Home Hudicial Sospechoso gara na Barcadera lo por trece hopi claridad den kendenan a...

Sospechoso gara na Barcadera lo por trece hopi claridad den kendenan a planea e asalto di Excelsior Casino

3
0
SHARE
- Advertisement -

Sospechoso gara na Barcadera lo por trece hopi claridad den kendenan a planea e asalto di Excelsior CasinoORANJESTAD (AAN): E siman aki autoridad a detene na Barcadera e homber B., kende ta un fugitivo relaciona cu e caso di asalto arma na Excelsior Casino na Holiday Inn Hotel.

Algun siman pasa, DIARIO a publica en extenso henter tratamento di e caso, caminda Fiscal a exigi 5 aña di prison pa e tres Venezolanonan, cu a bin Aruba especialmente pa haci e asalto arma.

E Venezolano C.I. ta esun cu a basha abao riba tur e otronan envolvi. El a bisa cu na April 2015 el a bin Aruba pa busca trabou y el a wordo acerca pa haci e asalto. E ora ey el a manda busca dos otro Venezolano.

Declaracion cu C.I. a duna na Recherche ta mustra cu el a bay na cas di e sospechoso V.G. Na dado momento abogado di V.G. a pidi pa mirando cu Hues kier pospone e caso contra V.G. y A.A. pa scucha Recherche, pa laga V.G. liber.

E ora ey Fiscal a bin cu informacionnan hopi interesante. Fiscal a bisa cu tin sospechoso fugitivo. El a menciona e sospechoso B., kende lo a bay Venezuela.

Segun Fiscal, e homber B., a bisa su ex amiga, cu e hunto cu V.G. a traha e plan pa e asalto arma na Excelsior Casino.

Awor cu a detene B. na waf di Barcadera, e caso ta bira mucho mas interesante pa Ministerio Publico pasobra awor tin un sospechoso principal cu a bisa su ex amiga cu e hunto cu V.G. a traha e plan pa e asalto arma.

Ta asina cu V.G. ta para riba cu e no tin net net nada di haci cu e caso aki. Ora e tabata duna declaracion den Corte, por a nota cu e empleadonan di casino cu a bira victima di e asalto aki y tabata sinta den tribuna, a cuminsa hari. Esaki ta un indicacion bon cla cu loke e sospechoso V.G. a declara no ta e berdad.

E sospechoso B. a wordo gara na momento oportuno ya cu su declaracion por yuda den e investigacion cu ainda ta pendiente pa haci na Hues Comisario.

Manera DIARIO a publica, Hues a dicidi cu ta pospone e caso di e sospechoso A.A. y tambe V.G. Hues kier pa Hues Comisario scucha e miembronan di Recherche cu a interoga A.A. y e Venezolano pa tin claridad riba cierto denuncia cu abogado di A.A. a trece padilanti.

E abogado a señala cu e miembronan di Recherche a forza A.A. pa declara usando su yiu chikito. Ademas Hues kier sa si e Venezolano a menciona e nomber di V.G. of no.

Si e sospechoso B. durante interogacion admiti cu loke el a declara na su ex amiga ta e berdad, e ora ey no ta mucho relevante mas pa scucha miembronan di Recherche riba e interogacion di e Venezolano C.I.

E caso contra e sospechosonan A.A. y V.G. lo sigui na April. Tempo lo mustra si riba e dia di tratamento di e caso, lo bay trata e caso di B. tambe

 

- Advertisement -

DUNA COMENTARIO

Please enter your comment!
Please enter your name here