Abogado mr. Carlo ta reacciona den Corte
ORANJESTAD (AAN): Abogado mr. Carlo a bisa Hues cu e no ta comparti e punto di bista di Fiscal cu su cliente Y.T. ta culpable di labamento di placa.
Manera DIARIO a publica, tratamento di e caso aki a dura oranan largo caminda Fiscal a exigi 3 aña di prison y tambe cu lo cuminsa un investigacion financiero pa kita propiedadnan cu segun Fiscal, Y.T. a cumpra cu placa di negoshi ilegal.
NO TIN LABAMENTO DI PLACA:
Mr. Carlo a bisa Hues cu su cliente a splica cu el a yega na su placa door di bendemento di auto, presta hende placa y cambio di Dollars.
E abogado a mustra cu Y.T. tabata presta hende placa y ta gana interes y tambe tabata cambia Dollars. Esaki ta worde considera (underground banking) pero segun decision di Corte Supremo, aunke cu esaki ta ilegal, e no por worde considera como labamento di placa.
Mr. Carlo a mustra Hues cu tin un sentencia di Corte den Promer Instancia riba underground banking, caminda e sospechoso a haya 134 dia di prison di cual 100 dia ta condicional cu un tempo di prueba di 2 aña y un boet di 10 mil Florin. El a mustra cu e persona ey a worde haya cu miyones y hasta tabata worde acusa di labamento di placa y e sentencia di Corte ta manera menciona.
E abogado a splica Hues cu Y.T. a splica cu su entrada principal, cu ta data di 2002 ta e cumpramento di auto y despues cu e caba drecha nan, ta bende esakinan caminda e ta haya ganashi.
E abogado a reacciona riba e ponencia di Fiscal cu keda sin yena papel di belasting ta castigabel. E abogado a mustra Hues cu keda sin yena papel di belasting no ta castigabel na Aruba. Loke ta castigabel ta si intencionalmente a yena informacionnan cu no ta cuadra cu e berdad.
Mr. Carlo ta haya cu no tin ningun prueba cu ta mustra cu Y.T. a haya placa door di negoshi ilegal. Pesey e ta haya cu tur e placanan confisca, autonan y pertenencianan mester worde debolbe na Y.T.
Na opinion di mr. Carlo, su cliente Y.T., mester worde declara liber di e acusacion di bendemento di droga pasobra no tin ningun prueba cu ta mustra esey. Y.T. a splica cu e ta un usador di marihuana y cu e ta traha thee y crema cu esaki. Pa e posecion di marihuana e ta kere cu segun ley ta entre 1 y 3 luna di prison Y.T. por haya.
Pa e posecion di arma, cual mr. Carlo ta considera cu ta trata aki di posecion pasivo di arma. E ta haya cu conforme cu ley, Y.T. lo mester haya 3 luna di prison condicional y un bulta di 2500 Florin, cu ta e castigo maximo cu por duna. E abogado a menciona caba cu tin dos Arubiano cu a haya e castigo aki ora a haya nan cu arma na nan cas.
Pa e acusacion di labamento di placa, na opinion di mr. Carlo no tin ningun prueba y pesey tambe mester declara Y.T. liber. E ta haya cu ya caba Y.T. tin 6 luna sera den prison y cu esey ta demasiado tempo.
Hues a bisa cu e ta bay studia e caso y dia 23 di December 2015 lo tin sentencia.
