Home General Green’S’cool cu competencia nacional di diseño saconan reuzabel oficial di Aruba

Green’S’cool cu competencia nacional di diseño saconan reuzabel oficial di Aruba

0
0
SHARE
- Advertisement -

20160405_GreenScool_cu_competencia_nacional_di_diseño_saconan_reuzabel_oficial_di_Aruba_001ORANJESTAD – Diasabra ultimo, na e inauguracion di e plataforma creativo nobo yama BEAM, a ser lansa un competencia nacional organisa pa Green’S’Cool.

Green’S’Cool ta un fundacion cu meta di educa e siguiente generacion riba e importancia di proteha nos medio ambiente y stimula ciudadanonan pa adopta conductanan sostenibel cu ta beneficia nos isla.

Miembro di e fundacion, sra. Veronica Olarte, a splica cu actualmente Parlamentario sr. Donny Rasmijn ta trahando riba un proposicion pa un ley cu lo prohibi uzo di saconan di plastic (destina pa uza solamente un biaha).

E uzo di saconan di plastic ta impacta nos medio ambiente como cu e ta tuma miles di aña pa deteriora, ta trece bida di bestianan –specialmente piscanan – den peliger como cu nan ta kibok’e pa cuminda, y e ta un di e causanan principal di sushedad ariba nos isla.

Den anticipacion di e ley aki – cu lo permiti Aruba pa sigui desaroya su mes como un isla sostenibel y consciente di su medio ambiente – fundacion Green’S’Cool di su banda ta bin cu un manera creativo pa pueblo di Aruba por participa den e diseño di e saconan oficial di Aruba.

E competencia aki ta carga e nomber di Aruba2046 y a keda inspira pa e celebracion di nos 30 aña di Status Aparte. Green’S’Cool ta invita pueblo di Aruba pa imagina nos isla aki 30 aña, pues na aña 2046, y ilustra esaki a traves di cualkier medio creativo, por ehempel pintura, potret, ilustracion, poema, dicho, sculptura of un obra di arte traha di material recicla.

Cualkier expresion creativo di Aruba na aña 2046 cu por wordo ilustra visualmente pa asina aparece riba e saco reuzabel oficial di Aruba lo wordo acepta. Como cu Green’S’Cool lo crea 4 saco oficial, participantenan lo wordo categorisa den 4 categoria y un ganador lo wordo saca di cada categoria. E categorianan ta basa riba edad: categoria 1: 6 – 12 aña; categoria 2: 13 – 21 aña; categoria 3: 22 – 35 aña y categoria 4: 36 aña bay ariba.

E 4 diseñonan ganador ta wordo anuncia durante TEDxAruba 2016 cu ta tuma luga 23 di September 2016 na Cas di Cultura. Tambe lo tin un exhibicion na TedxAruba unda cu tur diseño ricibi durante e periodo di e competencia ta wordo exponi.

E diseñonan ganado lo aparece riba 1 di e 4 saconan reuzabel oficial di Aruba. E saconan aki lo wordo distribui na diferente supermercadonan, hotel y tiendanan, unda cu clientenan por cumpra e saco hunto cu nan comestibelnan y asina sigui uza e saco aki cada bes cu nan bay haci compras. Di e forma aki, Aruba ta compaña otro paisnan rond mundo cu ya caba a prohibi uzo di saconan di plastic destina pa uza solamente un biaha.

Olarte a conclui invitando pueblo di Aruba pa participa na e competencia nacional y a gradici BEAM pa e oportunidad di lansa e competencia durante e inauguracion di e plataforma creativo aki.

Fundador di BEAM, sr. Michael Lampe, na su turno a expresa cu e ta reconoce e conexion entre e introduccion di saconan reuzabel na Aruba y e plataforma creativo BEAM, cu tin como meta pa produci inovacion y colaboracion den un forma multidisciplinario.

Pa mas informacion tocante Green’S’Cool y e campaña di Aruba2046 por follow GreenSCool riba Facebook pa keda na altura di e competencia aki y otro proyectonan di Green’S’Cool.

- Advertisement -

DUNA COMENTARIO

Please enter your comment!
Please enter your name here