Home General Economia Arubano ta proyecta pa expande den termino real cu 1,1% ...

Economia Arubano ta proyecta pa expande den termino real cu 1,1% na 2016

0
0
SHARE
- Advertisement -

Banco Central a publica su Economic Forescast Monitor

ORANJESTAD    (AAN):  Banco Central di Aruba (BCA) a publica un actualisacion di su asina yama Economic Forecast Monitor (EFM) riba su website. E EFM ta duna un bista riba proyeccionnan economico, ambos internacional y local.

E proyeccionnan riba e economia Arubano, presenta den e EFM aki, ta produci pa BCA. Un resumen di e proyeccionnan domestico principal ta wordo discuti aki aboU.

   Despues di a experiencia practicamente ningun crecemento na 2015, e economia Arubano ta proyecta pa expande den termino real cu 1,1 porciento na 2016.

Na 2015, crecemento economico (PBD) tabata 1,8 porciento den termino nominal, y 0,1 porciento den termino real. Compara cu 2014, crecemento economico na 2015 a mengua door di caida substancial den consumo y inversion priva.

E taza di crecemento den entrada for di turismo a mengua te na 2,8 porciento na 2015, apesar di un crecemento significante di 14,3 porciento den cantidad di turista. Inflacion a keda stabil na 0,5 porciento.

   Pa 2016, e sector turistico ta premira pa sigui contribui positivamente na e economia door di un crecemento den exportacion di servicionan turistico. Sinembargo, contrario na e aña anterior, inversionnan di e sector priva ta proyecta pa crece cu 2,7 porciento, asina añadiendo positivamente na activadidad economico.

Consumo priva ta anticipa pa permanece debil y lo baha cu 0,2 porciento na 2016, door cu confianza di consumidor ta mustra poco señal di mehoracion.

Ademas, consumo di e sector publico y inversionnan ta proyecta pa refleha gobierno su esfuerzo continuo pa reduci deficitnan fiscal, y lo mustra un probable contraccion di 0,4 porciento y 0,7 porciento, respectivamente, na 2016.

Pagonan pa importacion ta proyecta pa crece cu 0,7 porciento, relata principalmente na un crecemento di e demanda pa importacion di materialnan pa construccion.

  Un scenario di e reapertura di e refineria ta proyecta pa tin un impacto mas grandi ainda riba produccion economico cu e scenario basico describi anteriormente. E scenario aki actualmente ta proyecta pa pusha crecemento economico te na 6,7 porciento den termino real na 2016.

   Mirando prijsnan, e crecemento general den e nivel di prijs probablemente lo por permanece modera na 2016, caminda e inflacion promedio di 12 luna ta proyecta na 1,0 porciento.

E cantidad di bishitantenan di permanencia y nan anochinan ta wordo premira pa mustra señalnan di crecemento menos fuerte na 2016. E activo neto for di exterior ta wordo proyecta pa expande na 2016, parcialmente causa door di entradanan di turismo mas halto y tambe prestamonan di gobierno den exterior.

  Riba nivel internacional, economianan desaroya (Merca, Canada, area Euro, Alemania, Hulanda, Reino Uni y Hapon) ta proyecta pa crece firmemente entre 1,0 porciento y 2,5 porciento na 2016.

Mercadonan di Latino America ta mustrando señalnan mixto, ya cu e economianan Brasilero (-1,6 porciento) y Venezolano (-4,6 porciento) ta premira pa cai na 2016, mientras cu gran parti di e otro mercadonan ta spera crecementonan di entre 2,5 porciento y 3,5 porciento.

E economia Ruso ta wordo proyecta pa cai un poco cu -0,4 porciento. Di otro banda, paisnan Asiatico emergente China y India ta proyecta pa crece cu, respectivamente, 6,5 porciento y 7,5 porciento.

   Inflacion den e mercadonan desaroya ta wordo anticipa pa ta rond di 2,0 porciento of mas abou. Inflacion na Latino America y paisnan Asiatico emergente ta wordo proyecta mas halto. Excepcionnan lo ta Argentina (27,1 porciento) y Venezuela (154,2 porciento) cu inflacion di dobel of triple digito.

   Ta spera cu prijsnan di crudo y gas lo permanece riba nivelnan abou ya cu WTI su prijs di crudo ta proyecta na $40 pa bari y e Henry Hub Spot ta wordo proyecta na $2.50 pa cada miyon di Btu. Prijs di oro probablemente lo sigui riba su patrochi di caida desde 2012.

   E publicacion “Economic Forecast Monitor” (EFM) ta disponibel desde awe riba e website di BCA www.cbaruba.org.

- Advertisement -

DUNA COMENTARIO

Please enter your comment!
Please enter your name here