Home General Prome edificio di 3 piso di hospital nobo ta cla caba

Prome edificio di 3 piso di hospital nobo ta cla caba

1
0
SHARE
- Advertisement -

Junior Tromp:

ORANJESTAD (AAN): Ministerio di Infrastructura di Minister Benny Sevinger ta trahando riba varios proyecto grandi. Un di nan cu a finalisa recientemente ta Haf di Barcadera. Otronan cu ta den ehecucion ta Green Corridor y ampliacion / renobacion di dr. Horacio Oduber Hospital (HOH).

Personanan cu ta bishita of pasa banda di e hospital di Aruba, lo por a constata un cambio caba, unda cu un di e torennan nobo a worde completamente lanta caba, esta e Medical Office Building (MOB).

Den combersacion cu Junior Tromp, kende ta representa Minister di Infrastructura (Gobierno) den e Steering Committee cu ta controlando ehecucion di e proyecto di hospital, el a bisa cu e prome edificio di tres piso ta cla caba. Net tras di MOB ta construyendo e edificio di seis pisa cu ta worde yama e FEF TOWER.

E proyecto aki ta worde ehecuta door di e contratista OHL Orellano, cu a gana e destaho publico haci. Ta trata di un compania Mericano cu hopi experiencia den e area aki y ta traha cu dos compania local, esta ALBO (cu ta traha e edificio di 6 piso) y Bohama (encarga cu construccion di e edificio di 3 piso, cu ta practicamente cla).

Manera a worde splica, e MOB lo tin e oficinanan transitorio di tur loke ta e facilidadnan cu tin den e parti abou di e edificio bieu di HOH, cu ta bay worde renoba. Segun e schedule traha, den e proximo tres lunanan mester cuminsa cu e parti di e renobacion di e parti abou di e actual edificio di HOH. Ta trata di oficinanan di specialistanan, centro di rehabilitacion, Radiologie, administracion, cantina y cushina, Laboratorio, etc.

Un parti importante den henter e construccion aki ta un edificio apart (Central Energy Plant) cu a worde traha y dedica unicamente pa maneho di coriente di hospital. Como cu e edificio tin su mesun transformer huis, e ta cay directamente bou di ELMAR pa cual ta trahando estrechamente cu nan pa conecta hospital riba e sistema di ELMAR.

Tromp a splica cu den e edificio MOB lo bay ubica tur e specialistanan, y nan lo keda hopi cerca di nan pashent. “Nan lo ta situa den un area central, y ta haci e servicio mas eficiente.”

E Steering Committee ta contento pasobra ehecucion di e proyecto grandi aki di Minister Benny Sevinger ta “on schedule” debi na e bon cooperacion cu tin entre e companianan di construccion y e otro instancianan envolvi, incluyendo henter personal di dr. Horacio Oduber Hospital. “Mientras cu e trabao di construccion ta andando, e servicio ta sigui normal. Pesey sin e cooperacion di e staff y personal no por a yega na unda nos ta aworaki,” Tromp a duna di conoce.

Den e proyecto di renobacion / ampliacion HOH ta inclui construccion di un edificio di 6 piso, cual construccion lo mester ta cla pa fin di aña. Pero, Tromp ta bisa na mesun momento, aki por surgi retraso chikito mirando cu tur e camanan mester worde muda pa e area aki y prome cu esey sistemanan nobo di operacion entre otro pa aparatonan lo mester worde instala prome. Lo mester test e sistemanan nobo y educa e staff y personal den nan uzo. Pesey ta calcula cu toch pa februari di 2017 e toren halto lo por ta completamente den uzo.

Recientemente Prome Minister Mike Eman y Minister Benny Sevinger a worde invita pa mira con e construccionnan ta desaroyando y a keda hopi satisfecho. Mas ainda, pasobra “ta trata di un proyecto cu tabatin mas di 20 aña cu ta sperando riba dje,” Minister Sevinger a expresa.

- Advertisement -

DUNA COMENTARIO

Please enter your comment!
Please enter your name here