Home Editorial EDITORIAL: E balor di 65 aña!

EDITORIAL: E balor di 65 aña!

4
0
SHARE
- Advertisement -

jossy_mansur_pic                Awor tin manera un menaza ta core rond cu esnan cu  yega 65 aña y ta ocupa cierto puestonan no por sigui mas den e posicion. E unico splicacion cu mi a logra haya te awor ta esun cu e edad ta halto. Pero, con halto e ta realmente? Na ningun pais mi por a haya un ekivalencia pa mi por huzga si ta loco mes nos gobernantenan a bira o ta un wega di adivinanza nan ta hungando. Kico cu nan splicacion por ta pa nan decisionnnan, mi no por acepta cu un persona ta perde facultad o capacidad djis pasobra el a yega cierto edad. Pa mi ta inconcebible cu dos mucha recien gradua y cu no a yega ni mitad di e cifra ey por haci un miho trabao cu un persona cu a dedica mas di 30 aña acumulando experiencia den e linea di su trabao. Y sin embargo, ata Gobierno ta treciendo dos mucha hulandes recien gradua na Hulanda pa reemplaza un doctor local di 65 aña di edad! Pami, esaki ta un locura di marca mayor.

                Pa cuminza, e muchanan Hulandes no conoce nos idioma, nan no tin ningun nocion di nos idiosincracia como Pueblo, nan no tin tampoco suficiente  experiencia cu enfermedadnan tropical. Ta cua ta e beneficio anto di e cambio? E rehuvenecimento di e personal? Esey no bal nada den e mehoramento di e servicio medico pa nos pueblo. Loke e tin mester ta mas docter di nos region, mas ekipo moderno cu por yuda den e diagnosticonan di e diferente enfermedadnan, mas enfermero y enfermeranan cu ta stima nan trabao y sa atende e enfermonan cu pasenshi, tolerancia y conocimento. No di esnan cu ta brindabo un sonrisa ora di bisabo bon dia o bonochi y djey ta desaparece.

                Nunca mi tabata tin problema pa expresa mi opinion honestamente, y mi no tine awor tampoco. Mi ta mira bida cu wowonan pragmatico, no tapa cu e celofan di politica. Gobierno, den su mayoria,  ta hacienda varios cos malo y mester pone un paro na nan. Ami lo cuminza pa debolbe Schwengle pa hospital (e ta un bon docter), y manda Sevinger bay siña e diferencia entre berdad y mitad mentira. Mi a keda ausente di e columna aki durante varios luna pa motibo di un enfermedad pisa cu a dal mi duro, pero esey a yega su fin y awe mi ta reincorpora mi mes na mi trabao na DIARIO. Esnan cu mester preta faha hacie for di awor caba, pasobra mi ta bin pa nan, y esnan cu merece elogio lo haye sin reserva. Un di nan sigur ta Otmar Oduber. Su trabao y su logronan ta papia pe. Otro ta Paul Croes, riba kende mi lo bin despues den detaye.

                Gobierno awor mester cuminza actua cu mas seriedad; pone sacamento di potret y dunamento di man un banda, pa cuminza enfoca riba e problemanan cu nos tin di resolve cu urgencia. Ultimamente nos a haya un invasion di bandidonan cu Gobierno mester controla; nos no por djis entrega nos isla na nan; Aruba ta di nos, Arubianonan,  y esey mester keda bon cla pa tur esnan cu ta aki y ta bin di exterior pa causa problemanan innecesario.  Ban recupera nos isla!

- Advertisement -

DUNA COMENTARIO

Please enter your comment!
Please enter your name here