Trio cu a bati, tira y corta pols di homber afor condena entre 1 y 3 aña y 6 luna di prison
ORANJESTAD (AAN): Ayera mainta e hombernan K.v.L., S.C., J.W. a presenta dilanti Hues pa scucha nan sentencia.
Luna pasa tratamento di e caso a tuma lugar caminda Fiscal a bisa cu e ta considera loke K.V.L. a haci ta intento di mata y a exigi 5 aña di prison. S.C. a causa maltrato severo caminda a fractura dos ribchi di W. cu a bora su pulmon. El a exigi 2 aña di prison pa S.C.
Pa J.W., kende ta esun cu a pasa man pa un machete y kap W. su man afor, el a exigi 4 aña y 6 luna di prison.
SENTENCIA:
Hues a bisa cu K.v.L. ta worde acusa di tiramento riba e homber W. y posecion di droga hunto cu otronan den un auto. Hues a bisa cu mescos cu Fiscal, e no ta haya intento di asesinato proba. Na opinion di Hues, no por proba maltrato severo di rudia destroza. Den e raport medico ta para solamente tiro den rudia. Ley ta bisa cu mester tin mas informacion pa por determina si tin herida severo.
Hues ta haya cu si a keda proba maltrato cu arma di candela. El a mustra cu K.v.L. a tira den direccion di pia di W.
Hues a remarca cu, si a tira riba vloer mes, e bala por desvia y herida e victima. Tambe a keda proba posecion di cocaina den auto. Abogado su ponencia cu e forma con a para e auto ta contra ley, Hues a rechaza esaki. Hues a mustra cu e auto no tabatin number dilanti y pesey Polis a bay pare. Ademas Polis a haya permiso pa listra den e auto.
Pa cu castigo a tene cuenta cu K.v.L. tin un carchi di castigo caminda anterior el a worde castiga caba pa posecion di arma y violencia. Hues a condena K.v.L. na 2 aña y 6 luna di prison, cu ta mitar di loke Fiscal a exigi.
E acusado S.C., Hues ta haya legal proba cu a dal cu biga riba pecho di W. Door di esaki, e pulmon a perfora. Na opinion di Hues, esaki ta un maltrato severo. E defensa di abogado cu S.C. mester a defende di e manera aki, a keda rechaza pa Hues. Hues a remarca cu S.C. por a dal e victim na su man. El a sigui bisa cu e pregunta tambe ta, si S.C. por a core bay of no.
Pa loke ta e otro acusacion di violencia public na un cas, Hues no ta haya esaki proba. Na opinion di Hues no tin prueba cu el a haci algo significante pa haci violencia publico. Segun hurisprudencia, si solamente un persona ta presente no ta suficiente pa bisa cu el a haci algo. No tabatin confrontacion pa determina cu realmente S.C. a haci algo.
Pa e castigo, Hues a tene cuenta cu ta promer biaha cu e ta cay sera pa violencia. Tambe tene cuenta cu W. a tire cu boter y kibra su diente. Hues a condena S.C. na 18 luna di prison di cual 6 luna ta condicional cu un tempo di prueba di 3 aña.
J.W. acusa di a kap man di W. afor y tambe hunto cu otro cu droga den auto. Ademas e ta worde acusa di violencia public caminda a bombardera un cas.
Hues no ta haya proba intento asesinato, mescos cu Fiscal a bisa. Na opinion di Hues, si a keda proba cu J.W. a occasiona lesion severo. El a rechaza e defensa di abogado cu J.W. mester a defende su mes y no tabata su intension di corta e pols di W. afor.
Hues a remarca cu si bo tin machete y ta zwaai esaki, bo ta core riesgo di causa herida severo. Pa loke ta posecion di droga, Hues ta haya esaki proba. Pa loke ta e violencia public, mescos cu S.C., Hues no ta haya cu tin suficiente prueba cu J.W. tabata meti den violencia publico. El a mustra tambe cu no tabatin confrontacion y no ta describi kico el a haci.
Hues tambe ta haya proba cu J.W. a dal un dama cu un piedra na su lomba.
Pa cu e castigo, Hues a tene cuenta cu J.W. no a yega di cay sera. Di otro banda ta un caso hopi serio caminda a kita pols di e homber W., kende awor no tin su man mas. El a condena J.W. na 3 aña y 6 luna di prison.
