For di 1 di januari lo mira un reduccion di 10% den gasto di coriente”

Publication: Thursday, 31 December 2015. Categoria: General

Minister di Energia Ing. Mike de Meza:

For di 1 di januari lo mira un reduccion di 10 por ciento den gasto di coriente”ORANJESTAD (AAN): Titular di Asuntonan Economico, Comunicacion, Energia y Medio Ambiente, Minister Ing. Mike de Meza hunto cu Prome Minister Mike Eman a anuncia cu entrante dia 1 di januari 2016 e tarifa di coriente pa uzo residencial ta bay conoce un rebaho di 10%. Esaki a sosode den un conferencia di prensa extraordinario for di Sala di Prensa di Gobierno di Aruba diaranson mainta 30 di december.

Naturalmente e logro aki di Gabinete Mike Eman II ta resultado di e trabou duro di, entre otro, Minister de Meza hunto cu Utilities Aruba N.V., WEB Aruba N.V. y Elmar N.V., cual directornan tambe tabata presente na momento di e anuncio.

E reduccion di un promedio di 10% den e tarifa ta conta pa schaal A1, A2 y A3 cu ta e structura di tarifa basa segun e consumo di cada cas; dus mas ta consumi, ta paga un diferencia un poco mas halto. Adicionalmente a compronde for di ehecutivo di Elmar N.V. cu e reduccion di tarifa aki ta conta tambe pa e usuarionan di sistema di coriente Pre Pago. Por ehempel, un cas cu tabata paga 400 pa luna, den su recibo di consumo di januari, esaki ta baha pa 360 Florin.

E mandatario a elogia e empresa di utilidad paso nan ta carga un responsabilidad grandi. A gradici tur personal y gerencia pa nan aporte. “Nos ta hopi contento cu esey,” Minister de Meza a expresa. “Ta hopi trabou a tuma luga pa yega na dje.” Cu hopi trabou ta referi na e hecho cu WEB Aruba N.V. tabatin su retonan sumamente grandi, pero awor e ta bek den un situacion hopi positivo.

Minister de Meza a bisa cu Gobierno ta keda moniteorea mercado internacional y situacion di e companianan y ta premira cu pa otro aña ainda lo por reduci un tiki mas aunke nan mester ta cauteloso cu esey. “Nos empresanan nacional mester keda saludabel y Gabinete Mike Eman ta para garantia pa esey,” asina Minister de Meza a enfatisa añadiendo cu no ta asina cu ta yega saca placa for di Web su presupuesto pa otro cos, pero loke tin di mas ta bay directamente pa pueblo den forma di rebaho.

T’asina cu, en berdad, awendia nos ta mira un caida den prijs di petroleo, pero asina mes tur pronostico ta keda para riba e punto cu prijs ta bay bolbe subi y nos mester ta prepara pa esey tambe. Pa tal motibo Gobierno di Aruba ta continua cu ehecucion di su vision pa bira menos dependiente di fuel oil pa produccion di energia. Ademas, WEB Aruba N.V. ta keda inverti den mantencion di su ekipo y red di awa y electricidad pa sigur un suministro confiabel.

Por ultimo, Minister Ing. Mike de Meza a felicita pueblo di Aruba cu for di 1 di januari lo mira un reduccion di 10% den su gasto di coriente y tambe a desea Aruba henter un feliz cambio di aña cu confianza cu Gabinete Mike Eman II ta sigui traha sin descanso pa bienestar di nos pais Aruba.

 

Leave a Reply