Rebaho riba cuenta di coriente lo tin  impacto grandi

Publication: Thursday, 31 December 2015. Categoria: General

Prome Minister Eman :

riba poder di compra di e ciudadano

Rebaho riba cuenta di coriente lo tin  impacto grandiORANJESTAD(AAN): Compaña pa colega Minister de Meza, director di ELMAR NV sr. Henriquez y director di Utilities sr. Hoevertsz, Prome Minister Eman a haci un anuncio agradabel na vispera di un aña nobo.

Un anuncio cu ta faborece pueblo di Aruba henter, esta un rebaho di 10% riba cuenta di coriente entrante 1 di januari 2016 pa loke ta uzo residencial. Un bon comienso di e aña cu ya ta para dilanti porta. Un anuncio cu na mes momento cu el a keda anuncia a cay den bon tera.

“E anuncio aki tin un impacto importante riba e poder di compra di e ciudadano”. Eman a splica cu esaki a sosode a base di un peticion di e minister encarga y henter gabinete pa mira kico ta e posibilidadnan pa haci un evaluacion con e desaroyonan ta bayendo di prijs di combustibel y pa mira tambe e necesidadnan cu tanto ELMAR NV como WEB NV tin pa por keda opera den forma factibel, duradero y toch haci algo na e prijs di coriente.

“Un ehercisio intensivo a wordo hiba e ultimo simannan aki y reunion importante cu companianan di utilidad. Awe nos tin bon noticia pa comparti cu comunidad. Entrante januari 2016 e prijs di coriente pa uzo residencial ta bay baha cu un averahe di 10% den casi tur e diferente tarifanan cu ta conta pa casnan residencial.”

Eman ta haya cu esaki ta masha importante mirando cu gastonan di utilidad ta forma parti esencial di e presupuesto mensual di famianan di Aruba. E rebaho aki ta pas den filosofia di e gobierno aki. Desde un inicio a pone e prioridad pa traha riba recuperacion di poder di compra di e comunidad.

Asina a haci ahustenan di salario, tambe di onderstand, a mehora entrada di pensionadonan, a introduci reparatietoeslagen pa esnan cu entrada bou di Afl.2500, a introduci schoolkinderentoeslag y otro compensacionnan. Siman pasa ainda a anuncia un aumento di salario minimo di 2.5% entrante 1 di februari 2016.

“Tambe a trece bek indexering y aumento di voor- y najaarspremie y a reduci algun aña pasa caba prijs di awa y di coriente. A sigui algun ahuste pa motibo di cambionan internacional y awe nos ta anuncia atrobe cu ta baha prijs di coriente cu 10%”, Eman a splica.

El a felicita Minister de Meza pa e trabounan haci, mescos tambe compania di Utilidad, dirigencia di tanto WEB NV como ELMAR NV y e personal cu ta traha sumamente duro pa haci tur esaki posibel, mescos tambe nan esfuerso pa haci posibel transicion pa energia renobabel.

“Den combinacion cu aumento di salario minimo di 2.5% den e aña benidero, rebaho di prijs di coriente y un cantidad grandi di proyecto cu ta bay wordo desaroya, e potencial grandi di reapurtura di e refineria nos por bisa cu aña 2016 cada dia ta pintando mas positivo cu espectativa hopi grandi di un desaroyo socio-economico cu por wordo traduci tambe den un bienestar general pa henter comunidad”.

 

Leave a Reply