Home Hudicial Awe sentencia ta cay den caso di malversacion di 120 mil Florin...

Awe sentencia ta cay den caso di malversacion di 120 mil Florin for oficina di Gobierno na Noord

1
0
SHARE
- Advertisement -

ORANJESTAD (AAN): Awe mainta Corte den Promer Instancia ta dicta sentencia den e caso penal cu Ministerio Publico a cuminsa contra dos empleado di oficina di Gobierno na Noord. Algun siman pasa tratamento di e caso aki a tuma lugar.

E acusacion cu Fiscal a presenta contra L.K. y M.G. ta cu entre 1 September 2012 y Augustus 2012, nan a malversa 120 mil Florin cu ta pertenece na WEB Aruba NV. Nan no a transferi for di e oficina di Gobierno na Noord e placanan aki pa cuenta di WEB.

L.K. tambe ta worde acusa cu entre 5 November 2012 y December 2012, el a falsifica deposit slip. Segun Fiscal, L.K. a pone sumanan mas halto cu loke nan mester ta.

DEMANDA PA KITA PROPIEDAD:

Tambe Fiscal a haci demanda pa kita algo mas di 10 mil Florin na propiedad di L.K. cu mester a manda pa Setar. Ademas Fiscal a demanda pa entre M.G. y L.K. kita 120 mil Florin. Abogado mr. Lejuez cu ta representa M.G. a bisa cu e ta worde sorpresa cu demanda di kita propiedad. Fiscal a bisa cu segun ley, e por haci esaki verbal den Corte. Hues a mustra tambe, cu e demanda di kita propiedad a worde duna na e sospechosonan adelanta, pues nan sa di esaki.

SOSPECHOSONAN TA DESMENTI:

Hues a puntra M.G., kende ta un hefe na e oficina di Gobierno si e acusacion ta berdad. M.G. a bisa Hues cu e no a coy ningun placa. El a bisa cu e no sa nada di e sumanan cu ta menciona. M.G. a bisa cu el a fia mas o menos 5 mil Florin for di caha y a fia for L.K. 1800 Florin. El a bisa cu el a fia e placa pa paga un debe cu deurwaarder a manda cobra. El a splica cu e cahera a fia e placa y cu el a paga e suma back den un lapso di 4 luna.

Pa loke ta e suma grandi, e no sa nada. El a bisa cu ta ora el a haya decreto ministerial di su retiro, el a lesa den e carta cu asina hopi placa a disparce pero e no sa di nada. El a kere cu ta e 5 mil Florin cu el a fia y a paga back, ta e motibo cu el a worde kita. M.G. a splica cu L.K. ta haya e placanan y e ta yena nan riba e deposit slip.

Hues a haci un serie di pregunta encuanto e sumanan, pero M.G. a bisa cu e no sa nada di e suma grandi menciona. El a splica cu e no ta haya placa den su man. E ta haya solamente documentonnan di placanan cu banco ta haya di oficina di Gobierno.

El a bisa Hues cu el a bisa LandsRecherche cu e solamente por papia di e 5 mil Florin cu el a fia for di caha. El a keda bisa cu e no sa nada di e suma. El a splica cu e sa yuda L.K. pa manda e placa pa banco. Segun M.G. e no ta haci deposito di placa na banco sino L.K. Hues a puntra si no ta controla e placanan cu L.K. ta aparta. El a bisa cu e sa mira cu falta placa pero e no a cay ariba cu ta malversacion y tampoco no a mira sumanan grandi. El a bisa Hues cu eynan el a faya.

Hues a mustra cu e caso a bin na claridad, ora cu na dado momento Elmar a bati alarma cu falta un suma grandi. Elmar a laga sa cu si e placa no yega, lo bay LandsRecherche. M.G. a bisa Hues cu L.K. a spanta y a cont’e di esaki. El a splica con tur e placanan ta worde conta y hinca den saco di placa y despues seguridad ta hiba e placa banco. Segun M.G. el a haci fayo grandi di a confia den e cahera cu tur cos ta bayendo bon esta cu e placa cu el a fia a keda deposita back. El a bisa cu L.K. tabata separa e placanan y no kier otro yud’e. E tabata haya e placanan y tabata traha documento di deposito.

Hues a remarca con por ta posibel cu 120 mil Florin ta disparce bou su nanishi y M.G. ta para riba cu e no sa di nada.

Hues a puntra L.K. si ta berdad cu el a malversa 120 mil Florin. L.K. a desmenti esaki. Hues a mustra cu WEB, Setar y Elmar a señala cu nan no a haya pagonan di clientenan y esaki en total ta suma 120 mil Florin. L.K. a keda asombra di scucha e 120 mil Florin aki. El a bisa con un persona lo por coy esaki. El a bisa cu esun di Setar , 10 mil Florin, el a tende di dje.

El a sigui bisa cu e tabata manda e placanan banco y su siguiente dia ta haya e papelnan for di banco. Segun L.K. ora el a ripara cu no tin suficiente entrada pa manda, e ta bay na M.G. y M.G. ta bis’e lag’e pa su siguiente. Segun L.K. e placa cu resta ta bay cu seguridad banco y su siguiente dia e placa ta worde treci back.

El a bisa cu e 10 mil di Setar e por imagina. El a splica cu e ta haya e placanan di e caheranan y esaki ta bay banco. Hendenan cu ta paga nan cuenta y esaki ta bay banco. El a bisa cu ora e ta controla e bultonan di placa, e caheranan ta para eynan. Segun L.K. e no ta bay conta e placa sino e bultonan. Si ariba e papel ta para 10 bulto, e ta conta e bultonan so y no e cantidad di placa.

Segun L.K. e diferencia den suma a bin ora cu M.G. a fia e 5 mil Florin. Hues a puntra L.K. si e tabata haya placa di M.G. Segun L.K., ta M.G. mester a paga cahera. L.K. a bisa cu e no ta keda cu placa di hende. Tur placa cu caheranan ta haya, ta worde manda banco.

L.K. a cuminsa yora y bisa Hues cu e tin 2 aña sin salario y nunca el a yega di haci algo asina.

EXIGENCIA DI FISCAL:

Fiscal ta haya ambos dama culpable di e malversacion di 120 mil Florin. El a condena totalmente con e placa aki a disparce y cu ambos ta desmenti di no sa nada di e placa. Fiscal a exigi 4 luna di prison condicional cu un tempo di prueba di 2 aña. Tambe el a exigi 240 ora di trabao pa comunidad y si no cumpli cu esaki, 60 dia di prison.

Ademas Fiscal a exigi pa e 120 mil Florin worde parti den dos pa ambos paga. O sea cada un ta responsabel pa 60 mil Florin y si no por paga lo coy propiedad.

Awe mainta Hues a keda di dicta sentencia y DIARIO lo informa lectornan kico e decision di Hues ta.

- Advertisement -

DUNA COMENTARIO

Please enter your comment!
Please enter your name here