ORANJESTAD(AAN): Mr Evelyne Wever Croes lider di MEP ta nenga cu nan a haya un invitacion pa sinta na mesa riba e tema di All Inclusive. E ta na altura di solamente loke el a lesa den media riba e punto aki.
E articulo den corant ta bisa cu e mandatario ta invita lider di MEP y PDR pa dialogo. Pero den e articulo e poco porta cu e mandatario a habri pa dialogo el a dal sera back, pasobra den e articulo ta blo ataca MEP pasobra no a tuma un decision.
“E kiermen nos mester para banda di dje sino nos ta contra pueblo. Si bo kier dialogo, anto e ora bo ta duna espacio pa dialogo. Bo no ta invita pa dialogo y despues ta cuminsa lastra y ataca nos manera bo ta haya ta bon.”
Pero asina mes nan ta contesta e Minister bisando cu nan ta studia e ley y ningun hende, ni Minister Oduber, no por pone presion a para banda di dje. Parlamento tin te 8 di juni pa haci pregunta y ora cu haci contesta, ainda tin dos pa tres siman pa e debate. Pues nan tin hopi tempo pa fiha posicion y no ta core tuma un posicion djis pa complace Otmar Oduber.
Pa loke ta e ley riba mes, Huristanan a desbarata esaki y a lague na filingrana, a kite for di mesa totalmente. Dia cu Minister Otmar Oduber para cu pueblo, nos ta para banda di dje. Awor nos no sa unda e ta para. Ademas, e ta bisa, e Minister ta parti cosnan y ta contradeci su mes. El a bisa cu e no kier mas All Inclusive, pasobra e ta malo pa Aruba.
Pesey e ta puntra di con den e ley ta permiti 1500 camber all inclusive extra pa bini. Pasobra el a priminti otro hotelnan pa bini cu mas camber all inclusive pa cual mester laga e espacio habri. Si e ta haya all inclusive asina malo, e Parlamentario ta puntra, di con bo ta bin cu 1500 camber mas. E Minister ta contradeci su mes den asina tanto cos cu bo no por confia e Minister mas.
MEP ta di acuerdo cu e proposicion di AHATA pa pone e ley “on hold”. Esaki pasobra manera e ta traha awor, e no por pasa. Miho Gobierno tuma su tempo y traha algo bon, cu ta carga aprobacion di comunidad. Un ley cu ta atende cu e problemanan den turismo, y cu no ta worde den e proyecto di ley cu kier presenta awo.
