Home Editorial Editorial: E ALARMA TA SIGUI

Editorial: E ALARMA TA SIGUI

7
0
SHARE
- Advertisement -

jossy_mansur_picMi a supone cu despues di algun  siman, Gobierno a enfrenta e problema di invasion di malandro y a  debolbe nos por lo menos un parti di nos trankilidad. Pero mi speranza tabata en vano. E alarma ta sigui pasobra nada a sosode cu por tabata tin un impacto riba e ola di criminalidad cu ta azotando Aruba.

   Definitivamente nos Ministro di Justicia no ta cumpliendo cu un parti esencial di su trabao. E no ta imaginativo; e no por pensa riba plannan concreto cu por yuda detene e ola di actonan contra Ley cu ta tumando lugar na Aruba. Ta absurdo spera cu su so, riba su mes, por pone un fin na e desorden cu ta existi. Pero, e por bin si cu plannan cu ta involucra cuerpo policial y Ministerio publico den accionnan mas visible y mas efectivo. Y si e cambio di actitud y accion tin mester di e apoyo di un cambio di Ley anto e cambio ey mester tuma lugar lo mas pronto posible.

   Mientras tanto, e fiesta ta sigui y nos tur ta continua preso di e preocupacion cu tanto criminalidad a crea y ta sigui domina e noticianan di tur dia. Ta birando tempo pa un cambio!

    E  TRAM:

    Ya mas hende ta notando caba cu e tram no ta contribui cu nada na e caha di Gobierno ni na e economia local. E idea cu turistanan di e barconan lo baha mas pariba riba caya gandi no ta realistico, pasobra simplemente e no a tuma lugar y no ta bay hacie tampoco. No tin iniciativanan pa guia e turistanan te na e portanan di e tiendanan situa den e area ey. E ta un inversion completamente inutil di placa cu por a usa pa adelanta enseñanza y medicina, unda e ta hopi necesario.

   Benta placa afo den cualke medida sin resultado ta propio di Gobiernonan cu no ta pensa riba e bienestar general, sino solamente riba nan propio vision di kico e progreso mester consisti.

   Den esey Gobierno a bin cu algun Proyecto hopi util y vistoso, y ta di spera cu e lo continua asina. Pa loke ta e tram, e mester busca un solucion practico pe of elimine por completo for di riba nos cayanan, unda e ta djis keiro pariba pabao sin logra nada. Ta gasto so e ta acumula pa Gobierno cu mester carga cu su administracion y mantenimento.

     Nos ta aki pa ofrece critica riba ki paso cu ta cu Gobierno o oposicion tuma, no pa elogia un of e otro sin descanso. DIARIO ta un medio serio cu ta vigila e progreso o falta di dje pa Pueblo y pa nos Isla. E Experiencia cu nos a acumula durante tanto aña ta sirbi nos di base pa ofrece criticanan basa riba realidad, no fantasia.

- Advertisement -

DUNA COMENTARIO

Please enter your comment!
Please enter your name here