Pabien Aruba!
Ayera tabatin e firmamento oficial di e acuerdo cu tin entre gobierno di Aruba, Gobierno di Venezuela y Citgo di Merca ariba e reapertura di nos refineria. Despues di hopi tempo y energia e gobierno di AVP a logra e continuacion di nos planta na San Nicolas.
Un palabra grandi di felicitacion ta bay na nos gobierno pero sigur tambe na e comision grandi di profesionalnan experto di Aruba cu a haci un tremendo trabao den e negociacionnan pa yega na e acuerdo cu tur e partnernan envolvi. Un alegria total ta reina ariba nos isla cu e hecho impresionante cu nos refineria lo ta den operacion atrobe.
Cuanto di nos hendenan a lanta cu e candela na halto di e refineria cu tabata e simbolo di progreso pa henter nos pueblo y cuanto dolor e pagamento di e vlam di Lago a haci rond di nos isla. Maske nos alegria ta grandi cu e reapertura aki nos no mag lubida con e desaroyo di e refineria aki a bay. Na prome luga ta bon pa corda cu tabata e fundadornan di e partido AVP cu na inicio di siglo pasa a logra di haya e compania di e tempo ey pa establece ariba nos isla cu a cambia e rumbo di Aruba pa semper.
Di un isla chikito cu un par di mil habitante den poco tempo a bira un centro di actividad petrolero cu den segundo guera mundial a abastece e aliadonan e fuel pa avion y barconan. Dia cu Lago a dicidi pa para e planta tabata ora cu e gobierno di MEP a pone un belasting ariba e compania cu a pone cu posicion di Lago a bira un cu no por a competi mas ariba e mercado internacional di petroleo. E tempo ey pa di prome biaha MEP a comete e eror di kere cu Lago tabata bluf y lo keda Aruba . E tempo ey Lago a cera. Ora cu prensa a haci pregunta na e manager di Lago di e tempo ey pakico nan ta cera e planta su contesta tabata “go and ask mister Betico Croes”. Berdad ta cu despues Nel Oduber a logra di habri e refineria atrobe cu Coastal cu a bira Valero.
Pero atrobe MEP den gobierno Valero a ofrece pa renoba e planta por completo si gobierno kita e BBO for di su lomba. Valero a paga un suma grandi tur aña gana of perde placa. Atrobe e gobierno di MEP a kere cu e compania Valero ta bluf cu e consecuencia cu Valero a para operacion. E gobierno di AVP bao liderazgo di Mike Eman a bin topa un refineria cera y a haci tur loke tabata por pa yega na un reapertura atrobe.
E manera cu e gobierno di Aruba a actua den esaki tabata uno bon profesional cu nos miho hendenan ariba e tereno aki pa sigura si yega na activa e planta cu e lo ta algo sigur y di largo plaso. Hopi di nos hendenan cu ta corda Lago di e tempo aya ta cu lagrima na wowo awo cu nan ta mira Mike Eman nieto di difunto Henny Eman cu a logra Lago establece na Aruba habri e refineria atrobe pa sigura progreso di nos isla.
Mike Eman durante e problema di e refineria cera a mustra su capacidad pa envolvi su miho hendenan pa na un manera mas profesional posibel anda cu e dificultadnan y yega na un final satisfactorio pa nos isla. Pesey un pabien caluroso na Mike cu su team di ministro pero tambe su team di experto cu a yega na e solucion magistral pa nos pueblo. Pabien Aruba!!!
