Home Editorial Editorial : UN BON TRABAO!

Editorial : UN BON TRABAO!

4
0
SHARE
- Advertisement -

jossy_mansur_picKen cu mira rond cu atencion no por scapa di e impresion cu di berdad nos ta bibando den un mundo cu a bira loco. E foconan di peligro a multiplica y a bira mas intenso. Nos ta mirando un movimento masal di refugiadonan batiendo na e portanan di diferente pais industrial en busca di un stabilidad cu por ofrece nan seguridad pa nan mes y nan famianan, y cu no ta existi na nan mesun paisnan. E no ta un situacion facil, y no por ofrece tampoco un solucion real y duradero pa problemanan asina grandi.

            Diferente pais Europeo a caba di pasa den un trauma similar di imigracionnan exagera y no tin e deseo di biba un repeticion. Hopi di nan ta man na cabez y no sa con libra nan mes di nan erornan di pasado corda asumi algun nobo. E crisis financiero cu a dal hopi economia benta abao ainda no a caba y diferente pais ta sigui lucha cune. Na Aruba, danki na e vision di Mike Eman y su ekipo di gobernantenan, nos a supera e crisis cu algun daño, pero ningun di nan severo. E tabata e momento pa escoge entre austeridad y inversion, o sea pone den servicio di comunidad loke tin di reserva o tene na dje y confia cu cosnan lo resolve nan mes riba nan mesun forzanan. Mike a opta contra austeridad na e momentonan ey, loke a produci un resultado positivo pa Aruba.

            Gobierno a escoge pone placa den circulacion, pa crea oportunidadnan di trabao, pa ehecuta proyectonan di labor intensivo, pa sprey loke tin entre e mayor cantidad di hende. Su decision a resulta esun adecuado, y nos por a scapa di mayor daño. Lubida riba welga di hamber y otro actonan pantayero, loke a duna resultado ta e decision (mescos cu esun di Merca) di aparta di austeridad y pone placa den circulacion via proyectonan di labor intensivo. E paisnan europeo cu a sigui e ehemplo di Alemania y Hulanda, o sea esun di austeridad, no a sali bon di dje, y den poco tempo a cambia pa esun di inversion y nan a cuminsa e proceso di recuperacion.

            Bo por ta di acuerdo cu Mike of no, esey no ta importante, loke tin balor ta e medida di e beneficionan cu nos a cosecha di su postura pro inversion. Es mas, mayoria di e paisnan Europeo cu a bay cu e idea di austeridad a cambia y awor ta tras di inversion y e beneficionan global cu e ta produci pa poblacion. Personalmente mi ta aplaudi e postura di Mike y su ekipo y ta desee hopi forza pa continua y conclui e labornan cu el a inicia pa saca nos di e problemanan severo causa pa e crisis economico-financiero di algun aña pasa.

- Advertisement -
SHARE
Previous articleCaricatura
Next articleDeporte

DUNA COMENTARIO

Please enter your comment!
Please enter your name here