Un siman largo decenas di turista a bira malo na Divi Village y nan ta furioso

Publication: Saturday, 20 February 2016. Categoria: General

Algun hende ta pidi Ministerio Publico start investigacion criminal…

ORANJESTAD (AAN): Oficialmente ningun declaracion a ser emiti, pero turistanan mes a cuminza pone riba Internet, nan reclamo di loke ta pasando na e resort di Divi Village ultimo dianan.

Tin indicacion cu un trabao haci weekend pasa door di sea trahador, of un compania di contratista, a pone cu tuberia conteniendo “awa procesa” procedente di Bubali Plas cu normalmente ta ser usa pa muha e yerbanan di e cancha di golf, eroneamente a worde conecta na e red di awa potable di WEB Aruba NV.

Un turista cu a check-in Diasabra atardi, a ripara cu awa di cranchi ta sali berde, y mesora el a notifica Frontdesk di esey.   Di con Frontdesk of e Manager di Diasabra anochi no a bati alarma mesora, kizas ta algo cu Recherche tin di bay investiga.

NO A YUDA NI CU DOCTER”

Consecuencia di esaki ta cu desde Diasabra siman pasa, mas di 30 turista a bira malo, y tanto Botica como tambe Servicio di Emergencia na Hospital a haya monton di turista pa duna tratamento, incluyendo Diabierna madruga pa 1:00 am, un baby.

Pues, e ‘vacacion’ di hopi turista a wordo seriamente afecta e siman aki. Nan ta haya marea, sacamento, y diarea y ta bira hopi debil. Varios di nan a keda como 24 ora tur malo riba cama. Un di e turistanan aki tabata asina debil, cu e no por a ni yega na e porta di Servicio di Emergencia na Hospital, ya cu el a cay di cabez net ey dilanti. Esaki a socede ayera, Diabierna madruga banda di 2:00 am.

Y net awor cu Divi Village por a haci nan best pa yuda tur e turistanan aki afecta, net awor nan “servicio na cliente” a faya barbaramente. Un turista Italiano a indica claramente cu desde Diadomingo el a bira malo, y Dialuna su partner tambe. Gerente di Divi Village a priminti cu nan lo manda un docter pa wak nan. Te cu Diabierna, esey no a socede. Manager a djis laga nan na caya. Finalmente nan mes a bay Botica Eagle, unda nan a haya hopi bon yudanza, splicacion ki remedi nan por tuma, y un splicacion con pa tume, y cu e indicacion pa nan bay Docter mesora ora nan regresa nan pais.

Pero nan ta furioso cu Divi Village tin ni e decencia di bisa nan, si acaso e awa ta malo ainda, nada. Un fayo grandi pa e resort aki, y awor mundo henter ta haya sa di dje. Frontdesk a haya sa desde Diasabra anochi, y aun asina riba Dialuna ata otro personal di Frontdesk ta contesta telefon y ta bisa cu e no sa di nada, y ningun otro hende a yama raporta? Un turista a skirbi riba TripAdvisor, cu trahadornan di Frontdesk mes a purba di tira culpa riba “virus” cu lo ta plamando riba Aruba.

IJS COLOR GEEL:

Un turista kende tin mas di 20 aña kedando anualmente na Divi Village, a splica cu esaki ta prome biaha cu nan a confronta e situacion aki. Awor nan ta bebe awa for di botter, pasobra nan lo no confia e awa eynan mas.

Pa colmo, algun turista ta insisti cu cierto trahadornan di Divi Village a bisa nan, cu loke ta pasando ta un “island wide problem”. Esaki a spanta e turistanan mas, siendo cu e declaracion ey no ta cuadra cu berdad.

NAN TUR ODIA FRONTDESK:

For di comentarionan cu por a lesa caba riba Internet, por deduci cu turistanan ta nada contento cu loke a pasa, y ta disgusta cu gerencia ta ni informa nan drechi ki ta pasando. Uno a hasta skirbi riba TripAdvisor, cu e Manager di Frontdesk tabata hopi bruto cu nan, y no kier contesta pregunta tampoco. E ora e turistanan, ta via di otro canalnan nan ta bin haya sa, cu un contratista a haci eror y conecta un tubo cu awa “sushi” na e red di awa potable limpi. Tur ice-maker den pisonan ta produci ijs consistencia di lechi, pero color geel. Turista a laba su pañanan, y awor nan tur a keda hole awa di beerput.

Nan ta mira si cu personal di Maintenance ta pasa y habri cranchi, pa asina laga awa “spula”. Tin di habri valve di tur tubo, pa asina por elimina e awa contamina, y spera cu e por bira full limpi bek.

INVESTIGACION CRIMINAL:

DIARIO a compronde cu riba Diabierna, a hasta sugeri, cu Ministerio Publico di Aruba mester cuminza cu un “investigacion criminal” pa haya sa kico a socede.

No por ta posible cu intencionalmente ta pone decenas di turista bira malo na Divi Village, y ningun hende kier admiti culpabilidad y ta laba man.

E turistanan mes, ta purba di lubida esaki, pero tur e dianan aki nan ta bebiendo awa di botter cu e Resort mes ta suministra, tog nan ta nada contento. Nan ta expresando esaki abiertamente cu tur trahador cu nan topa, incluyendo waiternan di restaurantnan den otro area.

GERENCIA A FAYA DI NOTIFICA:

Divi Village ta hayando palo tras di palo riba TripAdvisor! Turistanan furioso, cu ta hasta recomenda otronan pa NO bin keda nunca na e resort. Nan ta haya cu gerencia a faya, di no a notifica tur huesped na tempo di esaki.

Y e famia y amigonan di e turista masculino cu a bira sumamente debil dilanti porta di Servicio di Emergencia? Nan a mustra claramente di no ta nada happy cu loke ta pasando na Divi Village. Pasobra te cu e momento ey, ningun hende di Divi Village a bisa nan kico exactamente nan a bebe.

Divi Village, principalmente personal di Frontdesk… debe tanto e turistanan aki, como tambe Isla di Aruba un disculpa publico!

Leave a Reply