Caso serio Diahuebs anochi
ORANJESTAD(AAN): Un caso cu bo ta tende ta socede na otro paisnan grandi,a keda registra Diahuebs anochi na Aruba. E tabata algo despues di 8:00 pm, cu e informe a drenta.
Mesora Central di Polis a dirigi Patruya di Noord cu urgencia den direccion di un cas den bario di Opal.
A drenta informacion cu tin un atraco y tin hende herida den cas. Na yegada di Polis a topa cu algun persona basta spanta, y riba nan cara por nota cu nan a pasa momentonan di panico.
Na careda y ainda for di rosea, nan a conta Polis cu dos homber disfraza identico na agente policial, y fuertemente arma cu metrayador automatico tipo Uzi a drenta nan cas. Di e forma ey nan a comete atraco!
Esaki no a bay facil, debi cu tin hende cu a resisti den e cas. Tog nan a sa di domina e situacion, crea panico, y logra nan meta.
Na final, dos petchi di Polis a keda atras. A haya un petchi den e cas mes y uno den cura di e cas.
E habitantenan ta procedente di Brasil, y nan a bisa Polis cu nan a keda sorprendi con loke nan a kere ta Polis, a djis yega presenta na e cas, pero papiando un bon spaño. Nan a kere ta Polis… pero a resulta di ta atracadornan!
Despues di tur esaki, Polisnan di Noord y demas distrito a rondona henter e area pa busca e atracadornan. Den e saliña pariba di Marriott a bin topa cu uniform di Polis. Esey nifica cu e descripcion di e victimanan ta cuadra.
A haya carson y camisa di Polis cu e logo di Polis pega riba dje. A haya handschoen di AirSoft. Probablemente e arma tambe ta di Airsoft pasobra e victimanan a bisa cu e armanan no ta parce di berdad.
E buskeda tabata intenso cu cacho y Team di Aresto hunto cu Polisnan uniforma di diferente departamento. A drenta cu K-9 den cierto area entre otro areanan no habita. No obstante tur esey, no a topa cu e atracadornan.
Atraco Team a bay na e cas pa asina atende cu e victimanan. Tambe a notifica ambulance pa atende cu esnan cu lo ta herida of spanta. Aunke a worde menciona cu tin atracador herida, tog no a haya rastronan di esey.
E speranza tey cu demas habitantenan den Opal, cu tin Security Camera, por revisa awe ainda nan grabacion pa wak si por a capta algo di movimento den nan area, y yama Polis pa duna tip.
Ayeranochi mes no a haya informacion kico e atracadornan a bay cune.
