Home Editorial Editorial: PAPIAMENTO: NOS IDIOMA!

Editorial: PAPIAMENTO: NOS IDIOMA!

6
0
SHARE
- Advertisement -

jossy_mansur_pic                Papiamento ta nos idioma pasobra el a nace na Aruba mescos cu nos, y a crece y desaroya aki, como parti di nos. E no a bin di ningun otro parti di mundo y no a sufri tampoco e cambionan cu algun ta predica cu el a sufri. El a desaroya cu nos y awendia ta forma un parti integral di nos bidanan. Trata di cambi’e bistiento e otro bachi ta igual na pasa un cuchio na su garganta y bisa nos: ya boso idioma no ta e mesun di tur e siglonan cu a pasa. Purba custumbra na e forma nobo di skirbie! NO! Esey no ta posible y no ta bay pasa tampoco pasobra mientras nos tey, nos no ta bay laga ningun hende destroz’e. Papiamento na Aruba ta bay keda e Papiamento cu nos tur conoce y cu cual nos ta custumbra! Mientras nos tey e no ta bay cambia su forma skirbi, o sea e figura di su palabranan.

                Mi ta compronde e afan di cierto personanan pa cambia e forma di skirbi Papiamento pa e pas cu esun di e dos otro islanan cu tin tambe e mesun forma di comunicacion cu nos, pero nan ta perde for di bista cu Papiamento no ta un materia cientifico cu mester pusha pa smak riba tur otro hendenan, sino cu e ta un convenio entre e diferente gruponan di nos comunidad pa comunica cu otro. Si mi mira e forma di skirbi di e otro islanan, mi no ta haya ningun caminda un uniformidad di skirbi’e, y esey ta e punto mas neuralgico den henter e asunto aki. Si no por bin un uniformidad di skirbi’e, anto tanto bal, pasobra cada ken ta bay haci’e segun e sonidonan cu e ta scucha, y no segun un manera predetermina di skirbi’e.

                Pa mi uniformidad den e figura di su palabranan bal mas cu cualke otro cos. Otronan por skirbi nos idioma yen di “k” y otro barbaridadnan, pero e fli ey no ta subi na Aruba. Aki nos ta respeta e figura di e palabranan manera cu nos a hereda nan di pasado. E idea di bin cu un solo manera di skirbi nos idioma na tur tres isla ta elogiable, pero no por pusha nos cu tur clase di innovacion cu no tin, pa nos, e balor cu otronan ta kere cu e tin. Laga nos keda cu e figura di nos palabranan y nos ta keda satisfecho cun’e.

                Loke esnan cu ta propaganda Papiamento mester haci ta forza tur e stranheronan cu ta nenga di papia nos idioma haci’e, pasobra si nan bay otro pais, nan ta obliga di siña e idioma di e pais ey, no solamente papi’e, sino skirbi’e y lese’ tambe, sino no tin lugar pa nan aya. Mundo ta bira hopi chikito pa nan, y nan lo compronde pakico nos ta insisti tanto pa nan siña nos idioma. E ta e unico forma cu nan por funciona adecuadamente den nos comunidad.

- Advertisement -

DUNA COMENTARIO

Please enter your comment!
Please enter your name here