Home Politica Evelyne Wever Croes a transforma MEP den partido di comediante

Evelyne Wever Croes a transforma MEP den partido di comediante

1
0
SHARE
- Advertisement -

Parlamentario Melvin Tromp

Evelyne Wever Croes a transforma MEP den partido di comedianteORANJESTAD(AAN)– Segun aprlamentario Sr. Melvin Tromp di AVP den un comunicado, MEP pa algun aña caba tin un lider nobo den persona di Evelyne Wever Croes y mientras cu ainda tur hende ta sperando riba e vision di e lider geel pa loke ta gobernacion di e pais, poco poco pero sigur pueblo ta tumando nota di e cambionan nobo den e partido cu Betico Croes a funda.

“Di un partido asina grandi cu historia asina amplio cu e partido aki tabata gosa di dje, MEP di Evelyne a bin ta transformando su mes den un organisacion politico cu ta duna mas impresion di ta un partido di comediantenan politico den tur sentido di palabra”,

esaki Parlamentario Melvin Tromp di fraccion di AVP a declara relaciona cu desaroyonan dentro y rond di e partido geel aki, cu manera el a menciona den su comunicado, simplemente ya no sa mas kico pa haci y ki rumbo nan kier bay.

“Lo mas tristo di e MEP nobo di Evelyne Wever Croes ta e hecho cu e politica cu nan kier hiba actualmente, ta como si fuera e partido no tin pasado politico y cu ta un partido cu recientemente a nace ora cu Evelyne a bira lider di e organisacion geel.

“Esaki a bolbe keda demostra e siman aki, ora c’un fraccion di MEP cu practicamente nunca ta completo, a para saca foto cu copia di un carta cu nan fraccion a dirigi pa Presidente di Parlamento, cu e peticion pa un reunion publico riba e asunto di cuentanan di awa di e compania WEB cu no a wordo paga na tempo.

“Ya caba vocero di e compania di utilidad aki a declara den prensa cu tin mal informacion cu a wordo duna ya cu no ta trata di 12 cas cu lo tin cuenta atrasa pero di un grupo di 2000 abonado.

“Pa fraccion di MEP esaki ta fiesta grandi y ora cu mira nan para hunto por ripara e sonrisa di alegria cu nan tin riba nan cara cu tin e tipo di situacionnan aki caminda MEP ta kere cu nan por saca probecho politico.

“Sinembargo aki atrobe e miembronan nobo aki di MEP ta den un partido cu nan no conoce su pasado ya cu ta durante di gobernacion di MEP den pasado, e compania WEB su administracion a cay asina atras den cobransa di recibonan di awa cu e compania a pasa pa algun tempo den un periodo sumamente delicado te ora cu a trece esaki bek na ordo,” segun e comunicado.

CURASHI

Parlamentario Melvin Tromp a sigui mustra cu Evelyne y su fraccion ta hunga weganan politico sin sentido sigura ora cu tur hende conoce e historia di e dirigentenan di MEP.

“Si nos mira bon, e fraccion aki ta parce un grupo di comediante cu ya no sa mas kico nan imita pa pone pueblo hari, y e ta pone nos pensa riba e comedia di e conocido artista di Corsou, Eligio Melfor kende a produci e obra di: “Esta un curashi.”

“Pueblo por a mira cu ta net Evelyne Wever Croes hunto cu Glenbert Croes ta tene e carta cu nan a manda cu e peticion pa un reunion publico riba e recibonan atrasa di awa, neglishando nan propio historia politico den MEP.

“Henter pueblo sa cu famianan di e dos politiconan aki, den un periodo di ocho aña di gobernacion di MEP, a haci negoshi cu caha di placa di pueblo y famianan cerca di nan dos a cobra algo mas cu 28 miyon florin na huurmento di edificionan y otro negoshinan, sin cu e tempo ey a pensa riba bienestar economico di e pueblo di Aruba.

“Ta mesun partido aki a introduci un ley di BBO pa cubri nan mal gobernacion di 3% cu nan final di cuenta a bira un aumento di 10% riba gastonan pa pueblo y net e partido aki awe kier defende e mesun pueblo cu a castiga nan pa e tipo di abuso aki.

“Esaki ta pone nos corda un cancion di e fayecido y hopi conoci cantante Arubiano, e legendario Cecil Grovel den feliz memoria, kende a yega di presenta un hit cu tabata bisa entre otro: “Bebe lechi lubida di cua baca nan a chi’ke,” segun e parlamentario di AVP cu ta termina bisando cu “ta increibel cu e hendenan aki, hunga interesante awor sin pensa riba pasado di nan propio partido.”

 

 

 

 

- Advertisement -

DUNA COMENTARIO

Please enter your comment!
Please enter your name here