Kimberly de Groot, Podotherapeut:
ORANJESTAD (AAN) — Matutino DIARIO a entrevista e hoben Kimberly de Groot, Podotherapeut den servicio di IMSAN Playa, tocante e actividad cu a tuma lugar Diahuebs mainta relaciona cu Diabetes.
Esaki den e contexto di e Dia Mundial di Salud cu a keda celebra ayera, Diahuebs 7 di April.
Di con Diabetes como tema central?
“Pasobra e cifranan mundialmente ta alarmante. E ta un problema asina grandi, pero cu eigenlijk ta simple pa preveni”, e hoben a expresa.
El a subraya cu otro malesanan manera cancer, poco biaha por wordo preveni, pero IMSAN kier a haci enfasis riba prevencion pa stop e malesa di sucu di crece asina hopi.
“Cifranan ta asina erg cu ya nan a haci un estimado caba di e cifranan di mortalidad pa aña 2030 pa causa di Diabetes. Aworaki caba e mortonan pa aña ta 1.5 miyon pa aña door di Diabetes, locual ta alarmante.
“Nan ta bisa cu cada siete seconde un hende ta fayece na mundo pa motibo di complicacion di sucu”, Kimberly a señala.
Y kico e cifranan ta mustra pa Aruba mes?
“Tin ocho mil persona cu Diabetes cu nos sa di dje, pero ya caba nan ta pensa cu por tin 15 mil caba. Tin hopi hende cu no sa, ainda, cu nan ta Diabetico y door di e Plataforma di Salud kier haya e hendenan cu tine caba pero no sa, y ademas esnan cu ta na rand pa nan no bira. Y esnan cu tine pa aconseha nan pa baha nan sucu pa evita e complicacionnan cu ta keda atras, manera pia, wowo, etc., y cu ta baha bo calidad di bida y ta genera gasto tambe. Nos ta purba promove salud na e manera aki, cu informacion, concientizacion y educacion”, Kimberly a splica.
Nobenta porciento di e poblacion diabetico ta sufri di Diabetes tipo 2. E diferencia den e complicacionnan di Diabetes tipo 1 y tipo 2 ta cu tipo 2 ta haya nan laat, y e pacient no sa. Pero tipo 1 e persona ta nace cune y ta desaroyo hopi jong y for di chikito e ta custumbra cu un sorto di estilo di bida cu e pacient sa kico e mester haci y tur cos ta bira un custumber.
“Pero tipo 2 bo no sa y pa e momento cu bo haya sa ya bo a afecta bo organonan, wowo, pia, etc” el a agrega.
Di informacion cu IMSAN ta ricibi, e.o di docternan, kico ta e factornan principal?
“Nos ta hayando hende jong cu tin Diabetes tipo 2 cu den famia ningun hende tine. Pero door di nos estilo di bida, falta di movecion y no come suficiente saludable, nos por afecta nos salud aunke e no ta den famia”, Kimberly a señala.
E hoben a comenta tambe cu aña pasa riba Dia Mundial di Diabetes, e enfoque tabata “Healthy Living starts switch whit your breakfast”.
“Kiermen, desayuno ta hopi importante pa bo metabolismo pa bo curpa keda bon henter dia, y pa bo come na tempo. Si bo no ta come suficiente of bo tin un trabao cu mester traha madruga te mainta, y bo no tin un structura bo por afecta bo curpa”, Kimberly a subraya.
El a agrega cu na Aruba nos custumber di come ta hopi malo. Nos ta consumi hopi carbohidrato den un tayo. Tin hende ta come tur dia un combinacion di aroz, batata, salada di macaroni, funchi, pues banda di otro den un tayo. Esaki ta cinco carbohidrato hunto.
Kico ta e beneficio di ehercicio pa hende Diabetico?
“ Ora cu bo haci ehercicio bo celulanan ta habri pa absorbe e insulina mihor y ta baha bo sucu. Un hende cu ta check su sucu ora e bay cana y despues di esey, e ta wak cu su sucu ta baha. Pues, ehercicio ta yuda tene bo sucu den balansa, pasobra si bo no por baha e comemento na un manera hopi stricto, bo tin cu haci ehercicio tambe, pasobra si no e sucu ta keda halto. Pa salud, no pa diabetico so, nos tin cu haci un actividad fisico tur dia den siman, sikiera un 30 minuut diario. For di chikito nos tin cu custumbra nos muchanan” e hoben a indica.
Hendenan cu pa cual motibo no por move nan por haci ehercicio riba stul. Tin hende tin problema di rudia of a opera nan pia y tin problema di circulacion, y nan tin cu keda den movecion pa no bira peor y nan jointnan ta bira stuif.
“Pasobra no ta e pia so, of e sucu so, ya cu e ta persona completo y mentalmente tambe ta importante e motivacion y e sosten. Importante ta acepta e condicion di diabetico pa bo por biba”, el a indica.
Complicacionnan mas comun na Aruba?
“Como Podeterapeut, loke mi ta wak den practica ta hopi herida den pia cu eigenlijk por a wordo preveni. Herida, si bo actua mesora, e ta cura pero hopi biaha esey no ta e caso. Si bo educa bo mes bo sa como Diabetico cu bo mester check bo pia tur dia y si bo haci esaki si bo wak un blaar awe bo ta core bay cerca bo docter di cas of bin akinan, pa nada no pasa. Y si bo no check bo pia y bo in un sumpiña hinca, por ehemplo, bo ta coi infeccion, pesey ta importante pa bo sa kico e ta haci cu bo curpa y cu bo tin cu cuida bo mes. Mester tene cuenta tambe cu hopi diabetico ta perde gevoel den pia, y no ta sinti ora a haya un herida”, Kimberly a subraya.
Den otro articulo nos lo elabora mas riba e entrevista aki cu e hoben Kimberly de Groot.
