Home Hudicial Cinco aña di prison exigi pa asaltantenan di Excelsior Casino

Cinco aña di prison exigi pa asaltantenan di Excelsior Casino

0
0
SHARE
- Advertisement -

Ningun hende sa unda tur e placa ta

ORANJESTAD (AAN): Fiscal ayera mainta a condena totalmente con e asalto arma a tuma lugar den Excelsior Casino na Holiday Inn Hotel. El a exigi 5 aña di prison pa e trio Venezolano.

Tratamento di e caso aki a dura te den oranan di atardi. Parti mainta, Hues a repasa e procesverbaal y na dado momento, door di señalamento di abogado mr.Bryson pa e forma con su cliente, e Arubiano A.A. a worde interoga, Hues a dicidi di pospone e caso contra A.A. y e Arubiano V.G., pa laga Hues Comisario interoga e dos miembronan di Recherche.

Den e articulo aki, DIARIO ta concentra riba e caso di asalto y den un otro articulo riba e interogacion di e miembronan di Recherche y e caso contra A.A. y V.G. cu a keda posponi.

E sospechosonan V.B., J.C., C.I., A.A., F.C., V.G. a presenta den Corte pa e caso penal cu Ministerio Publico a cuminsa contra nan. Tabatin basta hende den tribuna presente. E mayoria ta empleadonan di e casino, cu tabata trahando na momento cu e asalto arma a sosode dia 26 di October 2015.

Di e sospechosonan: C.I., J.C. y V.B. ta di Venezuela. A.A., F.C. y V.G. ta di Aruba.

ACUSACION

Fiscal a bisa cu e acusacion contra e tres Venezolanonan ta mesun cos. Nan ta worde acusa cu dia 26 October 2015, nan a haci asalto arma na Excelsior Casino na Holiday Inn.

Fiscal a sigui bisa cu A.A. ta worde acusa di complice di e asalto. Tambe e ta worde acusa cu na November 2015, e tabatin matanan di marihuana.

E sospechoso F.C. tambe ta worde acusa di complice di asalto. Ademas e ta worde acusa cu entre 1 Maart 2015 y 25 October 2015 e tabatin un arma di candela.

V.G. tambe ta worde acusa di ta complice di e asalto. Subsidiario, Fiscal ta acusa V.G. di a provoca e asalto.

ASALTO CASINO:

Hues a mustra cu segun e procesverbaal di Polis, dia 26 di October 2015, Polis a worde notifica di un asalto arma na Excelsior Casino na Holiday Inn. Na e hotel e empleadonan a haci denuncia cu 3 hende a drenta e casino y esun mas chikito tabatin un pistol. El a bisa: “Atraco y si yama Polis lo mata boso”. Nan a mara e empleado cu tied rap y esun cu pistol a dal diferente cu pistol na cabez. Nan tabata kier sa unda e caha fuerte tabata y e yabinan. Esun mas chikito a bira mas agresivo y bisa cu lo mata tur. Un empleado a hiba nan na di dos piso pa coy yabi y den dos tas nan a hinca e placanan.

Ta asina cu diferente di e empleadonan a worde gedal cu e cabo di pistol door di e asaltante Venezolano chikito. Mas cu 494 mil Dollar a worde horta for di e casino. Tin imagennan di camera di seguridad caminda por mira ora asaltantenan a drenta e casino y agredi algun di e empleadonan.

BIN ARUBA PA HACI ASALTO:

Investigacion a mustra cu e tres asaltantenan ta e tres Venezolanonan. Nan a admiti di a haci e asalto. Hues a mustra cu C.I. a bin Aruba na April 2015 pa busca trabao y segun e declaracion di C.I. na Recherche, un tal Arturo a bin cu e idea pa e asalto. Arturo a introduci C.I. na un tal Anthony kende a hib’e na cas di ex trahador di casino, kende tabata busca hende pa haci e asalto. Hues a mustra cu na Recherche C.I. a declara cu e persona den e cas su nomber ta V.G. Ariba pregunta di abogado mr. Zara, segun C.I., ta Arturo a percura pa paga pa huur di e autonan y placa pa J.C. y V.A. por bin Aruba.

Ta asina cu C.I. a bisa J.C. y V.A. pa bin Aruba pa haci e asalto. El a haya un mapa di e casino. Segun C.I., A.A. a bisa cu e sa un persona, F.C., cu ta bende un arma. E arma a costa 1000 Dollar y door cu e tabatin menos placa , el a duna y a duna F.C., tres holoshi y dos carton di sigaria.

Ta asina cu e Venezolano J.C. tabata esun cu e arma. Despues di e asalto e asaltantenan a topa cu A.A. na e lugar palabra y a bay den auto cu A.A. El a duna A.A. 1000 Florin y a laga e arma den e auto.

A HIT ASALTANTENAN:

Nan a bay na un cas caminda y a habri e tasnan y conta placanan. E suma tabata 205 mil Dollar, 105 mil Florin y 6 mil Euro. A pone e Dollarnan den un tas y un tal Rosa a bay sconde esakinan. A duna Rosa 4 mil Florin pa regla lugar di keda. Segun C.I., e mester paga un tal Andres 22 mil Florin pa haya lugar di sconde. Andres a trece e tas cu Dollar pero falta 27 mil Dollar. Despues C.I. a hinca e Dollarnan den un otro tas. Andres a regla boto pa nan bay Venezuela pero mester a paga 45 mil Florin. Segun C.I., Andres a hiba nan tres na un cas bandona y ora C.I. a mira cu nada ta resulta, el a yama 911 y despues a kibra e cellular y bent’e afor. Hues a puntr’e pakico a kibra e cellular. Segun C.I., e tabata nervioso. C.I. a bisa Recherche cu A.A., F.C. y V.G. tambe ta envolvi.

J.C. a bisa cu el a bin Aruba hunto cu V.A. Hues a mustra cu J.C. a declara cu a cumpra e arma un dia promer y cu e tabata esun cu e arma. J.C. ta esun cu a kita prendanan di empleadonan y cellular. Hues a puntr’e pakico el a haci esey. El a bisa cu el a hacie pa nan no yama Polis. Hues a bisa cu J.C. tabata esun mas agresivo. Segun J.C. e tabata nervioso. El a desmenti cu a dal e personanan cu cabo di pistol sino cu su man. Segun J.C. si el a dal nan cu e cabo di pistol nan a sangra y esey no ta e caso. Hues a bisa cu riba camera por a mira con e tabata maltrata nan.

V.A. a declara cu el a worde yama pa C.I. pa bin Aruba pa haci e asalto. El a desmenti esey dilanti Hues. Segun V.A., C.I. a bis’e cu e tin un trabao p’e y cu lo gana bon placa.

A.A. yama Rasta, a declara cu e ta usa marihuana y bende. El a bisa cu e tabata gana mas o menos 200 Florin pa dia. Via su bisiña Anthony, a drenta den contacto cu e Venezolanonan. Hues mustra cu A.A. a declara cu el a conoce un ex trahador di casino V.G. y unda e ta biba. A.A. a bisa cu el a mira V.G. den paña di controlador di casino. A.A. a bisa Hues cu e no a declara asina. El a desmenti cu V.G. a pidi cu e tin un trabao y cu e mester di 2 persona. El a desmenti tambe cu e a regla arma pa e Venezolano. Segun A.A. esey ta cosnan cu Recherche a bis’e cu e Venezolano C.I. a declara. Ta asina cu A.A. a bay busca nan na e ex Atlantis Hotel despues di e asalto y laga nan den vecindario di Topcar na Playa. Hues a remarca cu na Recherche A.A. a duna declaracion detaya y awor ta bisa cu no ta asina. Despues di e asalto A.A. a papia cu V.G. kende a bisa cu el a duna e Venezolano un mapa di e casino y si e no haya su parti e lo bay mata hende. Ariba pregunta di abogado mr. Bryson, A.A. a bisa cu e mester a firma y despues Recherche a hibe su cas pa e wak su yiu. Tambe cu Recherche a hib’a su yiu warda di Polis pa presiona A.A. pa e papia.

F.C. a admiti di a bende e arma cu e Venezolano C.I. kende a yame. El a bisa cu el a cumpra e arma na Maart 2015 cu 9 bala y a los un tiro di test. El a bende e arma cu 8 bala. El a bisa cu el a bende e arma pero no tabata sa cu nan lo bay haci un asalto. E holoshinan, el a empeña y a bende e cartonnan di sigaria. F.C. a declara cu despues el a mira A.A. cu e arma. Esey tabata e dia di e asalto y A.A. a dun’e 500 Florin cu ta placa cu e Venezolanonan a priminti pa e arma.

V.G. ta desmenti di tabata envolvi den e asalto. El a bisa cu tabata traha na e casino como controlador di casino. El a bisa na Juli 2015 el a bira malo y a bay Venezuela pa tratamento medico. Ariba pregunta di abogado mr. Lejuez, el a bisa cu e ta traha controlador na diferente casino y ta cuminsa traha 9 pm ora e casino habri. El a bisa cu e no ta bay tempran pasobra nan no ta lag’e drenta pasobra nan ta preparando e casino. El a desmenti di sa kico ta sosode den casino. E empleadonan di casino den tribuna tabata hari y sacodi cabez, mustrando asina cu V.G. ta gaña.

SCUCHA TESTIGO:

Hues a bisa cu e kier scucha C.I. como testigo contra A.A. y V.G. El a hala C.I. su atencion cu si e gaña e por haya castigo te cu 9 aña di prison. Hues a puntr’e cu si loke el a declara na Recherche ta e berdad of no. Segun C.I. el a bisa e berdad. Hues a mustra cu C.I. a declara cu A.A. a dun’e un mapa di e casino. Riba e mapa tambe C.I. a skirbi cuanto persona lo tabata den casino e momento ey. Segun C.I., A.A. a bis’e cuanto persona lo tabata den e casino y ki ora nan ta yega na casino. C.I. a bisa cu A.A. a bis’e cu el a haya e informacion for di un persona cu ta traha den casino. Segun C.I. el a reconoce e nomber V. como esun cu A.A. a menciona.

C.I. a bisa cu e conoce Anthony y Arturo pero no conoce V.G. y tampoco F.C. El a confirma cu el a duna A.A. 1000 Florin despues di e asalto y a laga e tas atras den e auto pa benta afor. Segun C.I. ta Anthony y Arturo ta esnan cu a bin cu e plan. Segun C.I. el a duna tur e placa na Andres pero no a mir’e mas. El a dun’e nan maletanan, nan cellularnan.

DEMANDA:

Abogado cu ta representa casino, a presenta demanda pa gastonan cu mester a haci di reparacion di cosnan cu nan destrui. E cantidad di placa cu a horta for di e casino, lo worde haci den caso civil. E demanda ta 2400 Florin. Un empleado a haci demanda pa su cellular 1999 Florin y holoshi 297 Dollar.

EXIGENCIA DI FISCAL:

Fiscal a bisa cu e ta haya legalmente proba cu e tres Venezolanonan a haci asalto 8.15 di anochi riba 26 di October 2015. Tambe e ta haya proba cu F.C. a bende e arma di candela cu nan a usa den e asalto. For di empleadonan por a compronde cu no ta habri e casino tempran pasobra mester saca placa for di e slotmachinenan. Fiscal a señala cu e asaltantenan a mara e empleadonan. Un di e asaltantenan, J.C., a dal 4 di e empleadonan cu pistol na cabez. Casi mey miyon Florin nan a bay cune y prendanan di empleadonan. Na opinion di Fiscal, ariba imagennan di camera di seguridad por a mira con e asalto a tuma lugar. A reconoce e tres Venezolanonan y asina a detene nan riba 1 November 2015 despues cu un yamada anonimo a drenta na Polis. Tur tres a admiti di a haci asalto y cu a bin Aruba special pa esaki.

Na opinion di Fiscal, cu intermediacion di A.A., C.I. a cumpra e arma di candela for di F.C. E sospechoso F.C. a cumpra e arma na Maart 2015 pa 1200 Dollar y a bende cu C.I. Nan a priminti mas placa pa a bende. Despues di e asalto A.A. a hiba 500 Florin pa F.C.

Na opinion di Fiscal, F.C. ta bisa cu e no tabata sa cu a bay haci asalto pero si e tabata sospecha cu ta algo no legal lo bay sosode pasobra sino ken ta bay cumpra un arma asina urgente. Fiscal a sigui bisa cu ta A.A. a yama F.C. y bise cu tin tres Venezolano ta buscando arma cu urgencia. Fiscal ta haya cu F.C. a tuma riesgo cu nan lo bay haci algo contra ley y pesey e ta hay’e ta complice, no di e asalto arma, pero di ladronicia cu violenica. Tambe Fiscal ta haya F.C. culpable di posecion ilegal di arma entre Maart 2015 y October 2015.

Fiscal a bisa Hues cu tin tres fugitivo esta e homber A.B., un muher y un otro homber. A pidi nan detencion den exterior. Fiscal ta spera cu esaki lo keda realiza. El a bisa Hues cu e ta haya cu mester aproba demanda di daño di parti di casino y e empleado di casino.

Pa loke ta castigo, Fiscal a exigi pa e trio Venezolano V.A., C.I. y J.C. 5 aña di prison. Fiscal a splica cu normal e castigo mester ta 6 aña pero el a tene cuenta cu nan a coopera cu e investigacion y cu nan ta arepenti di loke nan a haci.

Pa loke ta F.C., el a exigi 3 aña di prison. Awor Hues lo bay studia e caso y dentro di algun siman lo por spera sentencia.

 

- Advertisement -

DUNA COMENTARIO

Please enter your comment!
Please enter your name here