Home Hudicial Persona haya cu arma di candela tin di presenta awe dilanti Hues

Persona haya cu arma di candela tin di presenta awe dilanti Hues

0
0
SHARE
- Advertisement -

ORANJESTAD (AAN): Awe mainta e persona A.S. mester presenta dilanti Hues pa duna cuenta pa e delito cu el a haci. Informacion cu DIARIO ta dispone di dje ta mustra cu e acusacion cu Ministerio Publico tin contra A.S. ta cu e tabata tin un arma di candela riba Pasco, esta 25 di December 2014.

Ta increibel cu riba Pasco, un dia cu rond mundo ta celebra como e dia di nacemento di Cristo Hesus, un persona ta haya ta bon pa sali cu un arma di candela.

POSECION DI ARMA DI CANDELA:

Ultimo tempo ta hopi caso di posecion di arma di candela ta worde trata den Corte di Husticia. Esey ta duna motibo di preocupacion pasobra ta hopi hende tin e curashi ta cana arma, sin tin permiso pa esaki. Mas peligroso ainda ta e hecho cu hopi di esnan cu ta cana arma, ni sa mes con pa realmente anda cu un arma.

Den Corte hopi biaha sa scucha e sospechoso bisa cu el a haya e arma cumpra y a djis los un tiro. Djis los un tiro, no kiermen cu bo tin dominio completo di e arma. Esnan cu tin conocemento di arma, ta tira diferente biaha cu un arma pa asina conoce e arma bon pa di e forma aki tin dominio di e arma. Tin dominio di e arma no simplemente kiermen cu bo sa tira bon. Tin dominio di e arma kiermen tambe cu bo sa tur e medidanan di seguridad cu mester tuma ora cu bo ta cana cu e arma y tambe cu bo ta conciente e peliger grandi cu e arma por haci y cu hende inocente por resulta herida.

CASTIGO:

Ministerio Publico ultimo añanan a introduci un ley caminda nan ta considera un persona gara cu un arma sin permiso pa esaki, como un criminal peligroso. Ta pesey tambe, cu e ley nobo, e persona cu worde gara cu un arma di candela, ta keda encarcela te ora cu e caso penal bin dilanti. A lo menos cu Hues Comisario ordena pa laga e persona liber. Asina mes e caso penal ta bin dilanti y e persona ta core riesgo cu e por bolbe bay sera.

A bin desaroyonan interesante den decisionnan di Corte Supremo na Hulanda pa cu posecion di arma di candela. Awor ta haci diferencia ora haya un arma warda na un cas cu ora a haya un persona ta cana cu un arma rond.

Ora Polis haci un investigacion na un cas y a haya un arma bon warda, esaki ta worde considera como posecion pasivo. Esey ta nifica cu e arma tabata warda na un lugar y no ta forma peliger directo pa ningun hende.

Ora Polis haya un persona cu arma sea den su auto of na su curpa, esey ta worde considera posecion activo. Esey ta nifica cu e persona intencionalmente a sali cu e arma y esey ta forma un peliger grandi.

Hopi biaha den caso di posecion pasivo, e sospechoso ta keda solamente algun siman of luna sera y despues ta sali liber. Den caso di posecion activo, Fiscal lo bay analisa otro factornan pa determina kico realmente tabata e intension di e persona cu e arma aki. Normal den casonan di posecion di arma, Ministerio Publico su maneho ta cu e castigo minimo ta 1 aña di prison.

Si a haya e arma carga cu balanan, e tabata cla pa tira, e persona ta un persona problematico, e persona tin problema cu otro of otronan, tur esakinan ta factornan cu por haci cu Fiscal por exigi mas castigo.

Durante tratamento di e caso lo mira kico tur lo bay pasa cu e sospechoso.

 

 

- Advertisement -

DUNA COMENTARIO

Please enter your comment!
Please enter your name here