Home Hudicial Corte tin awe caso di homber cu a haci atraco cu violencia...

Corte tin awe caso di homber cu a haci atraco cu violencia riba turista

5
0
SHARE
- Advertisement -

ORANJESTAD (AAN): Awe Corte den Promer Instancia ta sigui cu tratamento di e caso penal cu Ministerio Publico a cuminsa contra e homber J.A., kende na Maart 2016 su caso a keda posponi un biaha mas.

   Fiscal a acusa J.A. cu dia 11 Juli 2015, hunto cu otronan of su so, a haci un atraco cu violencia riba e dama D. y a force duna pertenencianan. Tambe e ta worde acusa di a haci un otro atraco riba un homber.

    ATRACO DAMA:

   Algun luna pasa, un parti di tratamento di e caso a tuma lugar caminda Hues a mustra cu e dama D. a bisa cu e tabata para banda di un misa Jehova warda un amiga pa bay misa. Un auto a para banda dje.

   El a mira cu tabatin tres persona den auto. Un di nan a baha cu machete y tabata zwaai y bisa pa duna cellular. Despues el a pidi pa placa y e dama den su spanto a dun’e cartera cu 61 Florin. Segun e dama tur tabata bou influencia. Den confrontacion di potret el a reconoce J.A.

    ATRACO TURISTA:

   Hues a mustra cu e homber S. turista di Bonaire a declara cu e tabata na lighthouse ta midi biento pa bay windsurf. Na dado momento un auto a bin para y tres homber a baha y un cu machete.

   Nan a rondon’e y el a coy algo mas di 200 Dollar duna nan. Un otro cu tabata cu cuchiu, a coy e yabi di auto. Un di e atracadornan a coy piedra y dal’e cu piedra na wowo. Nan a core bay cu su auto tambe. E mester a worde cosi na su wowo.

    SOSPECHOSO A ADMITI:

   Polis a haya notificacion cu e auto tabata core den Dakota y a para. J.A. tabata na stuur y a core bay na pia pero a worde deteni. J.A. a declara cu el a bebe hopi y usa droga “Molly”.

   El a admiti di a haci e atraco riba e señora y e placa a usa pa cumpra gasoline. Despues nan a bay na lighthouse y a haci e atraco arma. El a bisa cu el a bay cu e auto di e homber. El a bisa tambe cu e y un otro tabatin cuchiu den man y e otro a coy piedra dal e homber mientras cu el a listra den saconan di carson di e homber.

   Hues a puntra J.A. con e ta pensa awor di e caso. Segun J.A. door cu e tabata bou influencia di alcohol y droga. Hues a remarca cu ta e mes a usa nan. Segun J.A. nunca el a yega di haci algo asina. Hues a puntra J.A. si el a pidi e victimanan dispensa y a paga back. Segun J.A. e no tabatin placa mes den su man. Hues a remarca cu esey no kiermen pasobra ta J.A. a ataca nan.

    A BOLBE POSPONE CASO:

    Anterior, door cu Fiscal no a logra invita e victima S., a pospone e caso pasobra e victima mester worde invita pa mira si e kier haci demanda di daño.

Esey tabata na Januari y awor Hues a puntra Fiscal con a para cu e victima di Bonaire. Fiscal a bisa cu a manda invitacion y hasta a yama y hasta un a bisa cu lo bin. Pero ningun no a presenta. Hues a pospone e caso un rato pa Fiscal bolbe yama e victimanan na Bonaire pa mira con a para.

   Despues di un rato a sigui cu e caso y Fiscal a bisa cu el a yama pero e telefoon ta riba voice mail.

   Hues a bisa cu e por a compronde cu A. lo ta sinti’e malo. Esey a haci cu Hues a haci A. un serie di pregunta. A. a splica cu e ta bebiendo remedi for tempo cu e tabata chikito door cu e tin trauma. Hues ta haya cu lo ta mihor pa laga psychiater evalua A. Hues a puntra si tempo cu e tabata haci delitonan e tabata usa pildernan. Segun A. e tempo ey e tabata usando droga y no e pildernan. El a bisa Hues cu normal e no ta haci e cosnan ey.

   Hues a mustra cu dia 6 Mei 2011, ya caba acusado A. a worde condena na condena 2 aña y mey pa intento di asesinato. Segun A. e tempo ey tambe e tabata bou influencia di droga y alcohol. El a bisa cu el a hacie door cu e homber a saca arma p’e. Hues a remarca cu e tempo ey caba A. sa di e consecuencianan. A. a bisa cu ta berdad. Segun A. normal ora cu e ta traha cu su tata e ta usa remedi. Pero e tempo ey e tabata anda cu amigonan.

   Fiscal a bisa cu e no ta kere cu A. tin problema mental. E ta haya cu A. sa masha bon cu e no por usa droga y alcohol. E ta laga na Hues si e ta haya necesario un raport psychiatrico.

Hues a bisa cu mirando e declaracion di A. e no ta mira necesario pa laga pidi raport psychiater. A keda dicidi cu ta pospone e caso pa awe dia 12 di Mei 2016 pa mira si por haya victima pa mira si e kier haci demanda. Hues a bisa A. cu e ta compronde e interes di A. pero mester cumpli cu loke ley ta stipula esta pa check e victima.

- Advertisement -

DUNA COMENTARIO

Please enter your comment!
Please enter your name here