Home General ‘Cu determinacion por logra realisa cualkier lucha of causa’

‘Cu determinacion por logra realisa cualkier lucha of causa’

0
0
SHARE
- Advertisement -

Prome Minister Eman a elogia lidernan di antes pa nan tolerancia

'Cu determinacion por logra realisa cualkier lucha of causa'ORANJESTAD(AAN): Respet pa opinion di otro y tolerencia, ta virtudnan cu tabata caracteristica politiconan di antes, algo cu awendia ta sinti hopi falta di dje. Esaki tabata aspectonan cu a resalta den e discurso di Prome Minister Mike Eman durante un ceremonia riba Plaza Monumento 18 di maart, den cuadro di celebracion Dia Nacional di Aruba.

Riba Plaza Monumento 18 di maart tin graba nomber di 2147 hende homber, kendenan e tempo ey a tuma e curashi pa sigui e idealnan di e hoben politico di e tempo ey Shon A Eman y otronan cu tabata comparti e mesun idealnan.

E lidernan ey a worde scucha, Prome Minister Mike Eman a trece dilanti den su discurso, pasobra nan a demostra perseverancia, humildad y tolerancia cu no ta mira awendia, apesar cu e idealnan cu nan a hiba den nomber di pueblo no a worde reconoci mesora, manera cu a spera. Ora ta papia di tolerancia, mente di hopi hende ta bay back sigur riba e storia mas conoci pa pueblo di Aruba cu ta esun di Anna Frank, di kende tin un estatua den Wilhelmina Park.

Prome Minister Eman a expresa su admiracion pa e 2147 hombernan cu e tempo ey tabata dedica nan mes na politica of a apoya idealnan politico sin cay den polarisacion, ora cu nan deseo pa ta “Baas den Propio Cas” no a bira un realidad mesora. E actitud politico di awendia na mundo den discusionnan social, ta sinti un polarisacion grandi, unda ta humiya otro y “no tin murayanan suficientemente halto pa exclui cierto gruponan di comunidad”. Asina na diferente parti di mundo ta mirando un intolerancia pa personanan di otro rasa of religion y nan ta worde discrimina”.

Mirando con e lidernan di antes den tur nan frustracion y confrontacion cu Madre Patria, hayando poco oido pa deseo di e pueblo y nan lucha, nunca a baha di nivel y tampoco a bay na exclui gruponan of difama cierto gruponan. Pesey den su discurso e mandatario a haya importante pa expresa su elogio pa e lidernan di antes y duna reconocemento na e lucha di e ciudadanonan aki. Paisnan grandi unda democracia ta existi pa hopi tempo awendia no ta e miho ehempelnan di loke ta nifica respet pa derecho di ciudadanonan y nan opinion. “Pesey nos mester mira e lidernan aki cu mas elogio y respet pa e lucha cu nan a hiba den forma respetuoso,” Eman a bisa. Na mes momento el a recorda expresion di un lider manera Da Costa Gomez, kende a yega di bisa “no haci cu otro loke bo no kier pa nan haci cu bo”.

Na final di su discurso e mandatario a bisa cu den “bida ora cu bo pone un meta bo dilanti y dicidi cu bo ta bay traha duro, bo ta bay entrega bo mes pa realisa un causa, con dificil cu e por ta, si bo tin determinacion, tardi of tempran bo lucha y bo causa ta worde reconoci y worde realisa. Biba Aruba, pasobra danki na e determinacion grandi cu nos luchanan aki a demostra, nos a logra nos meta. Personanan clave den historia, Martin Luther King y Gandhi a inspira mundo y na mes momento tabata pidi respet pa pueblo, ta cosnan cu nan a laga atras como inspiracion pa nos isla.”

- Advertisement -

DUNA COMENTARIO

Please enter your comment!
Please enter your name here