Home Editorial Editorial: GUERA

Editorial: GUERA

4
0
SHARE
- Advertisement -

jossy_mansur_picSemper mi a  bringa e gueranan normal na fabor di nos isla. Awor tin  un cos nobo, bisti cu un bachi bieu, ta blof tur caminda cu nan si ta bay kibra DIARIO, cu nos ta  un medio di shisheria y cu nan tin e berdadero dominio riba e campo. Shonnan, lubida. Boso no ta bay yega ni cerca di e rioleringnan cu ta core rond di e zona politico. E holo so lo manda boso flou.  Bringa cu boca, sin conoce e materia y e tereno bon ta un gran estupidez!  Y bringa cu lo mehor cu ta existi ta un bobedad di cerebronan hopi smal. Nos ta cla pa acepta cualke reto, di ken cu ta, cu  e garantia cu nos no ta bay perde.

            Mi no sa si Gobierno ta na soño o ta sirbi mes e no ta sirbi. Nos isla ta ser invadi pa un legion di malandro cu ta causando problemanan serio di preocupacion den Pueblo. Casi tur dia tin atraco cu arma, o invasion di  propiedadnan aheno, o atakenan personal pa horta o lastima un ciudadano, enfin, tur loke un comunidad no ta desea, pero cu si ta sosodiendo cu frecuencia riba nos isla. For di e momento cu Gobierno a dal porta habri pa cualke bandido bin sin e necesidad di un escrutinio riba su pasado y su comportacion, e problemanan serio pa nos isla a cuminza. Anto mescos cu Gobierno a dal e porta habri e por dal e cera back pa protege nos poblacion di e infeccion criminal cu a invadi nos teritorio y no ta parce di tin fin.

            Si ta e Ministro di Husticia no ta sirbi, reemplaze; si nos leynan ta demasiado suave cu e malhechornan anto ordena Parlamento pa fortifica nan te na cualke extremo cu por yuda evita mas di e criminalidadnan menciona.  Unda tin e boluntad pa logra algo, e ta worde logra, pero e boluntad mester tey, firme, sin hesitacion, pa debolbe nos e Aruba cu nos ta stima y kier protege.  Mi no ta compronde di con Gobierno a ser forza pa elimina e visa necesario pa tanto pais unda desorden ta hopi frecuente y bandidahe tin un campo fertil pa funciona. Ta con nos ta bay lidia cu un auge asina grandi di criminalidad cu e poco armanan cu nos Leynan ta ofrece? Nos no ta prepara pa enfrenta semehante situacion cu e condicionnan existente!!

            Tumami na bon o tumami na malo; mi unico interes den duna mi opinion ta purba contribui na e solucionnan cu mester bin cu urgencia pa debolbe nos e trankilidad cu cual nos ta custumbra di biba. Nos no por sigui riba e caminda aki  di destruccion, pasobra e lo conduci nos pa un abismo, cu ta su punto natural di terminacion.

              SI Gobierno djis admiti cu e  no por soluciona e problema di criminalidad, e bisa asina, djey hala un banda  y laga otronan cu si por,  tuma over y cuminza pone un fin na e auge di criminalidad pasobra ya Pueblo no por wanta mas. Mester bin un fin rapido na tanto desorden, tanto violacion di Ley, tanto arma den man di e bandidonan, y crea un biaha mas e ambiente adecuado pa desaroya bidenan sano pa e bienestar di nos comunidad y di nos isla.

- Advertisement -

DUNA COMENTARIO

Please enter your comment!
Please enter your name here