Home General Despues di mas cu 70 aña Colegio San Augustin a worde renoba

Despues di mas cu 70 aña Colegio San Augustin a worde renoba

0
0
SHARE
- Advertisement -

Minister Hooyboer-Winklaar:

ORANJESTAD (AAN): Colegio San Augustin MAVO ta un school secundario conoci pa su bon resultadonan. Apesar di e condicion fisico malo cu e school tabata aden, e experiencia cu e school ta uno hopi bon y den e ultimo añanan por a tende e nomber di e school y diferente studiante resona durante di celebracion di e miho graduadonan di Aruba.

Pa mas cu 70 aña di existencia di Colegio San Augustin, nunca e school a worde renoba. Pa hopi aña su edificionan tabata den un condicion no optimal pa duna y tuma les. E falta di bon mantencion y renobacion tabata tin efectonan grandi riba e infrastructura di e school. Pero, tur cos a cambia na maart 2015, ora cu porfin a logra pone tur planning y financiamento riba un liña y a cuminsa cu e renobacion y expansion cu e school aki tanto tabatin mester di dje.

E compania Van Kessel a gana e destaho publico, bow di guia y supervision di DOW, ta yegando den su fase final. Un proyecto total di mas o menos 3.2 miyon Florin cu a worde financia door di FDA. E renovacion ta conta cu un cantidad nobo di espacio pa ambos e alumno y docentenan por eherce nan necesidadnan durante cu nan ta na school.

Recientemente, Minister di Enseñansa Michelle Hooyboer-Winklaar a bishita Colegio San Augustin pa mira e progreso di e trabaonan andando. El a observa cu tabatin partinan di e edificionan cu a worde basha abao, y mester a cuminsa “from the ground up”, pero e resultadonan ta papia pa nan mes. E renobacion y expansion di Colegio San Augustin ta progresando asina lihe y ta bayendo asina bon cu e docente y alumnonan, hunto cu e personal di sosten lo por cera e aña escolar actual den nan propio edificionan.

“E school no ta cla ainda, pero e diferencia ya ta asina visibel. Cu kantoor y klas lokaal adicional, bibliotheek y computer kamer completamente nobo. Mi no por warda pa wak e cara di e studiante y e docentenan riba e prome dia cu nan cuminsa school back den nan propio edificio”, e mandatario a bisa.

Ainda e fecha exacto cu e school ta keda cla no ta confirma, pero ta premira cu esaki lo tuma lugar di e proximo lunanan nos dilanti. Un beyesa di school den curason di San Nicolas, tanto den resultado di su alumnonan y awo tambe fisicamente, Colegio San Augustin ta un di e elementonan cu ta contribui na e sentimentonan di e orguyo den su districto.

Minister Hooyboer-Winklaar ta sumamente contento cu e progreso di e MAVO mas bishita na San Nicolas, y cu e por ta parti di e proceso di upgrading di e parti fisico di e school cu a pone nan stempel di calidad den enseñansa na Aruba. E mandatario a bisa cu e lo bishita e school algun biaha mas den e proximo lunanan.

 

- Advertisement -

DUNA COMENTARIO

Please enter your comment!
Please enter your name here