Home Hudicial Fiscal y Hues no ta kere storia di sospechoso cu tabata core...

Fiscal y Hues no ta kere storia di sospechoso cu tabata core auto horta

0
0
SHARE
- Advertisement -

ORANJESTAD (AAN): Ni Fiscal, ni Hues a kere e storia cu e sospechoso J.H. a duna na Polis. Ta asina cu ayera mainta e homber J.H., no a presenta den Corte. Fiscal a dicidi pa trata toch e caso. E acusacion cu Fiscal a presenta contra J.H. ta cu riba 3 December 2015, e tabata core un auto cu tabata horta. Fiscal ta haya cu J.H. mester tabata sa cu e auto horta. E ta haya J.H. culpable di incubrimento.

Hues a mustra cu e auto di huur tabata staciona na Casa del Mar. Polis a mira e auto pasa su dilanti y cu e chofer tabata actua nervioso. Nan a sigui su tras y a surgi un persecusion caminda e chofer a bay dal contra acera di caminda. E agentenan di Polis a detene J.H. y a constata cu e switch di auto tabata kibra y e plachinan di number di e V- auto mes tabata riba asiento na banda. Fiscal a mustra cu e carchi di castigo di J.H. ta data di 2005. Tin diferente caso penal cu a worde hala aden.

EXIGENCIA DI FISCAL:

Fiscal a bisa cu e ta haya legalmente proba incubrimento intencional. El a bisa Hues cu Polis a persigui e sospechoso pa basta rato y nan a mira cu J.H. tabata su so den e auto. Door cu e auto a dal contra acera, e auto a bin para y asina Polis a saca J.H. for di e auto. Fiscal a bisa Hues cu e no ta kere e storia di e sospechoso cu e tabata patras sinta y un otro hende tabata stuur. Na opinion di Fiscal, Polis a haya J.H. tras di e stuur. Pa cu e castigo, Fiscal a bisa cu e ta tene cuenta cu e carchi di castigo y cu e sospechoso a sinta 26 dia caba pa e caso aki.

El a exigi 60 dia di prison kitando e 26 dianan y e resto esta 34 dia ta condicional cu tempo di prueba di 2 aña. E auto a bay back pa e carrental.

DEFENSA ABOGADO:

Abogado mr. Kok a mustra cu e sospechoso a bisa cu ta un otro persona tabata stuur e auto y e tabata sinta patras. Door cu e auto a dal, el a perde conocimento y a bay cay dilanti den e auto y ora el a spierta e tabata deteni. E abogado a bisa Hues cu e ta haya cu falta di investigacion di parti di Ministerio Publico. Con por sa cu tabatin un persona so si e auto tabata glas getint y tabata anochi. E abogado ta haya cu mester a confronta Polis cu e situacion. Na opinion di abogado, e chofer lo por a Sali core bay mientras cu Polis a acerca e auto na banda di pasahero. E ta haya cu si a busca pa mira riba cameranan den vecindario, lo por a mira si tabatin otro persona a sali core bay. Awor tin declaracion di e sospechoso contra di Polis. E sospechoso ta bisa cu tin otro chofer. E sospechoso a bisa cu el a haya un lift y no sa nada di auto horta. E abogado ta haya cu no por culpa e sospechoso di incubrimento intencional. El a remarca cu Polis no a haci investigacion si tin fingerprint di e sospechoso riba stuurwiel. Pesey el a pidi Hues pa declara e sospechoso liber. El a bisa cu actualmente e sospechoso ta na cas di su mayornan y ta riba e bon caminda.

Fiscal a reacciona cu tin tres agente di Polis a traha un procesverbaal kico nan a experencia cu detencion di e sospechoso. E motibo cu nan a persigui e auto no ta solamente pasobra cu no tin number dilanti sino cu e glas robez patras no tabata tey. A mira solamente un persona den e auto. A persigui e auto pa basta largo y a mira auto bay dal contra acera y despues para keto. Ningun a mira cu un hende a Sali core bay for di e auto. Pesey Fiscal no ta kere e declaracion di e sospechoso. Fiscal a remarca cu si tabatin un otro persona den e auto, Polis lo mester a mira esaki. Tur tres a baha bay na e auto y a mira solamente e sospechoso den e auto y a sak’e for di e auto pasobra e no tabata kier a worde deteni.

Fiscal a bisa cu e ta comparti punto di bista di abogado cu por a haci mas investigacion den e caso aki. Sinembargo na dado momento Polis mester pone prioridad den investigacionnan. Tabatin casonan serio cu mester di prioridad y pesey a traha e procesverbaal cu pa Fiscal ta suficiente pa mustra cu e sospechoso ta culpable.

SENTENCIA:

Hues a sera tratamento di e caso y a dicta sentencia di biaha. El a bisa cu e ta haya legalmente prueba incubrimento. Hues a bisa cu no tin motibo di duda den declaracion di Polis. Nan a mira un hende so den e auto y no a mira ningun otro persona core bay. Hues a bisa cu no ta kere declaracion di e sospechoso cu tabatin un otro hende ta stuur. Hues a condena e sospechoso igual na loke el a sinta caba esta 26 dia di prison.

 

- Advertisement -

DUNA COMENTARIO

Please enter your comment!
Please enter your name here