Situacion di arma di candela ta alarmante
ORANJESTAD (AAN): Aruba durante fin di siman a worde sacodi cu e lamentable caso di tiramento banda di Oude Molen. Ta sumamente lamentable cu un persona asina conoci y stima den comunidad, ta perde su bida den un forma asina horibel.
Den comunidad por scucha e rabia cu ta reina pa loke a sosode y tambe e anhelo pa Ministerio Publico baha mas pisa riba personanan cu ta cana arma sin permiso. Esaki sigur ta motibo valido pa Ministerio Publico cuminsa evalua su maneho y cuminsa baha mas pisa. Cada biaha ta scucha den Corte cu Ministerio Publico no ta tolera posecion di arma ilegal ya cu esey ta causa inseguridad den comunidad.
Actualmente hopi hende ta pensa hopi bon unda nan ta sali bay y si e lugar ta SIGUR. Ta diferente biaha a sosode cu hende inocente a resulta herida door di persona of personanan cu ta los tiro.
Recientemente personanan sinta den Misa San Francisco mainta tempran ta scucha tironan ta cay. A resulta cu hendenan den auto a pasa basha bala banda di Circle K y a herida un persona.
Ta unda nos ta bay! Kico ta pasando cu nos dushi Aruba?
PROBLEMA SERIO DI ARMA:
Tin un problema hopi serio riba nos isla. Esey ta e forma facil cu armanan ta drenta nos isla y e forma facil cu por haya arma cumpra. Cuanto biaha den Corte ta scucha sospechosonan bisa cu nan a cumpra e arma for di un Colombiano of Venezolano y nan no sa su nomber.
Con e arma a drenta nos isla? Con por ta posibel cu hobennan ta yega na arma manera ta pastechi nan ta bay cumpra.
E peliger di mas grandi cu ta existi, ta e hecho cu e mayoria di esnan cu tin arma ilegal, ta personanan cu sea kier sinti nan mes tof of ta personanan cu tin problema y tin cu “wak nan caya”. Hopi biaha e personanan aki no tin conocemento drechi kico ta un arma. Nan ta cumpra e arma pasobra nan ta worde bisa cu e arma ta bon. Pero hopi di nan por ta un biaha so a los un tiro cu e arma y esey ta tur. Nan ta kere cu mescos cu nan ta mira den peliculanan, por yega basha bala.
Esaki ta FULL FOUT. Un arma ta sumamente peligroso. Si bo djis sa e potencia di e arma y e daño cu e por ocasiona na hendenan inocente, bo ta pensa hopi si bo kier djis tene e arma den bo man.
MANEHO MAS SEVERO:
Ministerio Publico hopi biaha a bin cu e maneho di gracia pa asina personanan cu tin arma ilegal, por entrega esaki na warda di Polis sin ningun problema. E maneho aki NO ta funciona. Investigacion cu DIARIO a haci ta mustra cu hendenan tin miedo di bay entrega arma na warda di Polis. Pakico?
No ta manera Ministerio Publico ta bisa cu ta djis entrega e arma anto ta cla. No mi shon! E miembro di Recherche of e agente di Polis cu ta tuma e arma for di e persona, no por tum’e sin mas. E mester sa nomber di e persona. E mester sa ki tipo di arma e ta. E mester sa cuanto tempo e persona tin e arma aki. Pakico? Pasobra e miembro di Recherche of agente di Polis mester traha un raport cu el a haya e arma.
Tur e procedura aki ta haci cu esun cu kier entrega su arma ta dicidi di no bay mes warda di Polis y ta check un bende pa e arma.
Lo ta mucho mas mihor si Ministerio Publico introduci number cu hende por yama y notifica unda tin un arma benta of scondi. No ta importante pa se kende a yama. Importante ta pa saca e armanan for di circulacion. Polis of Recherche ta bay na e lugar indica, ta saca potret y ta notifica den su raport cu a base di un yamada anonimo a haya e arma.
E forma aki di actua sigur lo bay duna mucho mas mihor resultado cu loke e maneho di gracia ta duna.
Pa loke ta castigo, a bira tempo pa Ministerio Publico reevalua su maneho di castigo. Unavez cu haya un persona cu un arma di candela sea den auto of na curpa, no tin awa pa laba. E persona aki ta bay 1 aña sera. Si ta den un pelea a haya hende cu arma, mester subi e castigo na 2 aña di prison. Pa tiramento mester pone minimo 2 aña di prison. Si tin hende a resulta herida, ta considera esaki intento di mata y ta subi e castigo na 4 aña y 6 luna di prison.
Ora di casonan lamentable manera loke a sosode durante fin di siman, aki mester papia di 15 aña minimo. Aki ta claramente cu ta premedita o sea intencionalmente a bay tira. Ta door di hiba maneho severo asina, cada ken cu lo tin un arma, ta pensa hopi bon kico e lo bay haci. Ademas, door di e linea anonimo, por haya tipnan interesante cu por bisa kendenan tin arma.
Ministerio Publico, man na obra.
