin un cantidad di casnan cualnan a wordo cumpra cu placanan di droga. Na 1996, V.R. casa cu un persona meti pisa den traficacion di droga. Na opinion di Fiscal, ta mas o menos 4 Miyon florin V.R. a inverti na Aruba y Curacao pa cumpra casnan y propiedadnan.

Fiscal a bisa Hues cu na September 2009, e agencia anti droga di Merca, DEA, a bati alarma cu e muher V.R. ta meti den narcotrafico. DEA a informa cu e informacion aki nan a haya di e ex casa di V.R., e homber S. deteni na Merca y cu lo ta investigando mas hende na Aruba.

ABOGADO A YUDA LABA PLACA

Na 2010 a cuminsa cu investigacion y a constata cu S. a inverti placanan tanto na Aruba como na Curacao. El a usa abogado mr. Braam pa lanta un offshore pa asina lo por usa e placa procedente di droga. Cu e offshore a cumpra casnan na Aruba.

Investigacion a mustra cu V.R. no tabata kier laga mustra cu e ta doño di e casnan. E tabata usa companianan pa cumpra e casnan. Fiscal a mustra cu for di abogado mr. Braam y otronan a haya sa cu ta V.R. ta esun y a lanta un compania na Curacao cu ta encarga cu e compra di e casnan na Aruba.

LABAMENTO DI PLACA

Ta asina cu a hasta haya declaracion di e homber S. deteni na Merca, kende a bisa cu el a manda droga Merca y e placa e tabata usa pa traha lechi di polvo y manda pa Venezuela. E placa cu e negoshi di lechi di polvo tabata produci, tabata wordo manda pa un banco na Swisa y despues e placa tabata wordo manda pa un banco na Alemania. Ta papia di mas o menos 2 Miyon Dollar. Na dado momento e banco na Alemania a ripara cu e transaccionnan ta sospechoso y a para esakinan. E ora ey e placa a wordo saca for di Alemania.

Fiscal a bisa Hues cu den e caso aki ta papia solamente di casnan cumpra na Aruba y no di Curacao. Ta asina cu V.R. a cumpra cas na Miami. Na Aruba el a lanta diferente companianan cu tabata encarga cu e casnan cu el a cumpra.

Fiscal ta haya cu e investigacion ta mustra bon cla cu V.R. a cumpra e casnan cu placanan di droga y despues a huur e casnan y hasta a bende diferente. V.R. y L.Q. tabata hopi bon amiga di otro. L.Q. a haya instruccion di abogado mr. Braam pa manda placa pa banco na Swisa. Fiscal a bisa cu a haya carta cu ta mustra esaki. Hasta a sali na cla cu e muher V.R. a pidi un compania pa traha document falso cu V.R. lo ta trahando pa asina e por habri un cuenta di banco na Aruba.

El a bisa cu a haya na cas di V.R., cantidad di documentonan cu ta mustra cu ta huur e casnan y hasta bende algun. Hasta el a pone cas riba nomber di otro persona pero ta V.R. ta e doño real. Fiscal a señala cu a constata cu V.R. tabata bende e casnan na prijs mas abou compara cu e prijs cu a cumpra nan.

Pa loke ta L.Q., Fiscal a bisa cu L.Q. tabata tapa pa V.R. na banco pa banco no tin un bista cla kico tur tabata sosode cu e placanan. L.Q. mester tabata sa cu e placanan ta procedente di droga cu V.R. tabata trece den circulacion.

Fiscal a mustra cu na 2002 a yega di interoga L.Q. caba relaciona cu un investigacion di laba placa pero asina mes el a sigui. Su funcion tabata substancial den e operacion aki. E tabata encarga cu e placanan di huur y bendemento di casnan. E tabata sa cu V.R. tabata casa cu S. cu ta sera na Merca pa traficacion di droga.

EXIGENCIA DI FISCAL

Fiscal ta haya ambos culpable di labamento di placa. El a bisa cu pa cu e castigo, e ta tene cuenta cu e periodo cu a laba placa y e cantidad di placa cu a laba placa. Na opinion di Fiscal, ta miyones cu a inverti y miyones cu a gana. Door di esaki placa criminal a drenta den economia di e pais. Tambe Fiscal a tene cuenta cu door di investigacion amplio a surpasa e periodo stipula pa ley cu 2 aña. Door di esey e ta reduci e castigo.

Fiscal a exigi pa L.Q. 10 luna di prison di cual 4 luna ta condicional cu un tempo di prueba di 2 aña. Ademas Fiscal a exigi un boet di 25 mil florin y si no paga lo mester bay 250 dia sera. Pa loke ta V.R., Fiscal a exigi 2 aña y 6 luna di prison. Tambe Fiscal a exigi 100 mil florin di boet y si no paga esaki, e lo mester bay 1 aña sera den prison. Fiscal tambe a pidi pa confisca autonan, placanan cu a haya di V.R. E casnan lo ta confisca y pa kita nan for di dje. Hues a keda di studia e caso y dentro di algun siman lo tin sentencia.

E siman aki Hues lo dicta sentencia y DIARIO lo informa lectornan kico ta decision di Hues.

 

- Advertisement -

DUNA COMENTARIO

Please enter your comment!
Please enter your name here