EDITORIAL: E Socialismo di Siglo bintiun

Publication: Tuesday, 29 December 2015. Categoria: Editorial

jossy_mansur_pic                Esaki ta un concepto o idea cu Hugo Chaves a lanza pa gana e adhesion di su seguidornan, primintiendo nan un estado utopico pa e siglo cu  ta bin, y cu durante cual tur miembro di ‘sociedad’ lo ta riba un nivel  igual di prosperidad. Como homber inteligente e tabata sa masha bon cu e idea tabata solamente un idea, cu e no lo por a realiza ni sikiera a medias, pasobra e mester tabata consciente cu su peor enemigo y mayor contrincante pa e logro ey ta e naturaleza humano mes.

                Den su forma mas simple, socialismo  ta un concepto filosofico cu ta pretende cu tur e medionan di produccion, y tur e produccion di un pais ta pertenece na su sociedad, o sea  na a e totalidad di su habitantenan, sea cual fuera nan capacidad productor o nan contribucion na e logro di dje. E ta un  eror di pensamento grave, pasobra te ainda no a existi y no por existi tampoco un sociedad, o conhunto di hende, cu tin un capacidad igual di produccion o di inteligencia entre tur su miembronan. Naturaleza no a crea y no por crea tampoco un paridad semehante entre sernan humano di diverso origen, raza, religion, preparacion y intelecto.

Pesey socialismo manera cu e ta ser practica na diferente parti di mundo no ta cumpli cu e promesa cu e ta encera, o sea e creacion di un prosperidad comun pa tur hende. E ta un ficcion politico usa pa e demagogonan cu kier seguidornan cu ta kere ciegamente den e proposicion ficticio di esun(nan) cu ta propague. E lidernan mes no ta kere den nan definicion o concepto di igualdad, sino cu loke nan ta busca ta e votonan y e lealtad di esnan cu no sa mihor  y ta kere den loke e lidernan ta bisa sin cuestionamento. Faltando e capacidad analitico pa analiza pa nan  mes e mentira envolvi den un promesa asina, tur loke ta keda nan ta kere loke e lidernan ta propaga y sigui ciegamente nan tras.

Na Rusia, por ehemplo, nunca socialismo a funciona pasobra despues di e revolucion popular loke a sosode ta cu pobreza a generaliza, no rikeza. E pueblo a keda mes pober y sin e posibilidad di mehoracion. Na Cuba e mesun cos a sosode; despues di Batista y cu e yegada di Fidel, e pueblo no a bira mas rico ni mas comodo, sino cu su situacion a keda mescos y a bin un generalizacion di pobreza o necesidad o con otro cu bo kier yame. Na Venezuela,  un pais super-rico, e proposicion di Chavez a termina pa generaliza e necesidadnan di e Pueblo. E no a crea e rikeza cu e concepto basico di socialismo ta ofrece. Un barido di caya no por ta nunca riba e mesun  nivel di un ehecutivo di un industria, pesey e diferencia social a keda mes grandi o a bira hasta mas grandi.

Pesey Pueblo mester keda cu su pianan bon planta na suela, y kere den loke ta posible, no loke e politiconan ta ofrece como remedi utopico. Nos tin e suerte cu nos Pueblo no ta kere den cualke lokera, sino cu e ta bon al tanto kico ta posible y kico no. Aki, mescos cu na tur otro partinan di mundo, naturaleza a crea su diferencianan entre e sernan humano cu ta habita nos isla, y ta a base di e diferencianan ey nos a siña biba den un sociedad di respet mutuo.

Leave a Reply