Home Hudicial Damanan cu a malversa 120 mil Florin mester paga placa bek

Damanan cu a malversa 120 mil Florin mester paga placa bek

3
0
SHARE
- Advertisement -

Ademas di castigo condicional y 240 ora di trabao pa comunidad

ORANJESTAD (AAN): Hues di Corte den Promer Instancia a dicta sentencia den e caso di malversacion di 120 mil Florin contra e damanan M.G. y L.K., caminda a condena nan na castigo condicional, trabao pa comunidad y mester paga e placa back sino lo bay sera.

   E acusacion contra nan ta cu entre1 September 2012 y Augustus 2012, nan a malversa 120 mil Florin cu ta pertenece na WEB. Nan no a percura pa transferi e placanan for di e oficina di Gobierno na Noord.

   L.K. tambe ta worde acusa cu entre 5 November 2012 y December 2012, el a falsifica deposit slip. Na opinion di Fiscal, L.K. a pone sumanan mas halto cu loke nan mester ta.

    EXIGENCIA DI FISCAL:

    Algun siman pasa durante tratamento di e caso, Fiscal a bisa cu e ta haya ambos dama culpable di e malversacion di 120 mil Florin. El a condena totalmente con e placa aki a disparce y cu ambos ta desmenti di no sa nada di e placa. Fiscal a exigi 4 luna di prison condicional cu un tempo di prueba di 2 aña. Tambe el a exigi 240 ora di trabao pa comunidad y si no cumpli cu esaki, 60 dia di prison.

Ademas Fiscal a exigi pa e 120 mil Florin worde parti den dos pa ambos paga. O sea cada un ta responsabel pa 60 mil Florin y si no por paga lo coy propiedad.

    SENTENCIA:

    Hues a bisa cu e ta haya legalmente proba cu e dos damanan ta complice di malversacion 120 mil Florin. Hues tambe ta haya L.K. complice di falsificacion.

Hues a mustra cu for di investigacion ta sali na cla cu diferente biaha a hala atencion door di WEB Aruba NV, Setar NV y NV Elmar cu tin diferencia den suma di placa. Hues ta haya cu no por ta otro cu e dos damanan tabata sa. L.K. a bisa cu el a haci’e riba orden di G. Hues ta haya cu no tin otro indicacion cu e dos damanan ta responsabel pa e placa cu a disparce.

   Na opinion di Hues, e dos damanan no a duna splicacion con otro forma e placa aki por a disparce. Tambe Hues ta haya cu a falsifa fechanan riba formularionan di deposito. El a bisa cu e no ta kere e declaracion di e damanan cu lo ta bruhamento.

   Pa loke ta e castigo, Hues a bisa cu e ta tene cuenta cu e acusadonan durante un periodo a haci nan mes culpable di malversacion di placanan cu hendenan a paga riba nan cuenta. Door di nan acto fraudulento a malversa 120 mil Florin y causa daño financiero na e companianan. Tambe nan a tacha e imagen di ambtenaar. Hues a bisa cu e ta tuma nan hopi na malo pa esaki.

El a tene cuenta cu ta promer biaha cu nan ta cay sera pa un delito asina. Hues a condena nan na 4 luna di prison condicional cu un tempo di prueba di 2 aña. Tambe Hues a ordena pa nan haci 240 ora di trabao pa comunidad of sino nan lo mester bay 120 dia sera den prison.

Pa loke ta e demanda di kita propiedad, Hues a ordena cu cada un dama lo mester paga 60 mil Florin y si no paga, nan lo haya 8 luna di prison.

- Advertisement -

DUNA COMENTARIO

Please enter your comment!
Please enter your name here