Roberto Rincon ta deteni na Houston

Publication: Monday, 21 December 2015. Categoria: General

E tin cas na Aruba:

Roberto Rincon ta deteni na HoustonORANJESTAD   (AAN): E comerciante Venezolano, Roberto Rincon Fernandez di 55 aña di edad, kende tin 8 compania registra riba su nomber na Merca y cu ta biba na Houston a keda deteni diasabra door di polisnan di DEA.

Ta acus’e di labamento di placa, specificamente den su negoshinan cu e refineria PDVSA na Venezuela. Rincon ta por lo menos un di e amigonan di Aruba cu a coopera den pone nos na mesa cu CITCO, cu tambe ta estableci na Houston.

Mester bisa cu aki na Aruba e comerciante a bira masha conoci, ora cu el a cumpra algun di e condominionan luhoso situa riba L.G. Smith Boulevard # 46, yama Coral Pyramid Aruba. No solamente esey, fiestanan cu el a yega di organisa den Hyatt Regency y otro hotelnan tabata spectacular, cu presentacion di artistanan internacional manera Juan Luis Guerra, Oscar de Leon y mas.

Tambe Roberto Rincon a bira conoci ora cu el a inverti den cumpra e edificio di e compania di glas situa na Barcadera. Ey el a haci su oficina principal, masha luhoso y bunita, aunke poco hende sa ki actividad ta tuma luga eyden. Tambe si e compania tin su clientenan na Aruba of ta un oficina pa empresanan situa na Merca, Venezuela, den Caribe y den Sur America.
Aña pasa, na mas di un ocasion e homber di confiansa di Gobierno Venezolano, esta Hugo “El Pollo” Carvajal tabata bini cerca dje y hasta tabata hospeda den e condominio di Rincon na Aruba. Es mas, dia cu Polis a detene na Aruba, riba peticion di DEA di Merca, tabata cu avion priva di Rincon cu El Pollo a yega nos isla. E mesun Roberto Rincon a intermedia hopi pa pidi libertad di Carvajal y hasta a trece un Vice Minister di Gobierno Venezolano cu a bin busca Carvajal for di nos isla.
Roberto Rincon ta haci negoshi cu PDVSA den cual e ta cumpra productonan y bende cu nan, entre otro taira pa truck. Ta estima cu precisamente den e tipo di negoshi aki mes el a sa di enrikese su mes.
Como cu e tin un bon relacion cu PDVSA, for di Aruba a haci uzo di su red di amistad y di negoshi pa por a yega na e compania petrolero y explora posibilidadnan pa bin establece riba nos isla. Ta conoci cu den pasado PDVSA a yega di bin Aruba caba y a mustra masha interes. Despues cu nan a regresa Caracas, nunca mas a tende di nan y asina e relacion a termina. Ta via otro canalnan, manera via Roberto Rincon, a logra yega na otro ehecutivonan cu a pone nos na mesa cu CITCO na Houston, te cu Gobierno di Aruba ta mas of menos un siman leu pa firma un acuerdo di principio pa compra of lease di e refineria.
E detencion di Roberto Rincon no tin nada di haber cu negociacionnan entre e ekipo di Aruba y Houston, comokiera cu Rincon no tin nada di haber den e acuerdo. E tabata un amigo di Aruba cu tabatin bon contacto cu a facilita e proceso na un principio, asina un fuente cerca di e negociacionnan a confirma.

 

Leave a Reply