Home Policial Grupo di bisiña na Moko ta uni contra malhechornan

Grupo di bisiña na Moko ta uni contra malhechornan

6
0
SHARE
- Advertisement -

Cuerpo Policial ta Brinda guia na Neighborhood Watch

ORANJESTAD    (AAN): Un grupo di bisiña na Moko a dicidi di organisa un sistema di supervision di becindario despues cu varios di nan a haya nan mes confronta cu kiebro y ladronicia. Nan a forma un grupo riba Whatsapp y a instala cierto ekiponan na y rond di nan cas, y e comunicacion ta bayendo bon, sinembargo nan a sinti cu nan kier mas guia pa forma un “Neighborhood Watch” mas fuerte y miho organisa. Consecuentemente nan a acerca e departamento di comunicacion, informacion y prevencion di Cuerpo Policial pa guia.

Recientemente durante di un reunion na cas di un di e bisiñanan, Lito Lacle y John Larmonie di Cuerpo Policial a duna un presentacion hopi interactivo na e bisiñanan, kende a haci hopi pregunta y a pidi diferente conseho specifico tocante e situacion na nan cas y den e bario en general.

   Greg Peterson, kende tabata anfitrion di e reunion, a splica cu tabatin problema den bario cu ladronicia y nan a dicidi di organisa nan mes pa como grupo para mas fuerte contra e incidentenan cu tabata tumando luga.

El a bisa cu den su cas mes a wordo horta dos biaha, y loke a haci nan spanta mas tabata cu e di dos biaha su señora tabata na cas ora cu e ladronnan a drenta pa horta.

E bisiñanan a sinti cu nan tin mester di mas “coaching”, mas idea y informacion con pa expande riba nan idea y expande e red di bisiñanan participando na e Neighborhood Watch.

  Cuerpo Policial ta aplaudi y apoya iniciativanan asina y e grupo aki tabata e di cuater den un periodo relativamente cortico cu nan a yuda cu informacion y tipnan pa e establecimento y fortificacion di nan Neighborhood Watch.

   Lito Lacle a subraya cu un cos ta pa por lesa den corant cu polis a gara e ladron, pero mas bunita ta pa e ladronicia  nunca tuma luga. Prevencion den esaki ta clave. Gruponan manera Neighborhood Watch ta un forma pa preveni hunto pa ladronicia y/of kiebro no tuma luga mes, y Cuerpo Policial ta contento cu e bisiñanan a acerca nan pa conseho y guia.

   Pa medio di e presentacion, John Larmonie a splica kico e bisiñanan por haci individualmente, y como un grupo pa cu prevencion di ladronicia y otro crimennan den nan bario.

E proceso pa sigui desaroya e Neighborhood Watch na Moko ta sigui; Peterson a bisa cu ya caba e sistema di alerta otro via di Whatsapp ta funciona bon pa nan, y nan lo sigui expande e Neighborhood Watch uzando e tipnan y cu e guia di Cuerpo Policial.

- Advertisement -

DUNA COMENTARIO

Please enter your comment!
Please enter your name here