Home Politica Eman ni Hulanda ta splica ki beneficio Aruba tin cu e stul...

Eman ni Hulanda ta splica ki beneficio Aruba tin cu e stul pa Reino den e Conseho di Seguridad di Nacionnan Uni

0
0
SHARE
- Advertisement -

Parlamentario mr. Xiomara Maduro:

Eman ni Hulanda ta splica ki beneficio Aruba tin cu e stul pa Reino den e Conseho di Seguridad di Nacionnan UniORANJESTAD    (AAN):   Siman ta habri cu e noticia cu Minister Eman tabata na un Cumbre importante na Cuba den cual e mandatario a hiba palabra pa mustra con bon y sostenibel nos Pais ta den Reino Hulandes. Tur esaki ya cu Reino (lesa Hulanda) mester gana simpatia di mas hopi Pais na mundo posibel pa asina fin di juni por logra haya e stul codicia den e Conseho di Seguridad di Nacionnan Uni. Pa logra e meta aki na beneficio di Hulanda, Minister Eman a biaha na diferente Pais na mundo pa hiba speech y nos Pais mes a keda bandona atras meymey di crisis financiero, crisis gubernamental y hasta crisis Parlamentario.

   Y mientrastanto ainda Minister Eman ni Hulanda a splica e Pueblo Arubano ki beneficio Aruba tin cu e stul pa Reino den Conseho di Seguridad di Nacionnan Uni. Pasobra no por ta posibel cu Aruba ta keda bandona pa su cuenta gastando placa cu nos no tin, pa asina Minister Eman haci trabou di loopjongen pa Hulanda sin cu Aruba tin beneficio cu esaki.

 

Campania desde 2013

E campania pa Hulanda yega na e stul den e Conseho di Seguridad di Nacionnan Uni a cuminsa desde 2013. Desde e momento ey ta bisto cu Minister Eman mester a keda den gobernacion pa asina e por haci e trabou di bende e idea na mundo cu Aruba ta e modelo con un isla chikito por ta 100% liber di uso di azeta na 2020. Aunke cu expertonan a indica cu e vision 2020 di Eman no ta factibel y cu na Aruba nos ta hopi leu di ta sostenibel pa futuro, toch Hulanda a braza e idea di Eman. Cu e propaganda di Eman cu su vision 2020 pa Aruba, Hulanda por yega na haya bon acogida den e Paisnan SIDS y tambe e den Paisnan den Caribe y Latino America, cu lo por confia Hulanda cu un voto pa asina nan por yega na e stul codicia na Nacionnan Uni.

Man riba Eman su cabes

Cu tur e viahamento aki rond mundo pa tira speech na fabor di Hulanda, Minister Eman ta gasta fondonan publico limita di nos Pais creando un debe mas grandi pa nos Pueblo. E situacion financiero di nos Pais debi na e mal maneho di e propio Minister Eman tin nos bou supervision financiero di Hulanda. Pero Politiek Den Haag ta tolera tur e mal gobernacion di Eman ya cu nan mester di dje politicamente bibo pa haci e trabou di loopjongen pa Hulanda. Ta pa e motibo aki CAFT no ta mesun streng cu Aruba compara cu Corsow y Sint Maarten. Tur ta pone man riba Eman su cabes te ora cu fin di juni 2016 bira conoci si Hulanda ta haya e stul si of no.

Ningun beneficio pa Aruba

Te ainda ni Eman y tampoco Hulanda tabata tin e decencia di splica e Pueblo ta ki beneficio Aruba lo tin una vez cu Hulanda logra haya e stul na Nacionnan Uni. No tin ningun claridad si, por ehempel, Aruba ta bay haya placa fia na interes favorabel via Hulanda pa asina nos por sikiera refinancia e MEGADEBE cu Hulanda mes a permiti Eman traha riba cabes di nos Pueblo y nos yuinan. Ta parce cu Minister Eman no a deal nada na beneficio di Aruba y ta haci e trabou di loopjongen djies pa ‘streel’ su ego y haya e excusa perfecto pa no mester asumi e responsabilidad di goberna nos Pais na drechi. Pasobra si Aruba tabata tin beneficio cu e stul di Nacionnan Uni, di basta dia sea Minister Eman of Hulanda mester a informa Pueblo di esaki. Den e caso aki, geen nieuws, is slecht nieuws.

- Advertisement -

DUNA COMENTARIO

Please enter your comment!
Please enter your name here