Home Hudicial Entre 2 y 5 aña di prison exigi pa trio cu a...

Entre 2 y 5 aña di prison exigi pa trio cu a tira y kap homber su man afor

3
0
SHARE
- Advertisement -

Fiscal a baha pisa

ORANJESTAD (AAN): Ayera mainta e hombernan K.V.L., S.C. y J.W. a presenta dilanti Hues pa duna cuenta pa diferente delitonan cu nan a haci. E delito mas serio ta esun di 27 di December 2015, dos dia despues di Pasco caminda nan a agredi e homber W., tir’e tres biaha cu un arma di candela y despues a kap su man robez afor. Fiscal a condena totalmente kico e trio aki a haci cu e homber y a exigi entre 2 y 5 aña di prison.

   E victima W. (Pudding) a presenta den Corte y por a mira claramente cu el a perde su man robez o sea te na su pols. Por a mira cu J.W. a mir’e un manera y W. tambe a keda mir’e. El a keda un rato sinta den sala di Corte pero despues a bay.

   ACUSACIONNAN:

   K.V.L. ta worde acusa cu riba 16 Mei 2015 e tabata den posecion di cocaine y tambe marihuana. Tambe e ta worde acusa cu riba 27 December 2015 el a haci su mes culpable di intento di asesinato. El a tira diferente biaha riba W. na San Nicolas. Subsidiario e ta worde acusa di a causa herida severo.

S.C. ta worde acusa cu riba 4 Augustus 2015, el a destrui glasnan di un cas y tambe destrui dos auto. Dia 27 December 2015 el a causa herida serio na e homber W. door di fractura algun ripchi y perfora pulmon.

J.W. ta worde acusa cu riba 18 December 2014, el a maltrata e dama S. tras cabez cu un arma y un bloki cement den lomba. Tambe e ta worde acusa di posecion di arma. 16 Mei 2015 e tabata den posecion di cocaine y marihuana. Dia 4 Augustus 2015 e tambe a destrui glasnan di cas y dos auto. Dia 27 December 2015 e ta worde acusa di intento di asesinato riba W. caminda el a corta afor man di e homber cu un machete.

    CASO INTENTO ASESINATO:

    Hues a bay hopi extenso riba e casonan. El a cuminsa cu e caso mas serio cu ta esun di 27 December 2015. Polis a haya yamada pa un asistencia na un cas bandona na Caya Sint Lucia na San Nicolas pa un caso di maltrato cu arma. Esaki tabata 12.30 di merdia. Polis conoce e lugar ey como lugar cu ta huma droga y hendenan ta bay eynan.

Polis a topa cu W. kende ta usa droga. Nan a hay’e cu un sarbete tur na sanger na su pols robez. El a bay na Polis y bisa cu nan a caba di cap su man cu un machete. Polis a mira cu W. tabata hopi debil y tabata casi pa perde conocimento. Nan a bis’e pa bay sinta y a yama ambulance. Mientras cu tabata warda ambulance, un señora a acerca Polis y a bisa cu e no kier menciona su nomber pa nan no tuma represaya contra dje. El a bisa cu el a tende gritamento duro ta sali for di e cas bandona. El a mira un grupo di homber ta bringa cu W. El a mira J.W. cap cu machete y otronan arma.

  1. e momento ey a bisa Polis cu e dia ey e tabata huma sigaria den e cas y e trio K.V.L., S.C. y J.W. tabata tira clapchi riba e cas. El a rabia y tira boter y e boter dal un di nan contra cara. El a bisa cu e ora ey e grupo bin riba dje y kap su pols. A resulta cu ta S.C. a haya boter contra cara. Un otro a tir’e den rudia banda drechi. Door cu mester a haci operacion na man y tambe atende pa heridanan el a keda interna den hospital. Raport medico ta indica cu W. a su man robez a worde kita afor cu e machete. Mester a purba pega e man back na e braza pero no a logra. Tambe W. a sufri tres tiro y un di nan na rudia banda drechi. Tambe e tabatin manchanan blauw riba pecho y 2 ripchinan fractura. Door cu a dal’e cu biga riba pecho, e ripchi cu a kibra, a perfora su pulmon robez cu tabata sangra paden. A resulta cu W. a sufri 3 tiro na pia y a laga un bala den pia. Na lugar di incidente a haya 2 huls.

Te 4 Januari 2016, Polis por a interoga W. na hospital. Segun W., e trio tabata den vecindario ta tirando clapchi. Na dado momento a tira un thunder king cu a explota banda di dje. El a bisa nan pa stop pero nan a sigui. E ora ey el a tira boter cu a herida S.C. E tabata papiando cu S.C., K.V.L. a core bay cas y a bolbe cu un arma y tira riba dje. Despues S.C. a dal’e cu biga riba pecho. J.W. a core bay cas y bolbe cu un machete. El a zwaai y kap man di W. afor. El a bisa cu despues di tres dia el a recobra tino.

Hues a mustra cu K.V.L. a declara na Recherche cu nan tabata tira clapchi pero clapchi no a cay riba W. Nan a bay sinta unda nan ta sinta y diripiente W. a sali y dal S.C. cu boter den boca. Ora a Sali for di e cas, ya W. a manda otro boter. E ora ey K.V.L. a bay bringa cun’e y W. a lant’e dal abao. Segun K.V.L. su arma a Sali cay y W. kier a coy e arma. Segun K.V.L. el a coy e arma y di spanto el a cuminsa tira abou den direccion di W. pa spant’e. E no ta corda cuanto tiro a Sali. Ora bala a caba, e no tabata sa cu W. a worde herida pasobra W. a purba gare. E ora ey S.C. a bay yud’e y K.V.L. a core bay. Segun S.C. el a bay yuda K.V.L. El a tende tiro pero no sa ken a tira. El a pasa man pa un pida biga y dal W. na su man duro cu esaki. Despues a bay na cas di un amigo. J.W. a bisa cu el a mira K.V.L. tira y mira S.C. dal W. cu biga. Segun J.W. el a haya e machete benta abou ey banda y a coy esaki y a bisa W. pa e keda leu cu e boter. El a zwaai cu machete pa wante leu, luga e machete a kap su man. E ora ey el a laga e machete cay y a core bay. Segun S.C., door di e sla cu boter el a perde dos djiente.

Fiscal a remarca cu ta awor den Corte pa promer biaha J.W. ta bisa cu W. a bay riba dje cu boter. Ora Fiscal a puntra K.V.L. unda e tabatin e arma scondi. Segun K.V.L., ta W. tabatin e arma. Hues a remarca cu awor ey K.V.L. a bisa otro cos.

    DROGA DEN AUTO:

    E caso di 16 Mei 2015, Hues a mustra cu Polis a bay Sero Colorado pa ladronicia di koper. Na caminda a topa cu un auto sin number padilanti. Nan a reconoce algun miembro di gang di Village den e auto. A persigui e auto pasobra e chofer no kier a para. Na dado momento e auto a para y a haya 3 sakito cu cocaine cu ta pisa 6.5 gram y sakitonan di marihuana cu a pisa 5.6 gram. Cinco persona a deteni y entre nan K.V.L. y J.W. Segun K.V.L. e droga ta di nan tur y nan a cumpr’e pa nan usa.

K.V.L. a reclama cu tanto hende ta usa droga y Polis a bay detene nan. Hues a mustra cu e ta bon cu Polis a para nan pa stop nan di usa droga pasobra esaki ta prohibi pa ley.

   TIRA PIEDRA:

    S.C. y J.W. ta worde acusa cu riba 4 Augustus 2015, nan a bombardia cas y auto di famia H. E dia ey tabatin tiramento tambe y e persona envolvi ya a worde condena. Hues a mustra cu Polis a bay PastoorHendrikstraat caminda tabatin bringamento y tiramento. Polis a mira un grupo ta core bay for di e cas. A logra detene un di e grupo y despues a bay na e cas. Eynan a topa un grupo rabia cu machete, tubo den man. Famia H. tabata hopi rabia cu a destrui nan bentana di cas y dos auto. Dia 7 Augustus 2015 a detene S.C. y el a bisa cu e no tabata eynan y no a tira piedra. J.W. tambe ta desmenti di tabata den e grupo cu a tira piedra.

Hues a mustra cu tin declaracion di testigo L., el a mira un amigo S. ta papia cu un otro persona K. y parce nan tabatin problema. L. a mira cu K. a bay den grupo y a mira S.C. den e grupo. Nan a bay den direccion di cas di S. y nan a bombardea e cas y autonan. Tin otro testigo bisa cu a mira un grupo cu ta forma parti di gang di Village y cu J.W. no tabata den e gang. Hues a mustra cu S. a bisa cu S.C. y J.W. tabata den e gang. Dos biaha e gang a bay tira piedra. E ruman homber di S. tambe a bisa cu el a mira gang tira piedra y a reconoce J.W.

    MALTRATO:

    Dia 18 December 2014 Polis a bay pa un problema riba veld di basket y J.W. a menaza cu arma. Despues J.W. a bay cerca su mama y e dama S. a duna keho cu hende a bin cas pa menace. El a bay na cas di J.W. su mama pa reclama esey. Segun S. e tabata canando bay pa e cas y a topa cu e mama di J.W. y puntra kico tabata pasando. E mama a haci manera cu e kier dal y S. dale mokete den boca. E momento ey J.W. a atak’e cu algo duro na cabez y dale y un homber a yuda e dama S. Despues segun S., J.W. a coy un piedra grandi y dale na lomba. Segun J.W. el a defende su mama pasobra S. a bay dal su mama y el a mand’e cu un bloki. Segun J.W. ta un piedra chikito cu a spat for di otro. J.W. ta bisa cu e no tin arma pero e mama ta bisa cu e tin un imitacion di arma y Polis a haya esaki.

Hues a mustra cu na Maart 2015, K.V.L. a worde condena pa menaza cu arma di candela y municion y a haci delito di December 2015 den tempo di prueba. Segun K.V.L. e arma ey no tabata sirbi.

   EXIGENCIA DI FISCAL:

   Fiscal a bisa cu e ta haya legalmente proba e acusacionnan. El a condena totalmente con e trio aki a maltrata e homber W. No solamente a tira, sino a dal W. cu un biga y despues a corta su man afor. Awor e victima ta cana rond sin su man. E ta considera loke K.V.L. a haci ta intento di mata y a exigi 5 aña di prison. S.C. a causa maltrato severo caminda a fractura dos ripchi di W. cu a bora su pulmon. El a exigi 2 aña di prison pa S.C.

Pa J.W., kende ta esun cu a pasa man pa un machete y kap W. su man afor, el a exigi 4 aña y 6 luna di prison. Hues despues di a scucha tur e abogadonan, a bisa cu e ta bay studia e caso y dentro di algun siman lo por spera sentencia.

- Advertisement -

DUNA COMENTARIO

Please enter your comment!
Please enter your name here