Home Policial Sin ningun provocacion un Pitbull a sali y morde dama nuebe biaha...

Sin ningun provocacion un Pitbull a sali y morde dama nuebe biaha na su pecho

0
0
SHARE
- Advertisement -

El a mata un Chihuahua…

ORANJESTAD   (AAN): Un caso hopi serio a sosode na Sero Patrishi diamars mainta algo pasa di 7’or, un atake feroz riba caya, unda un dama a keda cu varios mordi mahos na su curpa, y su mascota chikito a keda morto.

Tur dia e dama aki ta sali mainta pa cana cu su cacho chikito, un Chihuahua, den caya. Semper ta haci esey sin problema, y sin busca problema, ni provocacion cu ningun hende.

Diamars mainta net e ta canando bek pa su cas, inesperadamente nan a wordo ataca. Un Pitbull color blanco y preto, a haya porta di cura habri, y sin ningun clase di termento, ni provocacion, ni nada… el a djis bin linea recta riba e Chihuahua.

Mesora e dama a busca forma pa stop e Pitbull y pa rescata su Chihuahua. Pero esey a resulta malisimo pa e dama, pasobra e Pitbull e ora ey a bira y cuminza ataca e dama indefenso, morde na como 9 biaha na su pecho.

El a cay herida abao, y despues e Pitbull a sigui ataca e Chihuahua te ora cu e no tabata mustra señal mas di bida. Habitantenan eybanda a spanta nan alma, y mesora a core yama Polis y Ambulans. E spanto di nan ta referi na e hecho, cu varios biaha ta haya damanan ta core cu nan Baby chikito den stroller (bibando den mesun caya) y pasa dilanti e cas tambe.

Polis a wordo manda na e adres pa un señora cu a wordo ataca pa un cacho y a keda mal herida.

Na yegada di Polis no a haya e victima pero si a topa cu basta sanger y un Chihuahua morto. Ta trata di e adres Sero Patrishi 29-D. Polis na yegada a tende cu un señora a sali cana cu su cacho Chihuahua mara na liña, y e Pitbull a sali bay ataca nan.

E dama tabatin heridanan fuerte y tabata sangra profusamente.

Polis a papia cu e doño di e Pitbull, y mustre cu e mester bai carga tur e gastonan. Pasobra e tin di percura pa su animal, e tin di percura pa e cura semper ta cera, y a mustre riba e Ley di Cacho.

E victima ta keda cu un trauma tambe cu e forma cu el a mira su cacho wordo mata, y cu tur e dolor di e mordinan na su pecho.

Por a mira cu e Chihuahua tabata tapa riba vloer y ainda su liña mara na dje. Un situacion hopi tristo. Ora Polis a yega, nan a nota cu e doño a bay pone e Pitbull den un haula grandi di hero.

Aki tin di corda, cu unavez animalnan haya e ‘sabor’ di sanger humano, ta manera cu e animal ta perde un extra control cu e tabatin, y awor ta bira extra peligroso.

Den oranan di atardi, e doño di e cacho na un forma responsable a papia cu e bisiñanan riba e situacion, y el a bin tende cu su bisiñanan tur ta morto spanta cu e tin e Pitbull ey for di basta tempo, y cu awor cu un mascota chikito, y un dama inocente a haya mordinan peligroso, nan ta mas trauma cu nunca.

DIARIO a haya sa, cu e doño a dicidi cu e ta bay pone e cacho drumi pa semper, y di e forma ey trankilidad ta regresa den e caya. A compronde cu e Pitbull aki tabata uno cu semper ta hopi lief cu e doño y cu su famianan, y bishitantenan. Pero aki a keda demostra cu con lief e ta… unavez e haya libertad pa huy, e lo ataca cualkier cos cu e topa den su caminda… y Diamars mainta esey tabata e dama y e Chihuahua.

Hecho ta, cu ni con bon un Pitbull a wordo entrena, cria, guia, y domina den su bida… tog su genetica di atake inespera contra su propio doño of hende straño, ta asina hopi documenta rond mundo, cu mester djis biba cu e realidad ey. E cacho lief ey… un dia inespera por ataca!

- Advertisement -

DUNA COMENTARIO

Please enter your comment!
Please enter your name here