Minister Paul Croes:
ORANJESTAD (AAN): Minister Paul Croes a keda sorprendi ora cu MEP a vota contra e ley di SVb cu por a duna un apoyo di 20% adicional na e 44 trahadornan di ex Aura Casino.
Cu e cambio di ley aki e fondo di SVb mes a cubri 19.4% (di e werkgeversbijdrage) cu lo mester a worde kita for di e trahadornan.
En bes di 41% di e suma cu lo worde wanta atras, awor e trahadornan lo mester paga 21.6%. Minister Croes a keda sorprendi cu e decision di MEP pa no apoya e ley cu a regla esaki.
E prome reaccion di e mandatario riba e decision aki tabata: “Hopi sorprendi cu decision aki di MEP cu ta bisa di ta para banda di e trahadornan di Aura Casino. Mama y tata nan di famia cu tin 4 luna y mey sin un salario. Y awe bo ta haya e oportunidad pa yuda nan cu un suma extra di 20% y bo ta vota contra. Increibel”, e Minister a mustra.
Ayera den tratamento di e ley riba e exoneracion un suma atrasa den balance di Banco di Seguro Social (SVb) fraccion di AVP a entrega un amienda na fabor di e 44 trahadornan di Aura Casino pa asina kita 20% di impuesto y premienan social di e suma cu nan mester ricibi di e pago di cesantia. Cu e amienda aki SVb lo no retene e suma di 41%, sino e suma di 21%. E amienda aki lo apoya e trahadornan cu un suma adicional di 20% riba e pago cu lo sosode den prome simannan di Mei.
“E amienda aki ta sigur un apoyo adicional na e 44 trahadornan di Aura Casino cu pa 4 luna y mey caba no a ricibi nan salario. Danki na henter fraccion di AVP cu a presenta e cambio aki y ta duna nos un apoyo grandi den e proceso aki”, Minister a declara na fin di e reunion publico. Minister Croes a gradici SVb y tambe fraccion di AVP pa e iniciativa di e cambio den e ley pa duna e apoyo na e trahadornan di Aura Casino.
“Ainda nos no ta cla. Diabierna mainta tin otro reunion importante pa trata nva sali di e situacion di Aura Casino. E reunion aki lo ta un encuentro entre FTA, Mediador, Barcelo Hotel y tambe e posibel operador nobo.
