Home Hudicial Sospechoso a bisa cu el a drenta cura di cas pa busca...

Sospechoso a bisa cu el a drenta cura di cas pa busca pida paña pa e haci su necesidad

0
0
SHARE
- Advertisement -

ORANJESTAD  (AAN) – Hues a cuminsa hari ora e sospechoso J.C., acusa di intento di ladronicia, a bisa cu e no a drenta e cas pa horta sino pa busca un pida paña pa e por haci su necesidad. Hues a bisa e sospechoso cu e no ta kere su storia y a conden’e na 110 dia di prison.

POLIS A SORPRENDE LADRON

Fiscal a bisa Hues cu e acusacion contra J.C. ta cu riba 11 September 2015, el a purba di horta na un cas na Pos Abao. Hues a puntra e sospechoso si ta berdad y J.C. a bisa cu e no a purba horta y no a drenta e cas. El a bisa cu el a bula den cura pa busca un paña pa e por haci su necesidad y limpia su curpa. Hues a cuminsa hari ora J.C. a bisa esaki.

Hues a mustra cu Polis a bisa cu a haya notificacion cu un hende tabata hortando na e cas. E habitantenan di e cas tabata den exterior y un bisiña a yama Polis. Polis a bay na e cas y a haya J.C. cu a core bay. Nan a haya un pata di cabra y cu tabatin un airco desarma y un frishidaire cla poni pa bay cun’e. Segun J.C. e ta kere cu Polis tin algo contra dje pasobra e no tabatin nada cun’e. Hues a mustra cu segun e procesverbaal di Polis, bisiña a bisa cu el a mira 3 persona na e cas tur na preto bisti ta desarmando un airco. Hues a mustra cu J.C. tin carchi di castigo largo cu diferente casonan di ladronicia.

J.C. a pidi Hues pa lag’e bay pa asina e pasa Pasco y Aña Nobo cu su famia. El a bisa cu otro aña e tin pensa di bay Hulanda. El a bisa cu den KIA e tin hopi problema. E momento ey e tabatin 86 dia sera. El a bisa Hues cu e ta traha mecanico y lo por haya trabou di biaha na un garashi caminda e tabata traha y e doño a bise cu tin trabou p’e.

EXIGENCIA DI FISCAL

Fiscal ta haya legalmente proba cu J.C. a purba horta. El a bisa Hues cu dos agente di Polis a mira un homber core sali for di e cas y a core su tras y a detene J.C. Na e cas tabatin un frishidaire y airco cla pa wordo hiba. Na opinion di Fiscal, e ta considera esaki ladronicia haci caba. Pa cu e castigo, el a bisa Hues cu e ta tene cuenta cu J.C. tin diferente condena pa ladronicia. Ultimo condena tabata 2014 y na J.C. su beneficio door cu e sentencia no a wordo firma no lo pidi impone castigo condicional.

Fiscal a bisa cu door cu e ta considera J.C. un residivista, el a exigi 9 luna di prison. El a bisa Hues tambe cu ladronicia di cas ta causa inseguridad den comunidad. E ta haya cu mester manda señal bon cla cu no a tolera esaki.

ABOGADO

Mr. Mohamed a bisa Hues cu J.C. a bisa kico a sosode. Hecho ta cu e bisiña a mira 3 persona. No por bisa cu J.C. tabata un di e personanan. Polis a mira J.C. ta core bay y no por bisa cu ta J.C. a horta e frishidaire y airco. Polis a mira J.C. cu pata di cabra pero J.C. a bisa cu e no tabatin nada den su man. E abogado a remarca cu for di e cosnan cu a haya, no tin ningun potret di pata di cabra. J.C. a bisa cu e tabata eynan pero no a horta.

Na opinion di abogado, J.C. no ta un choller y no ta blo horta. E ta haya straño cu e agentenan di Polis ta mira un persona so ta core bay y no ta mira e otro dos ya cu ta 3 persona lo tabatin den e cura di cas manera e bisiña a bisa. E abogado a bisa Hues cu por bien ta cu e tres a core bay y net J.C. a yega pa busca un pida paña. Na e opinion di e abogado, e pregunta ta si por papia di ladronicia. E articulonan ainda tabata riba e tereno pues aki ta un intento y no ladronicia manera Fiscal ta pretende. El a bisa Hues cu J.C. por traha y J.C. ta esun cu ta percura pa mantencion di famia. E por haya trabou bek na e garashi unda e tabata traha.

SENTENCIA

Hues a sera tratamento di e caso y a pospone e caso un rato pa pensa. Despues di un rato el a bolbe y a dicta sentencia di biaha. Hues a bisa cu e ta haya intento di ladronicia proba y no ladronicia manera Fiscal ta bisa. Hues a mustra cu un rato despues di e ladronicia a haya J.C. Hues a bisa cu e no ta kere e storia cu a bay riba tereno pa busca pida paña pa limpia curpa.

Hues a tene cuenta cu e carchi castigo di J.C. y a conden’e na 110 dia di prison, kitando e tempo cu ta sera. Esey ta nifica cu promer cu pasco e lo bay cas.

 

- Advertisement -

DUNA COMENTARIO

Please enter your comment!
Please enter your name here